Mak, echî 7 - Ejagham New Testament

Ntóŋé ane-atəm

¹ Ane Farasi na etʉ̂ atóŋá-ebhín mba á dʉ̂ ka Jerusarem, á bhâ fáre Jisos á kâk ka étíŋanti.

² Á yên sê etʉ̂ atóbhá abhê á bhó su ábho kən á dí iyîm. Nâ é fap se á ká yim ka ekpak erû ábho é tóŋe.

³ Ane Jus ndə́m, títí mba echəme Farasi, á tóbha ntóŋé ane-atəm ábho. Kən á dí édî, á kí su abhô ka ebho ntóŋé ane-atəm.

⁴ Á ji ogəm á chə́bhe njəm, á bhó di nji á náme ta á sû ka ebho ntóŋé ábho. Á kîk bibhín mbi tat etî-etî, noŋ nne a kí su akuni na akpere na abhí.

⁵ Ane echəme Farasi na atóŋá-ebhín á bhə̂p mân Jisos sê, “Jen nji ane mba á tóbha wâ á bhó top ntóŋé ane-atəm? Echî nji á dîk édî na abhô akôp, á bhó yim noŋ ebhín é fíi a ri jen?”

⁶ Jisos a táme ábho se, “Ka ebhú éməné, Asaya a chôt nchot eye ka ekpak a yéne. Ên a ri ane áfúbhí ka etʉri noŋ Asaya a séŋe se, Obhasi a toê se, ‘Ane mbá á jígha ə̂m ka nnyo-ńnyô, ḿbə́ŋé ábho cháŋ na mme.

⁷ Ejík na ekûp nji á káre ə̂m a ri chichi, ka á kpîk ane erû ngun sê a ri ejámé.’ ”

⁸ Jisos a sə́re mân ábho se, “Ó maghe ên bibhín mbi Obhasi, ó chəbhe o tóbhá ên mbi ngun.”

⁹ A sə́re ábho se, “Ó fon ên énoê mbá nnyi o kí maghé ên bibhín Obhasi, o fik ên ibhə́né.

¹⁰ Mosis a sə́re se, ‘Jíghi ńsé owa na nnyen owa. Nne nnyo á chot nchot i mbí a kpê na ńsé kpe na nnyen, deê á yúí yê.’

^11-12 Kən o kí kpi ên ane sê ájoé nne a fôn ejûm nji kə́n a kô a nyáŋe ńsé na nnyen, kən a kére se, ‘Ée, ejûm njí a ri ejûm Obhasi,’ kpe a rô kpó nyaŋe ásé abhê, nchot cháŋ. Ka ekpak njí, ó gbʉi ên ane sê á kâ kpô nyáŋé ásé ábho.

¹³ Na ntʉ́ghi okpígha-ejûm mbí, o kí ko ên eyum Obhasi chichi. Njok iyîm í rî mbi o kí yim ên.”

Iyîm mbi í kára nne akôp

¹⁴ Jisos a kpô bhiŋ ekam ane njí a sə́re se, “Yûk ên nchot amé chénchén ên, məŋê ên echî.

¹⁵ Kpe ejûm jə́t cháŋ ka ngun nji nne á di, é yimá yê a foná akôp. A ri ejûm nji é kí fap nne ka nnyo, nâ é yimá yê a foná akôp. [

¹⁶ Ájoé nne a fôn atûŋ mma á yugha mbá, deê a yúk.]”

¹⁷ Nji Jisos a maghé ekam ane njí a chə́bhe njəm ka njû, atóbhá abhê á bhə̂p yê sê a sə́ré ábho echî egan ejê.

¹⁸ Kən a bhə̂p ábho se, “Toŋ nâ noŋ ó nəma ên?” A róghe mân ábho esə́rə́m se, “Ó ka məŋé ên sê kpe ejûm jə́t cháŋ ka ngun nji nne á di, é yimá yê a foná akôp a?

¹⁹ Nan? Kpe jen nji nne á di, é bhó ji yê ka ḿbə́ŋé. É jâk ka oya, kən nne a kí nye ka abhə̂ŋ.” Ka echoróm njí, a sə́re se, édî kpe njə́n é rî nono.

²⁰ A jak ochî na nchot eye se, “Nchot nnyi a kí karé nne akôp, á dʉk nne ka ḿbə́ŋé.

^21-22 Echî aŋ? A ri ka ḿbə́ŋé nne nâ íkíkéré ibhí chénchén í kí dʉ. Ḿfə́ne nâ í chóa yê a yimá achot akôp enuŋúm na ane, ejʉ̂, oyúá-nne, ekun egboóm, ofî, ndibhí ka mkpak ka mkpak, áfúbhí, achot akôp, ekébhém ntem amə̂t abhí, óríghi, esaŋ na énə́mé.

²³ Mkpak achot nnyí fép a kí dʉ nne ka ḿbə́ŋé. Ńnyə́ne fə́ne nâ á yimá nne a foná akôp.”

Ḿbə́ŋé nnyi nne-nkáé yót a kíi na Obhasi

²⁴ Jisos a mághe mân eji áji, a kí ji ebhat í Taya. A jî gyê ka njû yə́t ka ebhə̂t, ka á ka wóm se ane á mə́ŋe sê yê a ri ka eték. Kən ekpak ebhə́rə́m cháŋ.

²⁵ Nne-nkáé yót nnyo ojê ó kára mmon owe nnyo nne-nkáé oseŋe, a yûk se Jisos a ri ka eték. Kpe ebhú á ka bhíbhí, a bhák a bhâ gbô yê ka akát.

²⁶ Nne-nkáé nnyó a ri nne Jus asík. A dʉ ebhat í Siriya ka eték nji é káma sê Fonesiya. Nji nne-nkáé nnyó a gboê nná Jisos ka akát, a góre yê se a ji a jí yighí ojê ábhi ka ḿbə́ŋé mmon.

²⁷ Jisos a táme nne-nkáé nnyó se, “Deê abhon á dí á gyʉ́rí kpá, ka é ká nop sê a kə́n édî abhon a karé ojô ó dí.”

²⁸ Kən nne-nkáé nnyó se, “É rî ka etʉri, kən kpe ojô mbi ó rî ka óséré étí-édî, ó dik akpât édî abhon mma á gbóe ka nsi.”

²⁹ Jisos a sə́re mân yê se, “Ó tame nchot eya nono. Nâ choŋ mân kʉ́ri, ojê ábhi ta ó maghe mmon owa.”

³⁰ Nnyo nne-nkáé nnyó a chə́bhe fə́ne njəm ka njû. A jî yên mmon owe a nuŋ ka ébhúní, ojê mbí ta ó maghe yê.

Jisos a yîm nchí a chôt nchot

³¹ Jisos a mághe ebhat í Taya, a chîŋ Sidon na ebhat í Ntek Ofo, a bhák ebhat aya Gariri.

³² Etʉ̂ ane á kô nne nnyo mbá, á bhó yuk, nchot nono, á bhó chot, á bhak mbâ eye. Á góre yê sê a kəmé yê abhô ka biji emaŋé é mân.

³³ Jisos a kô nne nnyó a mághe ekam njí, a jak ka eji átíŋ. A sôk indəré ka atûŋ í nne nnyó, a fə̂m ason, a râŋ fə́ne erə́bhe ejê.

³⁴ A yûŋ echî a kêp ósô a sóme chóót. A chôt se, “Efata.” Nâ é fap se “Rəbhê.”

³⁵ Ka ngyím ányi, atûŋ í nne nnyó á rə́bhe, erə́bhe ejê fə́ne é kpât, a róghe fə́ne nchot nono echoróm.

³⁶ Jisos a káre mân ane mbá ebhín se á kâ yîm ane á mə́ŋe ejûm nji é fábhe. Kən kpe ntə̂m ébhík-ébhík nnyi Jisos a karê ane ebhín se á kâ sə́re ntûm eye, nâ ekpak fə́ne nji á kóna á fará ka ngûm.

³⁷ Biji í mân ane chénchén mba á yúghi esə́re njí kpe-eji. Á chə́bhe á chorá sê, “A yîm iyîm, a jéghe, ka eji a yîm fə́ne nyágha-atûŋ a yûk mbá, nchí, a chôt nchot.”