Matiyu, echî 16 - Ejagham New Testament

Sê Jisos a tóŋé eriŋ Obhasi

¹ Ane echəme Farasi na mba Sadusi á bhak á bhá gáe Jisos. Á sə́re yê sê a tóŋé kpá eriŋ Obhasi ábho á yén.

² [Kən Jisos a táme se, “Ebhú egu é si, o kí səre ên sê ofú tîk ó nop, ka ósô ó rî jáé.

³ Ofú ó che o kí səre ên sê mbúta tîk a nâ, ka ósô ó rî nkə́p. Ó riŋi ên ekpak nji nne a kí kep ósô a sə́re se ofú tîk ó jóe ka ekpak njí, kən ó ka məŋé ên esə́rə́m echî eriŋ ebhú njí.]

⁴ Abhon ebhú njí, obhí jen? Obhasi, á bhó fup! Á kí bhəp sê á tóŋe ábho eriŋ Obhasi. Kən kpe jə́t á bhó toŋe é ká chiŋi nji Jona.” Nji a chorê nchot nnyí, a mághe mân ábho a jak.

Jisos se ane á kó ebhú na okpígha-ejûm áfúbhí

⁵ Nji á kpó bhughi okpi á yáŋe njəm aya, ágbán í Jisos á gyini á ká kən édî.

⁶ Jisos a sə́re ábho se, “Kô ên ebhú na yîs nnyi ane echəme Farasi na mba Sadusi á kágha ka brêt ábho.”

⁷ Kən ágbán abhê á ká gyʉri nchot eye. Á kí firi ábho-ábhô sê, “A chorê nchot nnyí ka é ka kó édî é bhá tîk?”

⁸ Jisos a mə́ŋe nji ágbán abhê á chóra, a bhə̂p ábho se, “Nnyi édî a dʉ nan? Bhaghé ntʉ́ghi ḿbə́ŋé ekíím nâ ó kik ên nná?

⁹ É nyə́ne é ká jae ên a? Ó gyini ên ebhú nji n kóe nsûm i brêt érôn n gyê ane ntem-esam ntə̂m-ntə̂m ófó na ébháe na ejûm (5,000) a? Édî nji é kə́re, o kaghê ên bikáé, í súi íbhík?

¹⁰ Ó gyini ên fə́ne ebhú nji n kóe nsûm i brêt enígisá n gyê ane ntem-esam ntə̂m-ntə̂m ófó (4,000) a? Édî nji é kə́re, o kaghê ên bikáé, í súi íbhík?

¹¹ Jen nji ó ka məŋé ên sê nchot amé á ka joé a kpê na édî? Kô ên mân ebhú na yîs nnyi ane echəme Farasi na mba Sadusi á kágha ka brêt ábho.”

¹² Ebhú áji nâ ágbán abhê á bhâ mə́ŋe mân sê ńsé ábho á chorá se á kó ebhú na okpígha-ejûm ane echəme Farasi na mba Sadusi, á ka chot nchot i yîs nnyi á kágha ka brêt.

Pita a sə́re ekpak í nne nnyo Jisos a ri

¹³ Nji Jisos a síi ebhat eték í Sesariya Firipi, a bhə̂p atóbhá abhê se, “Ane á sə́ra sê Mmon-i-ntem-nne a ri bhaghé nne kpá títí?”

¹⁴ Á táme yê sê, “Etʉ̂ ane á sə́ra sê a ri Jon nnyo mfúgha-ane-ayép, mba tat sê a ri Erayija, mba tat sê a ri Jeremaya. Kən etʉ̂ sê ebhú tat a ri nkara-otîp Obhasi yót.”

¹⁵ A bhə̂p mân ábho se, “Ên áfoné, ó məŋe ên sê mme a ri énê?”

¹⁶ Pita nnyo á kamá fə́ne se Simun a táme yê se, “We a ri Krayis, nne nnyo Obhasi a túmi se a bhá yim ngun á sém. We nâ o ri Mmon i mfoné-mfoné Obhasi.”

¹⁷ Nji Simun a táme nná nchot nnyí, Jisos a sə́re yê se, “Simun, mmon i Jona, ogyebhá-ḿbə́ŋé ó rî na we. Nchot eya nnyi o táme nná a jî fə́ne ka mbá, nne asík a sə́re wâ, é ká chiŋi Ńsé omé nnyo a ri ka ósô.

¹⁸ N kí səre wâ bəre we ó kamá se Pita, nâ se ntáé. Tîk m gbê njû amé ka eránám njí, ane abhámé á chəmá. Ikom ekʉ̂ í bhó bhik ábho eyimím kpe ejûm.

¹⁹ N kí karé wâ erəbhé nji otúi Obhasi. Nji o kí səre ka nsi nnyí se nne a kâ yîm áno, nâ noŋ á kí ko fə́ne ka ósô. Nji ó kam se nne a yim, nâ noŋ á kí ko ka ósô.”

²⁰ A bhâ tʉ̂ mân ágbán abhê obhô ka otûŋ se á kâ sə́re ane sê yê nâ Krayis, nne nnyo Obhasi a túmi se a bhá yim ngun á sém.

Jisos a chôt nchot ekʉ̂ nji yê a kí kpo

²¹ Ta ka ofú ábhi, Jisos a chə́bhe a sə́rá ágbán abhê jáé se, “N di ń jî nnyi Jerusarem. Tîk ane-akúí eték na ane-echî akará-agore Obhasi na atóŋá-ebhín á káre ə̂m ekpatə́m oseŋe. Tîk á yúi ə̂m, kən á kən ə̂m n kâ mfín ésá, tîk n nyə́me ka ekʉ̂.”

²² Kən Pita a bhiŋ yê mbá-njəm a fáme yê se, “Ntûfâm, ka kpó chot ntʉ́ghi nchot nnyí, Obhasi a kâ kâm se ejûm njí é fáp na we.”

²³ Jisos a kpíghi a nyân Pita se, “Satan, duî ə̂m ka ochî. O ri noŋ ejûm nji é gbʉ́a mbá amê, ka íkíkéré ifâ mfí a ri mfi ane ngun, mfi Obhasi asík.”

Kən ó kâm ntóbhá Jisos ó joá nan?

²⁴ Jisos a sə́re mân atóbhá abhê se, “Ájoé nne a kí wom a tóp ə̂m, deê a kép biji ibhê se kpe ejûm á ka fáp, a kə́n achî-achot, kpe é rî nji ekʉ̂, a tóp ə̂m.

²⁵ Echî aŋ? Kpe énê nnyo á woma se a nyáŋé ekpin ejê, a kí tane ńjə́ne. Kən nne nnyo á tane ekpin ejê ka obhô obhámé, a kí chəbhé njəm a fon ńjə́ne.

²⁶ Orʉrí obhâ a ri jen nji ó fon ngun ndə́m kən ó ka fon ekpin ejâ? Ka etʉri, ó kam ên sê kə́n nne a kô jen a yóŋe na ekpin ejê ka ngun nnyí?

²⁷ Ebhú é kə́ bha osí nji Mmon-i-ntem-nne a kə́ bha ka ejík í Ńsé owe na baénjel abhê. Ebhú á bha, a kí karé kpe énê ka ekpak etûm nji nne a yimî.

²⁸ Deê ń sə́ré ên bəre etʉ̂ ane á rî mfá ngyím mba tîk á bhó kpo ta á yén ebhú Mmon-i-ntem-nne a kə́ bha noŋ ekpatə́m í ntûfâm.”