Matiyu, echî 19 - Ejagham New Testament

Jisos a chôt nchot ebháé efábhám

¹ Nji Jisos a manê achot mmá, a mághe Gariri, a yáŋe aya Jodan, a jak ka ebhat í Judiya nji é rî njəm aya.

² Ekpatə́m ekam ane é tôp yê é jak, yê fə́ne a yimá mba á máŋa omaŋé á soná.

³ Etʉ̂ ane echəme Farasi á bhak á bhá gáe yê sê, “Sə́re êt, ebhín ejə́ré é kam sê kpe bhaghé nchot nâ a fábhe, nne a bhím nkáé ka ebháé a?”

⁴ Kən Jisos a táme ábho se, “Ó ka bhiŋ ên ejûm nji á séŋe ka nwet Obhasi a? Ekpak á séŋe sê, ‘Ta ka eróghá-ndə́p, Obhasi a yimî ábho, nne-ndûm na nne-nkáé.

⁵ Ka echî njí, nne-ndûm tîk a mághe ńsé na nnyen, a chə̂m biji na nkáé owe, á chə́bhe ejûm jə́t.

⁶ Ane mba ábháe á chəbhe nne yót, á ká kpo joé ane ábháe. Deê mân nne kpe yót a kâ chât ejûm nji Obhasi a chəmê eji jə́t.’ ”

⁷ Kən ane echəme Farasi mbá fə́ne á bhə̂p yê sê, “Ájoé nâ noŋ é rî, Mosis a yimî nan a káre ikom se nne á timí nkáé ebhímím, deê a séŋ nwet ebháé emanám, kən a bhím mân nkáé?”

⁸ Jisos a táme se, “Mosis a kamê ó bhím ên akáé abhə́né ka ebháé ka osoná-echî obhə́né. Ka eróghá-ndə́p é ká joé áno.

⁹ Deê ń sə́ré ên bəre kpe énê nnyo á bhim nkáé owe a jî kô nnyo tat nji nkáé á ka nuŋí nne-ndûm etat, nne-ndûm ányo a gbô ekun.”

¹⁰ Ane mba á tóbha yê á kpó to á yúk njí, á sə́re yê sê, “Ájoé nâ noŋ é rî, ogoe ó nôp ó chîŋ.”

¹¹ Jisos a táme ábho se, “Ane chénchén asík nâ á kí fi ka ntʉ́ghi ebhín njí, é ká chiŋi ábho mba Obhasi a káre ḿbə́ŋé se á fî.

¹² Echî aŋ? Etʉ̂ ane á bhó ko ebháé, ka á jíi ábho ka ekpak njí, etʉ̂ ka ane á yími ábho. Etʉ̂ fə́ne á rî mba á bhó ko ebháé ka obhô nchot otúi Obhasi. Deê mân nne nnyo kə́n a fî ka ekpak nji n chorê nná, a kam ka eyum ejámé.”

Jisos a káre abhonche enare

¹³ Etʉ̂ ane á kô abhóné á bhak mbâ Jisos sê a kuní ábho obhô ka echî a goré Obhasi a karé abhon mbá. Kən atóbhá Jisos á nyân ane mbá sê á kâ kpô yim.

¹⁴ Kən Jisos se, “Deê abhonche á bhá mbâ amé, ka kpó taŋé ên ábho. Echî aŋ? A ri ane mba á fóne ḿbə́ŋé jáé noŋ abhon ntʉ́ghi mbá, nâ á kí gye ka otúi Obhasi.”

¹⁵ A kô mân abhon mbá a kúni abhô ka echî a káre ábho enare Obhasi, kən a kí maghé.

Jisos na nne-ntí yót

¹⁶ Nne yót a bhák mbâ Jisos a bhâ bhə̂p yê se, “Ńsé, n kí yim bhaghé énoê etûm kən ḿ fôn ekpin ótúm-ótúm?”

¹⁷ Jisos a táme se, “Jen kən o kí bhəp ə̂m nchot énoê etûm? Kpe nne nno cháŋ, é ká chiŋi Obhasi átíŋ. Kən á joé o kí wom ó fôn ekpin, kî ebhín Obhasi.”

¹⁸ Nne nnyó a bhə̂p se, “Ebhín í nchane nâ njə́n?” Jisos se, “O kâ yúi nne, ka gbô ekun, ka jʉ́ ejʉ̂, ka gyími ntî-isê áfúbhí.

¹⁹ Jíghi ńsé owa na nnyen owa, kot ntem-nne ka ekpak nji o korê biji ibhâ.”

²⁰ Kən nne-ndûm nnyó a táme se, “N kí kighâ bibhín mbí chénchén. Bhaghé ejûm nâ é kpo kə́t ə̂m?”

²¹ Jisos se, “Ájoé o kí wom ó yîm ó jéghe, choŋ ogurî iyîm ibhâ chénchén, kó ntí o káre mbâ akpák. Ó yim ka ekpak njí, tîk o fôn efaŋ ka ósô. Bhák tôp ə̂m mân.”

²² Nji Jisos a sə́re nne-ndûm nnyó ejûm njí, nne-ndûm nnyó a mághe a kʉ́rá na nsae ka ḿbə́ŋé, ka yê a ri ekpatə́m í nne-ntí.

²³ Jisos a kpíghi mân mbâ atóbhá abhê a chôt se, “Deê ń sə́ré ên bəre tîk é sôn é chiŋ kən nne-ntí a yén otúi Obhasi.

²⁴ N kí kpo səre ên bəre é ká yuŋi mfoŋ echóé a chíŋ ka mfúk ḿbíabə́n, noŋ é kí yuŋi nne-ntí a gyé otúi Obhasi.”

²⁵ Nji ane abhê á yúghi nchot nnyí, á kêt. Á bhə̂p sê, “Kən énê mân tîk a sêm?”

²⁶ Jisos a yûŋ amə̂t a kêp ábho a chôt se, “Nne á bhó bhik eyimím ntʉ́ghi ejûm njí, kən Obhasi á kí bhik eyimím chénchén ejûm.”

²⁷ Kən Pita a bhə̂p mân Jisos se, “Ńgyê êt, é maghe chénchén iyîm ibhə́ré e kí top wâ, orʉrí obhə́ré ka etím a ri jen?”

²⁸ Jisos se, “Deê ń sə́ré ên bəre ebhú ngun i mfê á bha, Mmon-i-ntem-nne a kí kumí na ejík ka ekumi otúi ejê. Ên mba ó tobha ên ə̂m nná, tîk o kúmi ên eróŋ noŋ atúi-ofâm ka ngûm ekumi ófó na ébháe o táŋá ên ndə́p-i-njû ófó na ébháe nnyi abhon Isrel.

²⁹ Kpe énê nnyo a maghê ojû obhê na abhon-í-nnyen abhê, a mághe ńsé na nnyen na abhon na mbin ka echî ejámé, tîk a fôn iyîm mbí ka nsam na nsam. Tîk a fôn fə́ne ekpin ótúm-ótúm.

³⁰ Kən məŋê ên sê, tîk ane etî-etî mba mfá-mfá á rî ochî, á gbô njəm, mba fə́ne á rî njəm mfá-mfá, tîk á chə́bhe ochî.”