Luk, echî 5 - Ejagham New Testament

Jisos a sâŋ ndaŋa-mbá ane ánî á jóe ágbán abhê

¹ Ofú bhə́t Jisos a gyím ka mkpe aya Gariri, ane á nyoghá biji sê á sí yê, á yúk esə́re Obhasi.

² Jisos a yên akpi ábháe, á sət áfo ka egae, ayúá-osí mba á fóne akpi mmá á rî fə́ne áfo á kí su atû-ofúk ábho.

³ Jisos a jî gyê ka etím okpi bhə́t. Nne nnyo a fonê á kamá se Simun. A sə́re Simun se a bhúghí a maghé mkpe mkpât. Jisos a kúmi mân ka okpi mbí a kpík ane nchot Obhasi.

⁴ Nji a manê ekpíím ane, a sə́re Simun se, “Kpô bhúghí okpi obhâ ó sí ebhat í ndûm aya. Ó si ên ágo, we na ane abhâ bhi ên atû-ofúk amə́né, tʉrî ên biji ó wúbhí ên osí.”

⁵ Kən Simun a táme yê se, “Ńsé, é yim etûm mfá atʉ́ ndə́m, kpe ejûm é ka wúbhí, kən ka eji o toê se ń túp ntûfúk amé, tîk n tûp.”

⁶ Á tûp atû-ofúk ábho, á wúbhi osí ó tî ó chîŋ obhô. Atû-ofúk ábho á woma ekímím.

⁷ Mba Simun á kpó yen osí ó tî ó chiŋ obhô, á bhîŋ atem ábho mba á rî ka okpi mbi tat á bhá nyáŋé ábho. Atem mbá á bhâ chə̂m na ábho, á wúbhi osí á kâk ka akpi mmá ábháe, akpi á kə̂t kpít na eterém.

⁸ Nji Simun nnyo á kamá fə́ne se Pita a yéne ntʉ́ghi ejûm njí, a jî bhə́ne Jisos ka akát a sə́re yê se, “Ntûfâm, n kí goré wâ bəre ó mághe ə̂m ó jî eya mbá, ka mme a ri nyima-obhí.”

⁹ A chôt áno ka é mân Simun na atem abhê biji kpe-eji ka ntʉ́ghi osí mbi ábho á wúbhi.

¹⁰ Abhon í Sebedi ábháe, Jems na Jon ka atem í Simun, biji í mân ábho eróŋ kpe-eji na ejûm nji á yéne. Kən Jisos a sə́re Simun se, “Ka fûp, é róghé ka égyé, tîk o tʉ̂k ane á tóbha ə̂m.”

¹¹ Mba Pita á jî tə́me mân akpi ábho ka egae, á mághe chénchén iyîm, á tôp Jisos.

Jisos a yîm mmaŋa-ofunum yót a sôn

¹² Ebhú jə́t Jisos a sî eték etat. Nne yót a ri ka eték áji nnyo ofunum ó ko biji fép. Nji nne nnyó a yéne Jisos, a gbô yê ka akát, a góre yê se, “Ntûfâm, ka okorá-ḿbə́ŋé obhâ, yim ofunum obhámé mbí ó mân, n kâ kpô fon akôp.”

¹³ Jisos a tóne obhô obhê a kə́me yê, a chôt se, “Ń kot, deê ofunum obhâ ó mân.” Ka ngyím ányi fə́ne, ofunum mbí ó mân.

¹⁴ Jisos a káre nne nnyó ebhín se, “Ka sə́re nne kpe yót ejûm nji é fábhe. Choŋ mbâ nkara-agore Obhasi a kép wâ, karê ekəp ka ekpak nji ebhín í Mosis é fíi. Ńji tîk é tóŋe ane se ofunum obhâ ó man, ó ka kpó fon akôp.”

¹⁵ Kən esə́re Jisos é nyíghi mân onyíghí, é jên é jábhe ngûm. Ane etî-etî á bhak mbâ eye. Etʉ̂ á bhâk sê á bhá yúk esə́re Obhasi, mba tat sê á bhá Jisos a yîm ábho á son.

¹⁶ Kən kpe na njok ane mbá, Jisos a kí maghé a jî wôm eji a jóe yê átíŋ, a góre Obhasi.

Jisos a yîm mbə́né a sôn

¹⁷ Ofú bhə́t Jisos a kí kpi ane achot Obhasi. Etʉ̂ atóŋá-ebhín na ane echəme Farasi mba á dʉ̂ Jerusarem na ebhat í Judiya na abhon í nték chénchén ebhat í Gariri, á kûn áfo. Ikom í Ńtâ Obhasi í rî na yê, kpe bhaghé emaŋé a kí yim é mân.

¹⁸ Etʉ̂ ane á bhak mba á kə́ne mbə́né etat ka ekpa. Á nôk sê á gyé ka etím í njû, á jí kí mbə́né nnyó ka ochî Jisos.

¹⁹ Kən á ká fon mbá, ka ane á ti á chiŋ. Ane mbá á kə̂n mbə́né nnyó á gyʉ̂t ka ósô ebhui, á wúmi mfúk ka ebhui njí á bhî yê na ekpa ejê ta a sî Jisos nnyo a gyím ka étíŋanti ekam ane.

²⁰ Nji Jisos a yéne se á ki ḿbə́ŋé ábho na Obhasi a sôn, a sə́re mbə́né nnyó se, “Ntem, n dî wâ nsôn, n sû obhí obhâ.”

²¹ Atóŋá-ebhín na ane echəme Farasi mba á rî nná áfo á róghe echoróm ka óbhə́ŋé ábho sê, “Bhaghé énê nná kpá títí nnyo á chorá noŋ yê a ri Obhasi? Obhasi átíŋ nâ kə́n a rî nsôn, a sû obhí nne.”

²² Kən Jisos a mə́ŋe íkíkéré ábho, á bhə̂p ábho se, “Jen nji o kí fon ên ekpak íkíkéré mfí?

²³ Jen nji é rî wát, esə́rə́m nne nnyó se, ń di nsôn ń su obhí obhê, kən nji ń sə́ré yê bəre a ruí ngyím, a ji a kʉ́rí?

²⁴ N kí toŋe ên mân bəre Mmon-i-ntem-nne a fôn ikom mfá ka nsi mfi a kí ri nsôn a sû obhí ane.” A sə́re mân mbə́né nnyó se, “Mme nâ ń səra wâ áno bəre ó rúi ngyím, ó kə́n ekpa ejâ ó kʉ́rí.”

²⁵ Mbə́né nnyó a tə̂m fə́ne a rúi ngyím ntə̂m yə́t, ábho chénchén á yena, a kə̂n ekpa nji yê a nuŋ nná, a jên na akát a kʉ́rá, a kará nkat mbâ Obhasi.

²⁶ Biji í kpô chénchén ane mbá kpe-eji, efup é gyê ábho, á róghe nkat ekarám mbâ Obhasi sê, “Achot mma e yéne égyé, á chíŋi obhô.”

Jisos a sâŋ Libhayi a joé ḿgbán owe

²⁷ Nji achot mmá á chíŋi, Jisos a mághe eji njí, a jî yên mbə́bha-ntí-echî yót á kamá se Libhayi. Nne-ndûm nnyó a kun ka njû etûm eye. Jisos a sə́re yê se, “Duî ngyím, tôp ə̂m.”

²⁸ Libhayi a rúi fə́ne ngyím a mághe iyîm ibhê chénchén, a kí top Jisos.

²⁹ A bhâ fî mân ekpatə́m erom ka njû eye se yê a jíghí Jisos. Etî-etî abhə́bhá-ntí-echî na ane mba tat á chə̂m á kí di erom njí na ábho.

³⁰ Etʉ̂ ane echəme Farasi na atóŋá-ebhín ábho á róghe egəmə́m, á bhə̂p atóbhá Jisos sê, “Jen é yími kən o kí di o wók ên na abhə́bhá-ntí-echî mbá na ane abhí?”

³¹ Jisos a yûk ebhə̂p njí, a táme ábho se, “Nne nnyo a ri ka osoná-biji á bhó not nne-njân, kən nne nnyo a kí maŋé nâ á nora nne-njân.

³² Mme ń ka bhá ane ano, m báe ane abhí bəre á yóŋe ḿbə́ŋé á mághe obhí ábho.”

Á bhəp Jisos ebhə̂p í nchot okagha-njaé

³³ Etʉ̂ ane á sə́re Jisos sê, “Mfín a ri nnyi atóbhá Jon nnyo mfúgha-ane-ayép á kâk njaé noŋ ejík mbâ Obhasi, á gorá yê. Mba ane echəme Farasi fə́ne á yimá ekpak njí jə́t, kən abhâ á kət á dik á wok. Echî a ri jen?”

³⁴ Kən Jisos a táme ábho ka egan se, “Kə́n o kâm ên sê ajéné mba á bháe erom ebháé á kâ njaé nji nkógha-nkáé ányo a ri na ábho a? Cháŋ.

³⁵ A ri ebhú tîk é sî nji á kí yighí nkógha-nkáé ányo ka ekam ábho. Ebhú njí é si, tîk ane á róghe mân njaé ekáám.”

³⁶ Jisos a tûp fə́ne egan nji tat a káre ábho se, “Kpe nne cháŋ nnyo a kí ware ebhat éfô ka nkʉ̂ mfê se yê a kú etəm. Nne nnyo á yim áno, nâ a bhíbhi nnyi fê nnyí. Ebhat éfô efê njí fə́ne tîk é bhó bhik na nkʉ̂ nnyi təm nnyí.

³⁷ Nne fə́ne nnyo a kí kak aməm mma á kui ka itə́n mfi í fək cháŋ. Nne á yim áno, aməm áma á kí kpere á wâ itə́n mfí, aməm á yʉ̂t, itə́n í bhîp.

³⁸ Deê nne a kak aməm afê ka itə́n mfi fê.

³⁹ Kpe nne yót nnyo á gwo aməm mma á kui a kôt egwóóm nchat cháŋ, ka tîk a fíri se mma kúúm áma á nop á chiŋi nchat.”