Matiyu, echî 15 - Ejagham New Testament

Ntóŋé ane-atəm

¹ Etʉ̂ ane echəme Farasi na atóŋá-ebhín mba á dʉ̂ Jerusarem á bhak mbâ Jisos á bhə̂p yê sê,

² “Jen nji ane mba á tóbha wâ á bhó top ntóŋé ane-atəm? Á bhó su abhô kən á dí iyîm ka ekpak ebhín é fíi.”

³ Jisos a táme ábho se, “Jen é yími kən o kí maghé ên ebhín Obhasi o tóbhá ên a ri ejə́né?

⁴ Obhasi a toê se, jíghi ńsé owa na nnyen owa. Nne nnyo á chot nchot i mbí na ńsé kpe na nnyen, deê á yúí yê.

⁵ Kən o kí səre ên ane sê ájoé nne a fôn ejûm nji kə́n a kô a nyáŋe ńsé na nnyen kən a kére se, ‘Ée, ejûm njí a ri nji Obhasi,’

⁶ kpe nne a rô kpó jighi ńsé na nnyen ka ngyím ányi, nchot cháŋ. Na okpígha-ejûm ntʉ́ghi mbí o kí ko ên eyum Obhasi chichi, o tóbhá ên a ri erû ejə́né.

⁷ Ane áfúbhí! Nkara-otîp Obhasi nnyo á kamá se Asaya a chorê nchot eye ka echî a kpê na ên se Obhasi se,

⁸ ‘Ane mbá á jígha ə̂m ka nnyo-ńnyô, ḿbə́ŋé ábho cháŋ na mme.

⁹ Ejík na ekûp nji á kára ə̂m a ri chichi, ka á kpîk ane erû ngun sê a ri ejámé.’ ”

Bhaghé ejûm é bhak nne na akôp?

¹⁰ Jisos a bhîŋ ekam ane njí, a sə́re ábho se, “Yûk ên achot amámé, məŋê ên echî.

¹¹ Ejûm nji nne a kí di a kak ka oya asík é bhâk nne na akôp, a ri nji é fábha nne ka nnyo nâ é bhâk nne na akôp.”

¹² Kən atóbhá Jisos á bhâ bhə̂p yê sê, “Ó məŋe se ejûm nji o chorê áno é yam ane echəme Farasi a?”

¹³ Jisos a táme ábho se, “Kpe njə́n étí nji Ńsé omé ka ósô á ka bhe, á kí yəp á bhûm.

¹⁴ Ka kóŋ ên ábho, á rî noŋ atáná-amə̂t mba á kí kere sê á jóe ane-echî. Ebhú ntána-amə̂t yót a kí tʉ nnyo tat mbá, ábho chénchén á kí gbo ka ébhírí.”

¹⁵ Pita se, “Sə́re êt echî egan áji.”

¹⁶ Jisos a fáme kpá ábho se, “Nâ ên o nyə́ne o nə́má ên eróŋ a?

¹⁷ É nyə́ne é ká jae ên sê kpe njə́n ejûm nji é kí gye ka nnyo nne é jâk ka oya, é fâp ka ndə́p.

¹⁸ Kən ejûm nji é kí fap nne ka nnyo, é dʉ̂k yê ka ḿbə́ŋé. Ntʉ́ghi ejûm áji nâ é kə́ bha nne na akôp.

¹⁹ A ri ka ḿbə́ŋé nne nâ achot abhí noŋ oyúá-nne, ekun egboóm, achot akôp enuŋúm na ane, ejʉ̂, áfúbhí, na mbiŋ i ntem ebhíbhím, í dʉ̂k.

²⁰ Nâ ntʉ́ghi iyîm mbi í kə́ bha nne na akôp. Kən ka edíím édî, ó ka su abhô ekpak nji ábho á chóra, é bhó bha nne na akôp.”

Ḿbə́ŋé nnyi nne-nkáé yót a kíi na Jisos

²¹ Jisos a mághe eji áji, a jak ebhat etat kpírí-kpírí na nték i Taya na Sidon.

²² Nne-nkáé Kanan yót nnyo á kumá ebhat áji, a bhák mbâ eye, a gbô ka ekʉ̂ a kí rʉri. A sə́re Jisos se, “Ńsé, mmon i Debhit, fon nsôn na mme. Mmon omé nnyo nne-nkáé a ri ka ekpatə́m oseŋe mbi ojê ó kára yê.”

²³ Kən Jisos á ka támé kpe ejûm. Ane mba á tóbha Jisos á kí choe Jisos sê, “Bhîm nne-nkáé ányo a ji, ka a kí yim ejok kpe-eji.”

²⁴ Jisos a chôt se, “Ńsé omé a túmi ə̂m se ḿ bá nyáŋé ane Isrel átíŋ mba á rî noŋ obhúi mbi ó tan.”

²⁵ Nji Jisos a chorê nchot nnyí, nne-nkáé nnyó a bhâ gbô yê ka akát, a chôt se, “Ńsé, nyáŋe ə̂m.”

²⁶ Kən Jisos a táme yê se, “É ká nop sê nne a kə́n édî abhon a karé ojô, ó dí.”

²⁷ Nne-nkáé nnyó a fê fə́ne Jisos se, “Ńsé, nchot eya á ka ji nchík, kən kpe abhon akpât édî mma atúi-ofâm á dî kən á gbô ka nsi, ojô ó kí di.”

²⁸ Nji nne-nkáé nnyó a chorê nchot nnyí, Jisos a sə́re mân yê se, “We a ri nne-nkáé nnyo ó ki ḿbə́ŋé nnyen ekíím na Obhasi. Tîk n yîm ejûm nji o wóme ń káre wâ.” Ka nkúbhi ebhú áji, mmon i nne-nkáé ányo a sôn.

Jisos a yîm ane etî-etî á son

²⁹ Jisos a mághe eji áji, a jî sî mkpe aya Gariri. A gyʉ̂t a jî kúmi ka egúí.

³⁰ Nji a kumî, ane etî-etî á bhak mbâ eye na ane emaŋé. Mba abhə́né oo, atáná-amə̂t oo, akpóá-akát na kpe akpóá-abhô, achí na mkpak emaŋé etî-etî. Nji á kóe ane mbá á bhak áfo ka ochî Jisos, a yîm ábho chénchén, á sôn.

³¹ Ane á kêt nji á yéne achí á chəbhe á chorá nchot. Ane mba ebhú tat akát kpe abhô á kpo, iyîm mbí í chəbhe njəm ndə́m. Abhə́né á chəbhe á jená ejen, atáná-amə̂t á kí yen mbá. Ane chénchén mba á yéne nchot nnyí á káre nkat mbâ Obhasi ane Isrel.

Jisos a kpô karé édî mbâ ekpatə́m ekam ane

³² Jisos a bhîŋ ágbán abhê a sə́re ábho se, “Ḿ fon nsôn kpe-eji na ekam ane njí, ka á ka na mme mfín ésá égyé á ká kpo fon édî nji díím. Ń ka wóm ń tô ábho á kʉ́rí, á kâ bhâ oket njaé ka mbá.”

³³ Kən ane abhê á bhə̂p yê sê, “Tîk e fôn mân édî fan ka etə́m njí, nji é kí bhik ane mbá chénchén?”

³⁴ Jisos a bhə̂p ábho se, “O fonê ên nsûm i brêt é bhík?” Á táme sê, “Nsûm enígisá na mkpât osí.”

³⁵ Jisos a sə́re ekam ane njí se á kúmi okumí ka nsi.

³⁶ A kô mân nsûm i brêt nnyí enígisá na osí, a káre ekûp mbâ Obhasi. A bhêk a káre mbâ ágbán abhê se á kíri á káre ane chénchén.

³⁷ Chénchén ane á dî édî njí, á gyʉ́ri. Ágbán í Jisos á bhûp akpât édî mma á kə́re, á kâk bikáé í súi inígisá, moóp.

³⁸ É yighí ane-akáé na abhonche, mfan ane-arûm nnyi á díi édî áji a sî ejûm bəre ntem-esam ntə̂m-ntə̂m ófó (4,000).

³⁹ Jisos a sə́re mân ekam njí se á kʉ́rí nnyi nték ábho. Yê ḿfoné, a jî gyê okpi a jak ebhat í Magadan.