Mak, echî 15 - Ejagham New Testament

Jisos ka ochî Piratus

¹ Na ofú-ofú, ane-echî akará-agore Obhasi na ane-akúí eték na atóŋá-ebhín na echəme Atáŋá-eték ndə́m á kúbhi á bhôp Jisos na mkpokobhé á kô á jî káre mbâ Piratus ntûfâm eték.

² Piratus a bhə̂p yê se, “We nâ o ri ntûfâm ane Jus a?” Jisos a táme se, “Nn̂, é rî ka ekpak o chorê.”

³ Ane-echî akará-agore á nyére Jisos achot etî-etî.

⁴ Piratus a kpô bhə́p yê se, “Nâ-ngá o yúghá achot mma á sə́ra sê ó yim a? Ejûm nji o kí tame cháŋ a?”

⁵ Kən Jisos kpe ejûm á ka támé. Biji í kpô Piratus kpe-eji.

Piratus a nyére indəré se á yúí Jisos

⁶ Eyâ kpe njə́n ka ebhú Erom í Ntə̂m Osʉ́ŋ, ntûfâm eték a kí yighí nne-nne nnyo ane Jus á wóme ka ókúmí.

⁷ Ka eyâ njí, nne yót a ri ka ókúmí nnyo á kamá se Barabas. Barabas na ane etat á gyée ókúmí ka obhô onyʉk etat mbi ó fábhe ka eték ta á yúi ane oyúí.

⁸ Ekam ane é bhak mbâ Piratus sê a yighí nne ka ókúmí ekpak nji yê á yimá ka ebhú erom njí.

⁹ A bhə̂p ábho se, “Ó woma ên sê ń yíghi ntûfâm ane Jus ka ókúmí a?”

¹⁰ Piratus a mə́ŋe se ane-echî akará-agore á fíi Jisos á bhak, ka é kí yam ábho nji ane etî-etî á tóbha Jisos.

¹¹ Ane-echî akará-agore á kâk ane akát ka nsi sê á sə́ré Piratus a yighí Barabas ka ókúmí ka eji Jisos.

¹² Piratus a bhə̂p mân ekam ane njí se, “Ó kí wom ên n yîm mân nan na nnyo ó bhiŋá ên sê ntûfâm ane Jus?”

¹³ Á kûk káŋ káŋ káŋ sê, “Kúm yê ka ego.”

¹⁴ Kən a bhə̂p ábho se, “Nne nnyó a yimî bhaghé obhí?” Kən ekam ane njí á róghe ekughúm na ikom-ikom sê, “Kúm yê ka ego.”

¹⁵ Piratus ngá á ka wóm nchot a fáp yê na ane mbá, a bhâ yíghi Barabas ka ókúmí. A káre ikom se á tə̂m Jisos á kó á jí kúm ka ego.

Ane-enok á kak Jisos ntuŋ

¹⁶ Ane-enok á kô Jisos á gyê ka etím ókʉ́rí ntûfâm eték. Á bhíŋa ókʉ́rí mbí sê Pratoriyum. Á bhîŋ chénchén atem mba ngá á chə̂m ábho. Nsam ábho a chíŋi kpe érôn.

¹⁷ Á kâk yê ébhí nkʉ̂ etat, á tʉ́ri itam ajoŋe-ájóŋe á kə́bhe yê.

¹⁸ Á róghe yê mân ekúbhúm ka okagha-ntuŋ sê, “E kí kup wâ, Ntûfâm ane Jus!”

¹⁹ Á kô ítí á bhura yê ka echî, á chok yê ason, á təma arúŋ ka nsi ka ochî obhê nâ á kí jighi ntûfâm.

²⁰ Á kpó to á mân okagha-ntuŋ mbí, á yíghi yê ébhí nkʉ̂ nnyí. Á kô eye ḿfô á kâk yê. Á jak mân sê á jí kúm yê ka ego.

Á kum Jisos ka ego

²¹ Nji á jâk ka mbá, á kpúghi nne eték í Sirin yót nnyo á kamá se Simun, a jak nnyi Jerusarem. Á kô ego njí mbâ Jisos á káre yê sê a kə́n, a kô fə́ne a kə̂n. Simun a ri ńsé Areksanda na Rufus.

²² Á kô Jisos á sî ka eji nji á bhíŋa sê Gogota, nâ se Ékə́p-Echî.

²³ Nji á síi, á dâŋ sê á káre Jisos aməm etat mma á kághe njân etat sê máya, a gwó, kən á ka gwó.

²⁴ Á kûm mân yê ka ego. Á kô ḿfô eye, á tûp ebháŋé á mə́ŋe ekpak á kí kiri á káre kpe énê ejê.

²⁵ Ńkánínká a síi kpe érôn-énî nnyi ofú kən á kûm yê ka ego.

²⁶ Á sêŋ ejûm nji a yimî kən á kûm yê, á yághe ka ego ejê. Á séŋe sê, “Ḿfa a ri ntûfâm ane Jus.”

²⁷ Á kûm fə́ne anyághá-ajʉ̂ ábháe ka ofú ábhi na yê, kpe nnyón ka ejê ego. Yót á tə̂p mkpe obhô-orûm í Jisos, nnyo tat mkpe obhô-okáé. [

²⁸ É fap fə́ne noŋ ekpak nji á séŋe ka nwet Obhasi sê, “Tîk á sə́re sê yê a ri nyima-obhí eróŋ.”]

²⁹ Achíŋá-mbá mba á síi áfo, á mêk na echî á kí tu sê, “Iyâ, we se o kí bhibhi ókʉ́rí achot Obhasi o gbê mbi tat ka mfín ésá.

³⁰ Bhət ka ego, sém máná!”

³¹ Ane-echî akará-agore Obhasi na atóŋá-ebhín á gyê yê fə́ne ntuŋ ekaghám, á chorá á kamá ábho-ábhô sê, “A yîm ane etat á sema, kən biji ibhê á ka bhik oyim.

³² Deê é yén kpá noŋ Krayis nnyó, se ntûfâm ane Isrel, a kí bhət ka ego njí. Á bhət, e kí kam mân sê Obhasi nâ a túmi yê.” Kpe anyághá-ajʉ̂ ábháe mba á kúmi nná na Jisos, á gyê yê etúúm eróŋ.

Jisos a kpô

³³ Nji ńkánínká a síi ófó na ébháe nnyi nchên, njúí a tân. Ejírim é bhúi eték ndə́m tata a sî ésá nnyi egu.

³⁴ Nji ńkánínká ésá a síi, á kpó to á yúk Jisos a kûk káŋ káŋ káŋ se, “Eroi, Eroi, lámá sabatani.” Nâ se, “Obhasi omé, Obhasi omé, o jiŋî ə̂m jen?”

³⁵ Nji etʉ̂ ane mba á gyím áfo á yúghi noŋ a kúghi, á chôt sê, “Yûk ên, a kí bhiŋ Erayija.”

³⁶ Nne yót nnyo a ri áfo, a bhéne a jî kô égúsá a bhôp ka echî ítí, a bhî ka ekâ aməm a yûŋ a tə́me Jisos ka nnyo se a sót. A chôt se, “Deê é chîk é yén kpá ájoé Erayija tîk a bhák a bhâ yíghi yê ka ego njí.”

³⁷ Jisos a kpô kúk káŋ káŋ káŋ, a bhî ḿbə́ŋé, a kpô fə́ne.

³⁸ Ebhú a kpóe, íkpéghé mfi á bhúi ka nnyo-mbá ókʉ́rí achot Obhasi í yâ mbat ébháe, é róghe ka ósô ta é si esə́n.

³⁹ Ebhú ntûfâm ane-enok nnyo a gyím ka eji ego a yéne ekpak Jisos a kpóe, a chôt se, “Ka etʉri, nne nnyó a ri Mmon Obhasi.”

⁴⁰ Ane-akáé mba tat á gyím nyáŋé-nyáŋé á yena achot mma á fábhe. Ka ane-akáé mbá, Meri nnyo Madarin a ri, Meri nnyo nnyen i Josis na Jems nnyo mmonche a ri, Sarome fə́ne a ri.

⁴¹ Ane-akáé mbá á tóbha Jisos ebhú a ri ka Gariri, á kaghá yê obhô ka etûm ejê. Etî-etî ane-akáé á kûn fə́ne áfo mba á bháe na Jisos nnyi Jerusarem.

Jusep a kə̂n Jisos

⁴² Egu é kpó si ka ofú ane á kí tʉrí biji ofú oyoá-biji ntem-ofú,

⁴³ nne Arimatiya etat a kamá se Jusep a jak noŋ nne-ndûm mbâ Piratus se a karé yê ikom yê a yighí ékpoê biji Jisos ka ego. Jusep a ri nne nnyo a fonê ejík ka echəme Atáŋá-eték. Á chighá fə́ne mbôp nnyí se otúi Obhasi ó bhá.

⁴⁴ Kən Piratus a kpo yúk se Jisos ta a kpô, biji í kpô yê kpe-eji. A bhîŋ ntûfâm ane-enok a bhə̂p ájoé a kpô.

⁴⁵ Nne nnyó a kâm. Piratus a sə́re mân Jusep se a jí yighí Jisos a kə́n.

⁴⁶ Jusep a jak mân a jî nâm ébháré-éfô, a jî yíghi Jisos ka ego, a bhôp ka éfô njí a jî kə̂n ka oyəm. A chóe mân ekpatə́m í ntáé a bhúi ka oyəm mbí. Á sə́me oyəm mbí noŋ otáé ka eránám.

⁴⁷ Meri nnyo Madarin na Meri nnyo nnyen i Josis á gyím áfo, á yên eji nji á núŋi Jisos.