Mak, echî 11 - Ejagham New Testament

Jisos a gyê eték í Jerusarem na ekpatə́m ejík

¹ Nji Jisos na atóbhá abhê á jen á kí kpiri Jerusarem, ka nték i Befagi na Betani, á bhâ ka Egui Orif. Nji á síi áfo, Jisos a tûm ágbán abhê ábháe ochî.

² A tíbhi ábho se, “Choŋ ên ka mmon eték nnyo a ri áno mbá-ochî. Ebhú ó si ên ágo, tîk o yên ên ekpak í mfoŋ-anyanyâ etat nnyi eguŋi. Á bhóbhe ńnyə́ne ka étí kən nne á ka nok obhéné, kpât ên kó bhák.

³ Ebhú nne á bhəp ên se jen é yími kən o kí kpat ên, sə́ré ên yê sê ntûfâm a kí wom a bhéné ka ńnyə́ne kən tîk a chə́bhe njəm a fê mfá-mfá.”

⁴ Ane mbá á yə̂p á jak á jî yên fə́ne mfoŋ nnyí á bhop ka echî njû etat ka mkpe mbá. Nji á kpára,

⁵ ane etat mba á gyím áfo á bhə̂p ábho sê, “Ágo nâ jen? O kí kpat ên mfoŋ ane ó jî ên fan?”

⁶ Kən atóbhá Jisos mbá á táme ane mbá ka ekpak a sə́re ábho kən á mághe ábho á jak na mfoŋ ányi.

⁷ Á kô ńnyə́ne á bhak mbâ Jisos, á kô ḿfô ábho á sóbhe ńnyə́ne fép. Jisos a gyʉ̂t ka njəm, a yə̂p a kí gye Jerusarem.

⁸ Ane etî-etî á yáe ḿfô ábho ka mbá nnyi Jisos á jená á jak, etʉ̂ á gbût amâŋ-obhî ka etə́m á bhâ tûp ka mbá.

⁹ Ane mba á jéna nná á jak na yê, etʉ̂ mbá-ochî, etʉ̂ mbá-njəm, á róghe ekúghúm na ogyebhá-ḿbə́ŋé á jak sê, “Ekûp na ejík é jóe é káre Obhasi. Deê enare Ńtâ Obhasi é jóe na nne nnyo a kə́ bha ka mbiŋ eye.

¹⁰ Deê enare Obhasi é jóe na otúi ńsé owəré Debhit mbi ó kə́ bha. Ekûp na ejík é jóe é káre Obhasi ósô.”

¹¹ Nji Jisos a gyée Jerusarem, a jak ka ókʉ́rí achot Obhasi, a kêp ngûm a fáre. A kpô yén se ebhú é ji, a yə̂p a jak nnyi Betani na ágbán abhê ófó na ábháe.

Jisos a tâ étí-nkap eyum

¹² Ntem-ofú nji á mághe Betani á kí chəbhé njəm, njaé a róghe Jisos eyámám.

¹³ A kpo to a túp amə̂t ńgô, a yên étí fîk na ájé kəbha-kəbha. A yáre a jí kep ájoé é kap, yê a bhóŋ a dí. Kən nji a síi ágo, á ka yén kpe ejûm é ká chiŋi ajé áma ḿmáne-mmanê, ka kpe ebhú nkap asík.

¹⁴ A chôt mba étí njí se, “É róghé ka égyé ta ó kə́t, o kâ kâp ane á dí.” Nji a chorê áno, ágbán abhê á yûk.

Jisos a gyê ka ókʉ́rí achot Obhasi

¹⁵ Nji á síi ka Jerusarem, Jisos a jî gyê ka ókʉ́rí achot Obhasi. A kpo to a gyé, a yên ane ogəm, mba gurúm á gurá, mba namám á namá. A gyê ábho ebhíbhím. A chóe iyîm mbi ane mba á jéna ogəm í ntí eyóŋóm, a tûp ka nsi, na ḿfə́m ane mba á gúra mbʉ́í.

¹⁶ Á ka kam se nne a kə̂n ejûm kpe jə́t a gbút a yaŋé ka etím ókʉ́rí.

¹⁷ A róghe mân ane ekpíím achot se, “Á séŋe sê Obhasi se, ‘Tîk á bhîŋ njû amé sê eji nték i ngun chénchén á kára ə̂m agore.’ Kən ó kpighi ên ńnyə́ne a chə́bhe njû anyághá-ajʉ̂.”

¹⁸ Ane-echî akará-agore Obhasi na atóŋá-ebhín á yûk nchot eye nnyí, kən á fôn efup kpe-eji. Echî aŋ? Okpígha-ejûm obhê ó yim ekam ane ndə́m nji á tóbha yê á fon okpógha-biji. Á róghe mân enóróm mbá nnyi á kí yui yê.

¹⁹ Egu é kpó si, Jisos na atóbhá abhê á mághe eték í Jerusarem.

Eriŋ nji é rî ka étí-nkap nji é kpóe

²⁰ Na ofú-ofú, Jisos na atóbhá abhê á yə̂p á kí chəbhé njəm ka mbá nnyi ábho á chíŋi kən á gyê Jerusarem. Á tûp amə̂t ńgô, á yên étí fîk nji Jisos a táe nná eyum, é kpo fép na arʉk-arʉk.

²¹ Kən Pita a tît, a kpêt Jisos a tóŋe se, “Ńsé, ńgyê étí nji o táe nná eyum, é kpo é man.”

^22-23 Kən Jisos a táme ábho se, “Deê ń sə́ré ên bəre ó ki ḿbə́ŋé na Obhasi, o kí bhik enyánám egúí njí se é jî gbô ka aya. Ájoé ó ka fon efup ka ḿbə́ŋé, kən o kâm se Obhasi tîk a yîm nji o chorê a káre wâ, a kí yim ka etʉri.

²⁴ Ka echî nji aŋ, n kí səre ên bəre ebhú o kí goré Obhasi se a nyáŋé ên kpe ka ejûm, kî ên ḿbə́ŋé se ta ó fon ejûm áji, Obhasi a kí karé ên kpe jen nji o bhə́bhe ên áno.

²⁵ Ebhú ó gyimi ên o kí goré ên Obhasi, ri ên nsôn gyinî obhí chénchén mbi ane á yími ên. Ó yim ên áno, Obhasi Ńsé owəné ka ósô, tîk a rî nsôn a sû mbi o yimî ên yê. [

²⁶ Ájoé ên ó bhó ri ên nsôn ó gyíni ên obhí atem, Ńsé owəné Obhasi fə́ne ka ósô á bhó ri nsôn a sû mbi o yimî ên yê.]”

Á bhəp Jisos mbâ a kóe ikom

²⁷ Nji á chə́bhe njəm nnyi Jerusarem, Jisos a kí jen ka etím ókʉ́rí achot Obhasi. Ane-echî akará-agore Obhasi na atóŋá-ebhín na ane-akúí eték á bhak mbâ eye.

²⁸ Á bhə̂p yê sê, “O fonê bhaghé ikom kən o kí yim iyîm mbí? Énê a karê wâ ḿfə́ne?”

²⁹ Kən a táme ábho se, “Deê ḿ bə́p ên ebhə̂p jə́t. Ebhú ó tame ên, tîk n sə́re ên ekpak ikom mfi m fonê kən n kí yim ntûm nnyí.

³⁰ Sə́re ên ə̂m ikom mfi Jon a fonê a fúghá ane ayép, í dʉ̂ mbâ Obhasi kən mbâ atem-ane?”

³¹ Ane mbá á róghe efírím ábho-ábhô sê, “E kí fe yê ebhə̂p njí nan eé? Ájoé é tame sê Obhasi nâ a karê Jon ikom, a ri a bhə́p echî nji e rô kam na Jon.

³² Kən é to sê atem-ane, ekpatə́m í nchot tîk a fâp.” Á fóne efup, ka kpe énê a kâm se Jon a ri mfoné-mfoné nkara-otîp Obhasi.

³³ Á táme mân Jisos sê, “É ka məŋé.” Jisos a táme fə́ne ábho se, “Mme eróŋ, ḿ bó səre ên mbâ ikom ifámé í dʉ̂ kən n yimá ntûm nnyí.”