Luk, echî 9 - Ejagham New Testament

Jisos a tûm ágbán abhê ejen

¹ Jisos a bhîŋ ágbán abhê ófó na ábháe a káre ábho ikom na ḿbə́ŋé se á bhím ojê chénchén mbi ó nógha ane, á yimá fə́ne mba á máŋa omaŋé á soná.

² A yíghi ábho a tûm se á jên ka ngûm á səra esə́re otúi Obhasi, á yimá ane á soná.

³ Kən á jî, Jisos se, “Ó jak ên áno ejen njí, ka kə́n ên kpe ejûm noŋ ítí-ejen, kpe ntâk-ejen, kpe édî, kpe ntí, kpe nkʉ̂ nnyi tat o kâ kə̂n ên.

⁴ Ó si ên ka eték á fî ên na ogyebhá-ḿbə́ŋé, kumî ên ka njû yə́t kpát ta o mághe ên eték áji.

⁵ Eték nji á ká fi ên na ogyebhá-ḿbə́ŋé, maghê ên ńjə́ne. Ebhú o kí maghé ên, bhûk ên ebhəm nji é rî ên ka akát. Ńji tîk é jóe noŋ eriŋ nji ó tʉ ên ane eték áji obhô ka otûŋ.”

⁶ Ágbán mbá á yə̂p mân á jak. Á jên á fáre nték na nték, á səra otîp ogyebhá-ḿbə́ŋé otúi Obhasi. Kpe á jíi fan, á yimá ane bimaŋé á soná.

Erot á ka məŋé nne nnyo Jisos a ri

⁷ Erot nnyo ntûfâm i Gariri a kí yughâ chénchén achot mma á fábha, kən é ká tʉrí ojáé yê. Echî é rî sê ane mba tat á kí səre sê Jon nnyo á fugha ane ayép a chə́bhe njəm ka ekpin.

⁸ Mba tat sê Erayija a kpô bhá. Kən etʉ̂ sê ebhú tat Jisos a ri nkara-otîp yót ka éməné nâ a chəbhê njəm a bhák ka ekpin.

⁹ Kən Erot a bhə̂p biji se, “Mme ḿfoné nâ n karê ikom á gbût echî Jon, nnyo ḿ kpok nná oyúk a dʉ fan?” A kə̂t mân a wómá ekpak nji yê a kí yen Jisos.

Jisos a káre édî mbâ ekpatə́m ekam ane

¹⁰ Ágbán í Jisos á chə́bhe njəm nnyi ejen á bhâ sə́re yê ekpak nji ejen é chíŋi. A kô ábho á jak ka eték etat nji á bhíŋa sê Besayida, nne etat á ka tóp.

¹¹ Kən nji ane á yúghi, á róghe yê etóbhóm. Jisos a tábhe ábho na ogyebhá-ḿbə́ŋé, a gyê ábho achot otúi Obhasi ekpíím, a yimá mba á rî na bimaŋé á soná.

¹² Ebhú ta njúí a kí tan, ágbán abhê ófó na ábháe á bhâ sə́re yê sê a to ane chénchén á jî ka nték nnyi a ri áfo kpírí-kpírí, á jí nót édî na ngûm ekâ, ka eji áji eték cháŋ.

¹³ Kən Jisos a sə́re ábho se, “Ên áfoné, karê ên ábho iyîm á dí.” Kən ágbán abhê sê, “Ejûm nji e fonê mfá é ká chiŋi nsûm i brêt érôn na nsí ébháe. Áfo nâ e kí ji onam édî mbâ ekpatə́m ekam ane njí chénchén a?”

¹⁴ Ane-arûm ka ekam á rî ntem-esam ntə̂m-ntə̂m ófó na ébháe na ejûm (5,000). Jisos a sə́re ágbán abhê se á tô ane á kúmi ka nkam ka nkam. Ekam jə́t deê é jóe ejûm noŋ nsam ane ébháe na ófó.

¹⁵ Ágbán mbá á yîm fə́ne ka ekpak nji a sə́re ábho. Ane chénchén á kúmi okumí.

¹⁶ Jisos a kô mân brêt nnyí érôn na nsí ébháe a fî, a yûŋ echî ka ósô a káre ekûp mbâ Obhasi. A yâ brêt na nsí nnyí a káre mbâ atóbhá abhê se á kíri á káre ane.

¹⁷ Chénchén ane á dî édî njí á gyʉ́ri. Ágbán í Jisos á bhûp akpât édî mma á kə́re, á kâk bikáé mbi yúp í súi ófó na íbháe.

Pita a sə́re ekpak í nne nnyo Jisos a ri

¹⁸ Ebhú jə́t nji Jisos a ri yê átíŋ a kí goré Obhasi, ágbán abhê á bhak mbâ eye. A bhə̂p ábho se, “Ane á sə́ra sê mme a ri bhaghé ekpak í nne?”

¹⁹ Ágbán abhê á táme sê, “Etʉ̂ ane á kí səre sê we a ri Jon nnyo mfúgha-ane-ayép, mba tat sê we a ri Erayija. Etʉ̂ fə́ne sê nkara-otîp yót ka mba éməné a chə́bhe njəm ka ekpin.”

²⁰ Kən Jisos a bhə̂p mân ábho se, “Ên áfoné, ó məŋe ên sê mme a ri énê?” Pita a táme yê se, “We a ri Krayis, nne nnyo Obhasi a túmi se a bhá yim ngun á sém.”

²¹ Nji Pita a chorê nná, Jisos a tʉ̂ ábho obhô ka otûŋ se á kâ sə́re kpe nne yót nchot nnyí.

Jisos a chôt nchot ekʉ̂ nji yê a kí kpo

²² Jisos a sə́re mân ágbán abhê se, “Mmon-i-ntem-nne a ri a yén ekpatə́m oseŋe. Ane-akúí eték na ane-echî akará-agore Obhasi na atóŋá-ebhín á rî á jîŋ yê. Ane á rî á yúí yê. Kən á kən yê, a kâ mfín ésá, tîk a nyə́me ka ekʉ̂.”

Ńgyímí nnyi ntóbhá Jisos Krayis á fik

²³ Jisos a sə́re mân ane mba á rî áfo chénchén se, “Ájoé nne a kí wom a tóp ə̂m, deê a kép biji ibhê se kpe ejûm á ka fáp, a kə́n achî-achot chénchén ofú, kpe é rî nji ekʉ̂, a tóp ə̂m.

²⁴ Echî aŋ? Kpe énê nnyo á woma se a nyáŋé ekpin ejê, a kí tane ńjə́ne. Kən nne nnyo á tane ekpin ejê ka obhô obhámé, a kí chəbhé njəm a nyáŋé ńjə́ne.

²⁵ Orʉrí obhâ a ri jen nji ó fon ngun ndə́m, kən ó ka fon ekpin ejâ, o táne ńjə́ne? Ekəp cháŋ.

²⁶ Ájoé nne a kí be nsôn nji á chəm na mme, é kpê na okpígha-ejûm obhámé, Mmon-i-ntem-nne tîk a bê nsôn fə́ne a kâ chə̂m na ntʉ́ghi nne ányo ka ebhú nji á bha na ejík ejê na nji Obhasi Ńsé na nji baénjel abhê.

²⁷ Deê ń sə́ré ên ka etʉri bəre etʉ̂ ane á rî mfá ngyím mba tîk á bhó kpo ta á yên otúi Obhasi mbi ó kə́ bha.”

Ochî Jisos na ḿfô biji í kpíghi

²⁸ Ogəm ó chîŋ kpe bhə́t nji Jisos a chorê achot mmá fép. A bhâ kô Pita na Jon na Jems á jâk ka ósô egúí etat á jí góre Obhasi.

²⁹ Nji Jisos a rî áfo a gorá, ochî obhê ó kpíghi, ḿfô eye ka biji a chə́bhe a bhárá kpóŋ.

³⁰ Ka ngyím ányi, ane ábháe á chə̂m yê áfo, á kubhá na yê. Ane mbá a ri Mosis na Erayija.

³¹ Á bháe na ekpatə́m ejík Obhasi, á kubhá na Jisos ekpak a kə́ bha okpó ka Jerusarem, a jeghé ejûm nji Obhasi a wóme.

³² Nji ejûm njí é fábha áno, baPita á rî ka ekpatə́m eyô. A kpó nyəmé, á yên Jisos na ejík, na ane ábháe á gyím na yê.

³³ Nji ane mbá á kí maghé, Pita a sə́re Jisos se, “Ńsé, é nop êt e ri mfá. Deê é gbê ntəm ésá, jə́t mbâ eya, nji tat mbâ Mosis, nji tat mbâ Erayija.” Pita á ka məŋé ejûm nji yê á chorá áno.

³⁴ Nji Pita á chorá áno, átʉ́k í ngurobhú á bhak á bhâ bhúi ábho. Efup é gyê baPita nji á yéne sê átʉ́k í ngurobhú á bhúi ábho.

³⁵ Eyum é fâp ka átʉ́k áma se, “Ḿfa a ri Mmon omé nnyo n sáŋe, yûk ên yê.”

³⁶ Eyum é kpó to é chôt, baPita á yéna Jisos a kə̂t yê átíŋ. Ágbán abhê á kî chénchén achot ka ḿbə́ŋé á ká səre kpe nne ebhú áji ejûm nji ábho á yéne.

Jisos a yíghi ojê mbâ mmon etat

³⁷ Ntem-ofú, Jisos na baPita á kí bhət egúí áji, ane etî-etî á bhak mbâ eye.

³⁸ Nne yót ka ekam njí a bhîŋ se, “Ńsé, ítəbhé, ńgyê mmon omé nnyo nne-ndûm yót nnyo m fonê.

³⁹ Ojê ó kí karé yê oseŋe. Ebhú ojê mbí ó rui yê ngyím, a kí kuk, a nîk nnyam ta mfî a fábhá ka nnyo. Ó bhó maghé yê kpít ó kí yim yê a gbok a gyémá biji.

⁴⁰ Ń gore bəre ágbán abhâ á yíghi ojê mbí, kən á ká məŋé ekpak eyimím.”

⁴¹ Jisos a fáme ane chénchén mba á rî áfo se, “Abhon ebhú nji, obhí jen na ên? Echî ó bhó ki ên ḿbə́ŋé na Obhasi a ri jen? Ó woma ên sê ta ń ká nan na ên? Ń kúmi na ên ka nyâ é bhík? Bhák ngá na mmon owa.”

⁴² Nji nne nnyó a kóe mmon a kə́ bha, ojê mbí ó rúi yê ngyím, ó yîm yê a nîk nnyam, a gbô ka nsi. Jisos a nyân ojê mbí, mmon nnyó a sôn. A kô yê a káre mbâ ńsé owe.

⁴³ É kpô ane biji kpe-eji nji á yéne ekpatə́m ikom mfi Obhasi a fonê. É nyə́ne é maná ane biji na chénchén iyîm mbi Jisos á yimá. A bhâ sə́re ágbán abhê se,

Jisos a kpô chot nchot ekʉ̂ ejê

⁴⁴ “Ka gyíni ên ejûm nji ḿ bak nná ên osə́ré. N kí səre ên bəre tîk á fî Mmon-i-ntem-nne, á káre ane ngun.”

⁴⁵ Kən nchot nnyí á ka jáé ágbán abhê, ka a ri ka ebhə̂t, á nyə́ne kpá á ká məŋé. Kən á kí fup yê ebhə́bhə́m a sə́re echî.

Nne nyúp ka ekam ejə́ré nâ énê?

⁴⁶ Ágbán í Jisos á róghe efírím ábho-ábhô nchot i nne ábho nnyo kə́n á kô sê nne-echî.

⁴⁷ Jisos a mə́ŋe íkíkéré ábho, á bhîŋ mmonche a gyími yê ka mkpe biji.

⁴⁸ A sə́re mân ágbán abhê se, “Kpe énê nnyo á fi mmon ntʉ́ghi nnyó a kâk ka biji ka mbiŋ amé, a fiî ə̂m áno. Nne nnyo á fi ə̂m, á ka fi ə̂m mme átíŋ, a fî fə́ne yê nnyo a túmi ə̂m ka nsi nnyí. Məŋê ên mân sê nne ka ekam ejə́né nnyo o kí kep ên sê kpe ejûm á ka fáp nâ a ri a joé ntûfâm owəné fép.”

Énê nâ a ri nne owəné?

⁴⁹ Jon a sə́re Jisos se, “Ńsé, e yên nne etat a kí yighí ojê ka óbhə́ŋé ane ka mbiŋ eya, kən e táŋe yê sê a kâ kpô yim, ka á ka joé nne owəré.”

⁵⁰ Kən Jisos se, “Ka kpó taŋé ên nne kpe yót, ka nne nnyo á ka gyímí akát í nchot na ên a ri nne owəné.”

Eték í Samariya á ká wom Jisos

⁵¹ Mfín a kí kpiri nnyi Jisos a kí chəbhé njəm nnyi ngun Obhasi, a tími se yê a kí ji Jerusarem. A jak fə́ne.

⁵² A tûm ane ochî ka eték ebhat í Samariya se á jî tʉ́ri iyîm chénchén á kí kən yê a bhá.

⁵³ Kən ane eték áji á ká kam Jisos a gyé eték, ka a timî Jerusarem ejiím.

⁵⁴ Nji ágbán abhê ábháe, Jems na Jon, á yéne ejûm njí, á bhə̂p Jisos sê, “Ntûfâm, deê é yîm ngûn ḿ bá nnyi ósô ń díghí ane mbá a?”

⁵⁵ Kən Jisos a bhî ábho amə̂t ka biji, a sə́re ábho se á kâ yîm.

⁵⁶ Á chîŋ mân á jak eték etat.

Ane mba á kí wom á tóp Jisos

⁵⁷ Nji á jéna á jak, nne yót a sə́re Jisos se, “Kpe ó jak fan n kí top wâ.”

⁵⁸ Jisos a táme yê se, “Ebhi é fon mfúk imê, inón í fon njû eye, kən Mmon-i-ntem-nne á ka fon eji ekâ.”

⁵⁹ A sə́re mân nne etat se, “Tôp ə̂m.” Kən nne ányo a sə́re Jisos se, “Ntûfâm, ta n kə̂n kpá ńsé omé kən m bák.”

⁶⁰ Jisos a táme yê se, “Deê akə́bha-nsi á kə́n nne ábho. We choŋ osə́ré ane otîp Obhasi.”

⁶¹ Nne nnyo tat a sə́re Jisos se, “Ntûfâm, tîk n tôp wâ, kən deê kpá ń jí típ ndə́p-i-njû amé.”

⁶² Jisos a táme yê se, “Nne nnyo á róghe ebhin ekpaŋám kən a kə̂t a kébhá mbá-njəm, á ka bhik ka etûm otúi Obhasi.”