Mak, echî 5 - Ejagham New Testament

Jisos a yîm nne nnyo nchəme-ojê á noghá yê a sôn

¹ Jisos na ane mba á tóbha yê á yáŋe njəm aya Gariri, kpáát á jî sî ka ebhat Gerasin.

² Ebhú jə́t nji Jisos a fábhe ka okpi, nne-ndûm yót nnyo nchəme ojê á kará yê oseŋe, a dʉ ka ebhat ayəm-áyə̂m a bhák mbâ eye.

³ Chénchén ebhú nne-ndûm nnyó á kumá ka ngûm ayəm. Kpe nne cháŋ nnyo kə́n a kpô fi yê a bhôp na mkpokobhé.

⁴ Ntə̂m etî-etî á fi yê, á bhop akát, á bhop abhô. Kən kpe bhaghé ebhú a kí joghe mkpokobhé nnyí ka abhô na akát, a ruá. Kpe nne nnyo a sonê a bhîk yê efiím cháŋ.

⁵ Na atʉ́ na efín, nne nnyó á bhuŋa ka ngûm ayəm, a jená a gyʉ́rá agúí a bhərá, a kúghá a bhómá biji na atáé.

⁶ Nji nne nnyó a yéne Jisos a kə́ bha ńgô, a bhéne a jî bhə́ne yê ka akát.

⁷ A kûk káŋ káŋ káŋ se, “Wóó Jisos, Mmon Obhasi ósô! Ó woma jen na mme? Ka mbiŋ Obhasi, ń gore wâ, ka kpə́re ə̂m.”

⁸ Echî nji á chorá áno é rî sê Jisos ta a kí səre ojê mbí se ó fáp ó mághe nne-ndûm nnyó.

⁹ Jisos a bhə̂p mân yê se, “Mbiŋ eya á kamá jen?” Nne-ndûm nnyó se, “Mbiŋ amé a ri Nchəme-ojê, ka é ti otí.”

¹⁰ Kən á ka re egoróm Jisos a kâ bhîm ábho á mághe eji áji.

¹¹ Ekpatə́m ekam akûk é rî áfo é dik édî ka mkpe egúí.

¹² Nchəme-ojê nnyí á góre Jisos sê a túm ábho á gyé akûk mmá.

¹³ Jisos a kâm. Nchəme-ojê nnyí á mághe mân nne-ndûm nnyó á jî gyê akûk mmá. Akûk mmá á bhéne á bhə̂t ḿkpábhé egúí, á jî gbô ka aya á tân. Mfan akûk á kí si ejûm bəre ntem-esam ntə̂m-ntə̂m érôn.

¹⁴ Nji nchot nnyí a fábhe, ane mba á bhábha akûk áma á bê á jak nnyi eték. Á jak ka eték na mbin chénchén á fáre. Ane á jak á jí yén ejûm nji é fábhe.

¹⁵ Ebhú á síi mbâ Jisos, á yên nne nnyo nchəme-ojê á noghá yê nná, a sóbhe biji a kúmi áfo na nnyen i ḿbə́ŋé eye. Efup é yîm chénchén ábho kpe-eji.

¹⁶ Mba á yéne oyén na amə̂t á sə́re ane nji é fábhe na nne-ndûm nnyó. Á sə́re fə́ne ekpak é fábhe é kpê na akûk mma á rî áfo.

¹⁷ Nji ane á yúghi nchot nnyí, á róghe Jisos egoróm sê a maghé ebhat eték ábho.

¹⁸ Ebhú Jisos a kí gye ka okpi, nne nnyo nchəme-ojê a karê nná yê oseŋe a góre se a tóp yê.

¹⁹ Kən Jisos á ka kam. A sə́re yê se, “Chəbhê njəm mbâ ane abhâ, choŋ osə́ré ábho énoê etûm nji Ńtâ Obhasi a yimî a káre wâ na ekpak nji a rî wâ nsôn.”

²⁰ Nne ányo a mághe mân a jak. A jên a fáre Ntek Ofo nnyi a ri ka ebhát áji, a sə́re ejûm nji Jisos a yimî a káre yê. Biji í kpô ane chénchén kpe-eji.

Jisos a sʉ̂k mmon i Jayirus nnyo a kpóe, a yîm fə́ne nne-nkáé nnyo á maŋá emaŋé a sôn

²¹ Jisos a chə́bhe njəm a yáŋe njəm aya mmá. Ekpatə́m ekam ane á fáre yê á kâk ka étíŋanti.

²² Nne-echî ka óchâm Obhasi yót a kamá se Jayirus, a yên yê a bhâ gbô yê ka akát.

²³ A góre na ḿbə́ŋé-a-ḿbə́ŋé se, “Mmon omé nnyo nne-nkáé a kí maŋé kpe-eji. Ítəbhé, bhá kəmê yê na obhô obhâ a son, a kâ kpô.”

²⁴ Jisos a yə̂p mân a kí ji na yê. Ane etî-etî á bhúi yê áfo, á kí top á jak.

²⁵ Nne-nkáé yót a ri áfo nnyo á maŋá emaŋé nji agyʉ́ŋ á fábha yê ka biji. Emaŋé áji é nok yê ka nyâ ófó na ébháe.

²⁶ A yên oseŋe ka emaŋé njí kpe-eji, a jên ojû-ajân a fáre. A bhíbhi ntí ḿ man, kən kpe echî na ndə́p á ka yén, emaŋé é nyígha onyíghí.

^27-28 Nne-nkáé nnyó a yûk esə́re Jisos. A jak mân njəm-ńjə̂m a jî chə̂m ane mba á tóbha yê. A kâm ka ḿbə́ŋé eye se yê á nok a kə́me kpe nkʉ̂-ńkʉ̂ nnyi Jisos, tîk yê a sôn. A dâŋ fə́ne ta a jî kə́me nkʉ̂ nnyi Jisos,

²⁹ agyʉ́ŋ áma á kími ka ngyím ányi. Mfone a yûk se emaŋé ejê é man.

³⁰ Ka ngyím ányi, Jisos a ríŋi se ikom í fap yê ka biji, a fáre amə̂t a kêp, a bhə̂p se, “Énê a kəmê nkʉ̂ amé?”

³¹ Kən atóbhá abhê sê, “Ó yen ekam ane mba á fáre wâ á kâk ka étíŋanti. Nan kən o kí bhəp nne nnyo a kəmê nkʉ̂ eya?”

³² Kən Jisos á ka yúk nnyi ábho, a kébhá, yê a yén nne nnyo a kəmê yê.

³³ Nji nne-nkáé ányo a riŋî nji é fábhe na yê, a bhák na efup a bhâ gbô Jisos ka akát, a sə́re yê chénchén, kpe ejûm á ka bhə́t.

³⁴ Jisos a sə́re yê se, “Mmon omé, ḿbə́ŋé eya nnyi o kíi na Obhasi, a yîm wâ o sôn. Deê Obhasi a joé na we, biji í nâ wâ, o kâ kpô maŋé.”

³⁵ Nji Jisos a nyə́ne áno a chorá mbâ nne-nkáé ányo, ágbán etat á bhak nnyi mbâ njû Jayirus, á sə́re Jayirus se, “Mmon owa a kpô. Ka kpó yui biji o kará ńsé oseŋe.”

³⁶ Jisos, kpe echî á ka kak na ábho, a sə́re Jayirus se, “Ka fûp, kî a ri ḿbə́ŋé na Obhasi.”

³⁷ Jisos á ka kam kpe nne yót a tóp yê, é ká chiŋi Pita na Jems na mmon-i-nnyen owe Jon.

³⁸ Á yə̂p á jên kpáát á sî ka njû Jayirus. Nji á síi ágo, Jisos a yên onyʉk mbi ó rî, a yên ane noŋ á kúgha á rʉra.

³⁹ A gyê ka njû ányi a bhə̂p ábho se, “Jen ên kpá títí, echî onyʉk mbí a ri jen? Ó kughá ên o rʉ́rá ên jen? Mmon nnyó á ka kpó okpó, á yaá a ri eyô.”

⁴⁰ Ane mba á rî áfo á yóe yê amə̂ŋ. Kən Jisos a bhîm ábho á fâp ka éré. A bhîŋ ńsé na nnyen i mmon ányo, é kpê na ágbán abhê mbá ásá, á gyê á jak ka eji nji á núŋi mmon nnyó.

⁴¹ A fî mmon ányo ka obhô a chôt se, “Tarita koum,” nâ é fap se, “Mmon i nsop, n kí səre wâ, duî ngyím.”

⁴² Nsop ányo á tə̂m a rúi ngyím ntə̂m yə́t, a róghe ejeném, a fará, ka ta a sî nyâ ófó na ébháe ebhú áji. Nji Jisos a yimî ejûm njí, biji í kpô chénchén ane mba á rî áfo.

⁴³ Jisos a káre ábho ebhín se á kâ yîm kpe nne yót a məŋé. A sə́re ábho se á káre nsop ányo édî a dí.