Matiyu, echî 13 - Ejagham New Testament

Egan í nyima-ebhin

¹ Nkúbhi ofú ábhi, Jisos a mághe njû ányi a jî kúmi ka mkpe aya se yê a kpí ane achot Obhasi.

² Ekam ane nji é bhâ fáre yê é kâk ka étíŋanti, é fâŋ eróŋ é chîŋ. Jisos a ruá mân a jî gyê ka okpi a kúmi. Ane mbá, á kə̂t ka mkpe aya.

³ A ri na ngan nâ Jisos a kóe a kpík ábho iyîm etî-etî. Kən a kí kpi ábho se, “Ofú bhə́t, nyima-ebhin yót a jak a jí bhe nkap ka ebhin ejê.

⁴ Ebhú a kí bhe nkap nnyí, aməghe mma tat á gbô ka mbá. Nnón ḿ bâ dî.

⁵ Etʉ̂ á gbô ka ngûm atáé-átáe. Á dʉ̂ etʉri-étʉ́ri áji, ka nsi á ka tí.

⁶ Kən njúí a kpo to a fáp, nkap nnyi ta a dʉ nná a kpô fép, ka arʉk á ká gye nsi nono.

⁷ Etʉ̂ á gbô ka ajoŋe, ajoŋe mmá á kúi na ḿmáne, á gbʉ́i nkap nnyí, kpe ekpak ekúúm cháŋ.

⁸ Etʉ̂ á gbô ka nsi nnyi no. Áma á kúi, á káre nkap. Nsə́n etat a kí karé aməghe kpe nsam érôn, nnyi tat nsam ésá, nnyi tat nsam na ófó.

⁹ Deê nne mân nnyo a fonê atûŋ mma á yugha mbá, a yúk.”

Echî nji Jisos á chorá nchot ka ngan a ri jen?

¹⁰ Ane mba á tóbha Jisos á bhâ bhə̂p yê sê, “Echî nji ó chorá nchot ka ngan a ri jen.”

¹¹ Jisos a táme ábho se, “Obhasi a káre ên aron se ó mə́ŋe ên ejûm ebhə̂t nji é rî ka otúi ósô, kən ane mba ngá, á ká karé.

¹² Echî aŋ? Nne nnyo a fonê ofon, á kí kpe yê é chíŋi mân obhô, kən yê nnyo á ka fon, kpe mkpât nnyi a fonê áno, á kí tabhé.

¹³ Echî mân nji ń chorá na ábho ka ngan é rî sê, ‘Ábho á kí kep ka etʉri, kən á bhó yen, á kí yuk, kən é bhó jae ábho.’

¹⁴ Ka ekpak njí, nchot i nkara-otîp Obhasi nnyo á kamá se Asaya a jóe ka etʉri. Asaya se, Obhasi a chorê se, ‘Tîk o kî ên atûŋ, kən ó bhó gyʉri ên nji á chóra. Tîk o kêp ên, kən ó bhó yen ên nji ó kebha ên.

¹⁵ Echî aŋ? Énə́mé é faŋ ane mbá ka ḿbə́ŋé é chiŋ, atûŋ ábho á kuŋ, mbá á ro yúk. Amə̂t ábho á tan. Áno asík, kə́n á mə́ŋe nji á yéna, á məŋe nji á yúgha. Énə́mé fə́ne é mân ábho ka íkíkéré á kpíghi mbâ amé, n yîm fə́ne ábho á sôn.’ ”

¹⁶ Kən Jisos se, “Ogyebhá-ḿbə́ŋé ó rî na ên kpe-eji. Amə̂t amə́né, á kí yen mbá. Atûŋ amə́né, á kí yuk.

¹⁷ Deê ń sə́ré ên bəre akará-otîp Obhasi etî-etî na ane Obhasi á nok sê á yén iyîm mbi ó yena ên nná mfá-mfá, kən á ká yen. Sê á yúk iyîm mbi ó yugha ên mfá-mfá, kən á ká yuk.”

Echî egan í nyima-ebhin

¹⁸ Jisos se, “Kî ên mân atûŋ, yûk echî egan í nyima-ebhin.

¹⁹ Ane mba á kí yuk otîp otúi Obhasi kən á bhó gyʉri, á rî noŋ nkap nnyi a gboê ka mkpe mbá. Á yûk otîp, kən Satan a bhâ yíghi ḿbə́ne ka ḿbə́ŋé ábho.

²⁰ “Nkap nnyi a gboê ka eji atáé-átáe nâ ane mba á yúghi otîp otúi Obhasi, á kô ḿbə́ne na ogyebhá-ḿbə́ŋé ntə̂m yə́t.

²¹ Kən otîp mbí ó bhó fon arʉk ka ḿbə́ŋé ábho. Ka obhô mbí, ó bhó ka. Ebhú sê kpe nchot kpe oseŋe ó fâp ka obhô otîp mbí, ane ntʉ́ghi mbá á kí yighí obhô ka ḿbə́ne ka ngyím ányi.

²² “Nkap nnyi a gboê ka ajoŋe nâ ane mba á kí yuk otîp Obhasi, kən íkíkéré ngun na ekot í ntí í bhó karé mbá otîp mbí ó kúi ka ḿbə́ŋé ábho.

²³ “Kən nkap nnyi a gboê ka nsi nnyi no a ri ane mba á kí yuk otîp Obhasi ó gyê ábho ka echî ó kúi ó kâp noŋ nkap nnyi a kí kap nsə́n etat a káre aməghe nsam érôn, etʉ̂ nsam ésá, nnyi tat esam na ófó.”

Egan í njé etat na énoê nkap

²⁴ Jisos a kpô sə́ré ane egan nji tat se, “Otúi Obhasi ó rî noŋ nne nnyo a kóe ejûm noŋ érési a bhê ka ebhin ejê.

²⁵ Atʉ́ mát, kpe énê a gyê ka eye njû, a núŋi. Nne-ebhan i nne nnyó a bhâ kô njé etat a bhê ka ebhin njí, a ruá.

²⁶ Ebhú iyîm mbí í kí dʉ, érési njí na njé nnyí, í dʉ̂ í kí kui fə́ne ebhú jə́t.

²⁷ Ágbán í mfone ebhin nnyó á kpô yén áno, á bhâ bhə̂p ńsé ábho se, ‘Ńsé, o bheê nná érési ka ebhin ejâ. Njé nnyí a kpó dʉ fan?’

²⁸ “Kən ńsé ábho a táme se, ‘Nne-ebhan omé nâ a yimî áno etûm áji.’ “Ágbán abhê á kpô bhə́p yê sê, ‘Kən e kâ jî é jí yə̂p njé nnyí, é yíghi a?’

²⁹ “A táme ábho se, ‘Maghê ên! Ájoé ó yim ên, ebhú tat tîk o chîŋ o yə̂p ên érési eróŋ.

³⁰ Maghê ên ebhin efʉʉ́m é sí. Ebhú é si, tîk afʉá-fʉ́á á râŋ mbá kpá á gbût njé ányi á yíghi, á bhôp ka ekpu á ríghi ka ngûn. Á man, tîk a kô mân érési á bhâ kî ka ókpáré obhámé.’ ”

Egan í nkap nnyi á kamá se mósta

³¹ Jisos a tûp egan nji tat a káre ábho se, “Otúi Obhasi ó rî noŋ nkap etat nnyi á kamá se mósta. Nne a kô a bhê ka ebhin ejê.

³² Ka chénchén nkap ka ngyím ányi, mósta nâ a chébhe a chîŋ ochíŋ kən á ko á bhê, a kí dʉ, a kúi, esə́n ejê é kí faŋ é chíŋi chénchén átí ka ńgyímí átí ányi. A chə́bhe étí nji é fáŋe é bhîk nji nnón ń kə́ bha ḿ bâ gbê ojû.”

Egan í ejûm ogyep etat nji á bhíŋa sê yîs

³³ A kpô túp egan etat a káre ábho se, “Otúi Obhasi ó rî noŋ yîs nnyi nne-nkáé a kí yim brêt a kô a kpê na fráwa brêt, a chə́bhe ta a nʉ̂t a súi ngûm.”

Jisos a kí kpi ane ka ngan

³⁴ Jisos á chorá mbâ ekam ane a ri ka ngan. Á bhó chot nji á ka túp ka ngan.

³⁵ Á yimá erû njí ka eyimím eyum í nkara-otîp Obhasi éməné é jóe ka etʉri. A chorê se, “Ebhú n kí chot nchot na ábho, tîk n chorá a ri ka ngan. Tîk n sə́re ábho iyîm mbi ta ebhú ngun a róghe ane á ká məŋé.”

Jisos a sə́re echî egan í njé etat

³⁶ Jisos a mághe mân ekam ane njí, a gyê ka njû. Ágbán abhê á bhâ bhə̂p yê sê a sə́ré ábho echî egan í njé.

³⁷ Jisos a táme ábho se, “Nne nnyo a bheê érési a ri Mmon-i-ntem-nne.

³⁸ Ebhin ejê nâ ngun. Érési a ri ane mba á fóne otúi Obhasi. Ajé a ri ane Satan.

³⁹ Nne-ebhan nnyo a bheê njé nnyí a ri Satan yê ḿfoné. Ofú ebhin efʉʉ́m a ri ofú mbi ngun nnyí a kí man. Ane mba á kí fʉ a ri baénjel.

⁴⁰ “Ekpak á kí chuí ajé mmá á ríghi ka ngûn nâ fə́ne ekpak nji é kí joé ka ofú ngun a kí man.

⁴¹ Tîk Mmon-i-ntem-nne a tûm baénjel abhê á jî yíghi ane mba á chóa atem á yimá obhí ka ngun nnyí é kpê na chénchén mba á yíma obhí ábho áfoné.

⁴² Á chəmé ábho chénchén, a kí bhum ka erəmta-ngûn, a mághe ábho áfo á kə̂t á rʉra ekpatə́m ekʉ̂, á dik akek.

⁴³ Kən ane Obhasi tîk á yâk noŋ njúí ka otúi Ńsé ábho. “Nne nnyo a fonê atûŋ, deê a yúk.”

Egan í ntí mmi á bhə́re

⁴⁴ Jisos se, “Otúi Obhasi ó rî noŋ ntí mmi nne a sə́me nsi a bhə̂t ka ebhin. Nji nne etat a jiî a jî yên ntí mmí, a kpô tuk asi a bhúi. É gyébhe yê kpe-eji, a jâk a jî gúri iyîm ibhê chénchén ka njû, a kô ntí a nâm ebhin áji.”

Egan í ntáé etat nnyi á kpok ntí

⁴⁵ Jisos se, “Otúi Obhasi ó rî noŋ njena-ogəm nnyo a kí wom ekpak í ntáé etat nnyi á kpok ntí se yê a nam.

⁴⁶ Nji a yéne yə́t nnyi a nobhê a chîŋ ochíŋ, a jak ka njû eye a jî gúri kpe bhaghé ejûm ejê, a kô ntí a nâm ńnyə́ne.”

Egan í ntûfúk

⁴⁷ Jisos se, “Otúi Obhasi ó rî fə́ne noŋ ntûfúk nnyi á túbhi ka aya, nsí kpe nnyə́n kpe nnyə́n, a kô.

⁴⁸ Ebhú á túbhi ntûfúk nnyí, osí ó gyê ó súi, atúbhá-túbhá á kí tʉ ńnyə́ne á gyʉ̂t ka ngun, á jî kúmi á sâŋ osí mbí, á kî ka ngûm ébháe. Nnyen osí mbi á wóme á kí kak ka iyîm ábho, á bhûm mbi á ká wom.

⁴⁹ Ekpak njí jə́t nâ é kí joé ka ofú ngun a kí man. Baénjel á kə́ bha á bhâ sâŋ ane abhí á yíghi ka ekam ane ano.

⁵⁰ Á kí bhum ane abhí ka erəmta-ngûn. Nji á bhúmi nná ábho ka ngûn, á kí kət á rʉra ekpatə́m ekʉ̂, á dik akek.”

Emané nchot

⁵¹ Jisos a bhâ bhə̂p mân ábho se, “Nâ-ngá o ri ên ágo o məŋá ên iyîm mbi ń chorá nná a?” Á kâm sê ábho á kí məŋé.

⁵² Jisos a chôt mân se, “É fap sê kpe nnyón ntóŋa-ebhín nnyo a kpíi a mə́ŋe nchot otúi Obhasi a ri noŋ mfone njû nnyo a kí yighí iyîm mbi í kpóe ntí, kpe mbi fê, kpe mbi tə̂m, ka mmon-i-njû nnyo yê a kíi, a tóŋé ane.”

Á jiŋ Jisos ka eték ejê Nasaret

⁵³ Nji Jisos a jeghê ngan eye etúbhúm, a mághe eji njí.

⁵⁴ A chə́bhe njəm ka eték ejê, a jî gyê ka óchâm Obhasi a kí kpi ane. Ane mba á yúghi yê á kə̂t á chorá ábho-ábhô sê, “Ntʉ́ghi mbí oməŋá-ejûm ó dʉ̂ fan? A kóe ikom mfí fan a yimá ntûm okpógha-biji nnyí?

⁵⁵ Mmon i nkúma-njû nnyó nná asík á? To nnyen owe a ri Meri? Cháŋ abhon-í-nnyen abhê a ri mba Jems na Jusep na Simun na Juda a?

⁵⁶ Ḿfa asík nâ chénchén abhon-í-nnyen abhê mba ane-akáé á kúma a? Mbá nnyi yê a fonê mân chénchén aron mmá na ikom mfí a ri fan?”

⁵⁷ Á bhâ jîŋ mân yê na oyámá-ḿbə́ŋé. Kən Jisos a sə́re ábho se, “Ejík í nkara-otîp Obhasi kpe jə́t cháŋ nji é dʉ̂k ka eték ejê na ndə́p-i-njû eye.”

⁵⁸ Jisos á ka yim ntûm okpógha-biji etî-etî ka eték ejê, ka ane abhê á ká ki ḿbə́ŋé na yê.