Matiyu, echî 11 - Ejagham New Testament

Jisos na Jon nnyo mfúgha-ane-ayép

¹ Nji Jisos a jeghê esə́rə́m ágbán abhê ófó na ábháe achot mmá chénchén, a mághe eji áji a jená a kpík achot Obhasi mbâ ane ka nték nnyi a kpíri áfo.

² Jon nnyo mfúgha-ane-ayép a ri ka ókúmí ka ebhú njí. A yûk esə́re Krayis, nne nnyo Obhasi a túmi se a yim ngun á sém. A yûk esə́re ntûm nnyi á yimá. A tûm mân etʉ̂ atóbhá abhê

³ á bhá bhə́p Jisos sê, “Nâ-ngá we a ri nkúbhi nne nnyo á sə́ra nná sê tîk a bhák, kən é wóm nnyo tat?”

⁴ Nji á bhâ bhə́bhe Jisos, a táme ábho se, “Choŋ osə́ré ên Jon achot mma ó yen ên, na mma ó yuk ên.

⁵ Ó yen ên atáná-amə̂t á yen mbá, abhə́né á rui ngyím, amaŋá-ofunum á son, ayághá-atûŋ á kí yuk mbá, ane mba á kpóe á chəbhe njəm ka ekpin, akpák ane á yuk otîp ogyebhá-ḿbə́ŋé Obhasi.

⁶ Deê ogyebhá-ḿbə́ŋé ó jóe na nne nnyo á ka kéré se a ri ejûm ísonê nji a chə̂m na mme.”

⁷ Nji ágbán í Jon á mághe á kí ji, Jisos a bhə̂p ekam ane nji é rî áfo na yê achot í Jon se, “Ebhú nji o maghê ên o jî kpúghi Jon ka etə́m, o kére ên sê tîk o yên ên jen? O kére ên sê o kí ji ó jí yén ên nne noŋ kpe ńjé egomé nnyi a kí neŋ a jak ngá a jak ńgô ka ekpak nji mfêp a kí nok a? Ée!

⁸ O jiî ên mân, o jiî oyén ên jen? Nne nnyo a gúŋi nnyen oguŋi obhê a? Ée! Ane mba á kágha énoê oguŋi mbí á kúma ka ókʉ́rí atúi-ofâm.

⁹ O jiî ên mân, ó jí yén ên jen? Nkara-otîp Obhasi a? Nâ nji o jiî oyén. Deê ń sə́ré ên mân bəre nne nnyo o jî yên ên a fâŋ a chíŋi nkara-otîp Obhasi.

¹⁰ Nan? Ḿfa nâ nne nnyo á séŋe nná sê Obhasi a chorê se, ‘Ńgyê, n kí tum ḿgbán omé a raŋ mbá, a jí tʉrí ngûm a kí wâ.’

¹¹ Deê ń sə́ré ên bəre kpe nne yót cháŋ nnyo á jíi a fâp ka ngun nnyí kən a fâŋ mbiŋ a sî Jon nnyo á fugha ane ayép. Kən nne nnyo kə́n á kêp sê kpe ejûm á ka fáp ka otúi Obhasi, a fâŋ a chíŋi Jon.

¹² É róghé ta ka ebhú Jon nnyo mfúgha-ane-ayép ta é si égyé, otúi Obhasi ó kí ji ochî na ikom. Ane fə́ne mba á wóma na ḿbə́ŋé-a-ḿbə́ŋé sê á gyé, á kí nok na ikom.

¹³ Echî aŋ? Ebhín í Mosis na akará-otîp Obhasi éróghé ta ka ebhú áji ta é sî ebhú Jon, á chóra achot á kpek na otúi mbí.

¹⁴ Ájoé ó bhó firi ên, Jon a ri Erayija nnyo á chóre ta éməné sê tîk a bhák.

¹⁵ Nne mân nnyo a fonê atûŋ mma á yugha mbá, deê a yúk.

¹⁶ “N kí gaé abhon ebhú njí na jen? Á rî noŋ abhonche mba á kûn ka éré ogəm, ekam jə́t á kí kpoŋe na nji tat sê,

¹⁷ ‘É kon nkôn ogyebhá-ḿbə́ŋé nnyi ebháé, ó ka bhə́n ên. É kon maná kpe okʉ́gane, ekʉ̂ ó ka rí ên.’

¹⁸ Nji Jon a bháe, a kák njaé noŋ ejík mbâ Obhasi, aməm á bhó gwo. Á chə́bhe á chorá sê ojê nâ ó kará yê oseŋe.

¹⁹ Kən mme, Mmon-i-ntem-nne, ḿ ba, n kí di, n gwók. Ane á chə́bhe á chorá sê, ‘Yên ndûm i ndígha-édî nnyó, mgbogha-aməm ejûm í nchane. Otem obhê, á yimá a ri na abhə́bhá-ntí-echî na ane abhí.’ Kən deê ń sə́ré ên bəre ane á kí məŋé oməŋá-ejûm Obhasi ka etûm nji Obhasi á yimá.”

Nték nnyi á ká ki ḿbə́ŋé na Obhasi

²⁰ Jisos a róghe mân efámám nték nnyi yê a yîm ntûm okpógha-biji a tî a chîŋ ochíŋ. Echî aŋ? Ane nték ányi á ká maghé obhí ábho.

²¹ A chôt se, “Eték í Korasi, tîk é bhîp na ên é tî é chîŋ. Ên ane Besayida eróŋ, tîk é bhîp na ên é chîŋ. Echî aŋ? Ekpatə́m í ntûm okpógha-biji nnyi á yími ka nték eyəné, á yími ka nték i Taya na Sidon eê, kə́n ebhú njí ane nték ányi á kak ányaghé-ḿfô á jóme atôŋ ka biji noŋ eriŋ sê ábho á maghe obhí ábho.

²² Deê ń sə́ré ên bəre ka ofú mbi Obhasi a kí toŋ ngun tîk a fôn nsôn na ane Taya na Sidon, a chíŋi ên.

²³ Ên ane Kapanom, o kérá ên tîk sê á kí ko ên sê ó faŋ ên ó chiŋ ochíŋ a? Baram! Á kí ko ên ńgô sê ó ka bhik ên kpe ebhighím. Ntûm okpógha-biji nnyi á yími ka eték ejə́né, á yími ka Sodom eê, kə́n eték áji é nyə́ne ta é si égyé.

²⁴ N kí səre ên bəre ka ofú mbi Obhasi a kí taŋ ngun, a kí fon nsôn na ane eték í Sodom, a chíŋi ane eték ejə́né.”

Bhák ên mbâ amé, bhá yoê ên biji

²⁵ Ka ebhú áji, Jisos a kí goré Ńsé owe se, “Ńsé, Ntûfâm ósô na nsi, ń kup wâ kpe-eji, ka ó bhət iyîm mbí mbâ ane mba á kera sê á məŋe, kən ó rəbhe ó toŋe mbâ ane mba á ká məŋé.

²⁶ Ńsé, ḿ məŋe bəre ńji é dʉ̂ ka okorá-ḿbə́ŋé obhâ.

²⁷ “Ńsé omé a mághe iyîm chénchén ka obhô obhámé. Kpe nne yót nnyo a məŋê ekpin í Mmon cháŋ, é ká chiŋi Ńsé átíŋ. Nne fə́ne kpe yót nnyo a məŋê ekpin í Ńsé cháŋ, é ká chiŋi Mmon na ane fə́ne mba Mmon a sáŋe se á mə́ŋe Ńsé owe.

²⁸ “Kpe énê mân nnyo a kə̂n echóé oseŋe ejê a kêt, deê a bhá mbâ amé, mme tîk n káre yê oyoá-biji.

²⁹ Kam ên na okpígha-ejûm obhámé. Tôp ên erû ejámé, ka mme m fonê ekpin í nyamḿ, biji ḿ bó yuŋ na obhigha-biji ka ekpin ejámé. Tîk o fôn ên oyoá-biji.

³⁰ Etûm nji n kí karé ên é ká son kpe esonóm. Echóé nji n kí chi ên é bhó yup kpe eyúbhúm.”