Luk, echî 2 - Ejagham New Testament

Ojî mbi Mmon Obhasi

¹ Ka ebhú áji, Ntûfâm i Rom, a kamá se Agustus, a káre ikom se á kó mfan ane chénchén ebhát ejê.

² Ḿfa a ri ndaŋa-mbá ofana-ane. Ka ebhú njí, a ri ntûfâm nnyo á kamá se Karinus nâ a kumî otúi ka ebhat í Siriya.

³ Nji Agustus a karê ikom mfí, kpe nnyón nne a mághe a kʉ́rá ka owe mmon eték a jí seŋ mbiŋ.

⁴ Ka ebhú njí, nne-ndûm yót a kamá se Jusep a mághe Nasaret, eték nji é rî ebhát í Gariri, a jak ebhát í Judiya ka eték nji é káma se Betrehem. Betrehem a ri eték nji á jíi ntûfâm nnyo á kamá se Debhit. Jusep a jiî Betrehem ka a dʉ ndə́p-i-njû nnyi Debhit.

⁵ Á jíi obhiŋ eséŋém na Meri, nkáé nnyo yê a gyée a kó. Meri a ri na oya.

⁶ Nji á síi Betrehem, ebhú Meri é sî.

⁷ A bhâ jî mmon ndaŋa-mbá owe nne-ndûm. A fə̂t yê na ḿfô, a núŋi ka ébhúghí nji obhúi na ofoŋ ó dîk édî ábho. A núŋi fə́ne áfo na Jusep, ka á ká yen eji ekâ ka njû nnyi ajéné á sʉ́a.

Abhábhá-obhúi na Baénjel

⁸ Ka atʉ́ áma, abhábhá-obhúi ka ebhat eték í Betrehem á káe fə́ne na obhúi ábho ka éré.

⁹ Á kpó to á yén, énjel a fâp chak, ekpatə́m ebhát na ejík Obhasi é gbo fə́ne. Efup é fî ábho, á kə̂t á choghá ka biji.

¹⁰ Kən énjel nnyó a sə́re ábho se, “Ka fûp ên kpe ejûm, ḿ ba ên na énoê esə́re. Esə́re njí tîk é bhak na ekpatə́m ogyebhá-ḿbə́ŋé mbâ ane chénchén.

¹¹ Deê ń sə́ré ên bəre ka ofú mbi égyé, ka eték í Debhit, á ji nne nnyo tîk a yîm ane á sêm ka obhí. Mbiŋ eye a ri Krayis Ntûfâm, nne nnyo Obhasi a túmi se a yim ngun á sém.

¹² Ńgyê eriŋ nji é kí toŋe ên ntûfâm nnyó. Ó ji ên, mmon i mfê nnyo á fə́re na ḿfô á núŋi ka eji obhúi na ofoŋ ó dîk édî, a ri ntûfâm i nchane.”

¹³ Nji énjel nnyó á chorá áno na ábho, á yéna ekam baénjel ndə́m á kí kon á bhak á kará ekûp mbâ Obhasi.

¹⁴ Ekôn nji á kóna é rî sê, “Deê ejík é jóe é káre Obhasi ka ósô. Enare é kúmi fə́ne na ane ka ngun mba yê a fonê ogyebhá-ḿbə́ŋé na ábho.”

¹⁵ Nji baénjel mbá á chə́bhe njəm ka ósô, abhábhá-obhúi mbá á sə́re atem sê, “É jî ên nnyi Betrehem, é jí yén ên ejûm nji é fábhe nná ka ekpak nji Ńtâ Obhasi a sə́re êt.”

¹⁶ Á yə̂p mân áfo á jak ábhiî-ábhíi. Nji á síi Betrehem, á yên Meri na Jusep. Á yên fə́ne mmon ányo ka ébhúghí.

¹⁷ Á sə́re mân ane ejûm nji baénjel á sə́re ábho é kpê na mmon ányo.

¹⁸ Chénchén ane mba á yúghi nchot nnyí, biji í kpô ábho kpe-eji.

¹⁹ Nji Meri a yéne achot mmá fép, a kô a kâk ka echî, a kérá kpe bhaghé ebhú.

²⁰ Abhábhá-obhúi mbá á chə́bhe mân njəm á kona nkôn á kará nkat na ekûp mbâ Obhasi ka ejûm nji ábho á yúghi na atûŋ ta á yen na amə̂t. Chénchén é fap ka ekpak nji baénjel á sə́re ábho.

Á kak mmon i Meri mbiŋ sê Jisos

²¹ Mfín eníganî a sî nnyi á kí kim mmon i Meri nkîm, á káre yê mbiŋ sê Jisos. Nâ mbiŋ nnyi énjel a karê kən kpe nnyen a kó oya.

Á ko Jisos á jí tóŋé ka ókʉ́rí achot Obhasi

²² Ebhú é sî nji Jusep na Meri á kí yim erom akôp esuúm ka ochî Obhasi ka ekpak ebhín í Mosis é fíi. Á kə̂n mmon nnyó á jak nnyi Jerusarem á jí káre mbâ Ńtâ Obhasi.

²³ Echî aŋ? Ebhín Obhasi é fíi sê, “Kpe nnyón mmon i ndaŋa-mbá nnyo nne-ndûm o ri ó káre mbâ Ńtâ Obhasi.”

²⁴ Meri na Jusep á kô fə́ne abhon í mbʉ́í ábháe á jí káre ekəp noŋ ebhín í Ńtâ Obhasi é fíi. Mkpak i mbʉ́í a ri áno ébháe, kən o kí ko ḿbáe, ekpak jə́t.

²⁵ Ka ebhú áji, nne yót a ri ka Jerusarem nnyo á kamá se Simun. Simun a fonê ekpin eno, a jíghá fə́ne Obhasi. Simun a nyə́ne a chighá mbôp nnyí yê a yén ofú mbi Obhasi a kí yim ane Isrel á sém. Obhasi Ebhare Ntʉgantʉ a ri yê ka biji.

²⁶ Ntʉgantʉ nnyó a sə́re yê se kpe a káe nan, á bhó kpo ta a kô amə̂t amê a yên nne nnyo Ńtâ Obhasi a túmi se a bhá yim ngun á sém.

²⁷ Ka ikom í Ntʉgantʉ nnyó, Simun a yə̂p ofú ábhi a jak ka ókʉ́rí achot Obhasi mbí. Nji ásé Jisos á kóe yê á gyê ka ókʉ́rí mbí, á bhá yîm ejûm nji ebhín é fíi, á kpúghi Simun.

²⁸ Simun a kô yê a fî ka abhô amê, a káre ekûp na ejík mbâ Obhasi se,

²⁹ “Ńtâ Obhasi, mfá-mfá ó yim ka ekpak nji o chimî. Deê mân mme ka ḿgbán owa ḿ kpó ka tebhere,

^30-31 ka ń ko amə̂t amámé, ń yen nne nnyo we o túmi se a bhá yim ngun á sém ka obhí. Nâ ekpak nji o tʉrî o kî ngun fép á yena.

³² Nne nnyó nâ ebhát nji é kí toŋe ajéné mbá eya, é bhak na ekpatə́m ejík mbâ ane abhâ, Isrel.”

³³ Nji Simun a chorê nchot nnyí, é kpô nnyen i Jisos na ńsé biji kpe-eji.

³⁴ Kən Simun a káre ábho enare, a sə́re nnyen owe, Meri, se, “Obhasi nâ a sáŋe mmon nnyó se ka obhô obhê, etî-etî ane Isrel á sém, etî-etî é bhíp ábho. Mmon nnyó a kí joé noŋ eriŋ nji é dʉ̂ mbâ Obhasi kən ane mba tat tîk á gyími ngyím okpóŋe na yê.

³⁵ É kí yim fə́ne ane etî-etî á sə́ré íkíkéré ábho ka ḿbə́ŋé. We ka nnyen owe, nsae tîk a sʉ́i wâ ka ḿbə́ŋé.”

^36-37 Nkara-otîp Obhasi yót nnyo nne-nkáé a ri fə́ne áfo a kamá se Ana, mmon i Faneyel nnyo nne ndə́p-i-njû Asa. Ana a ri ékúí nne-nkáé. Ta a kô ndûm á kâ nyâ enígisá na atem kən ndûm a bhâ kpô. Mfá-mfá a kâ nsam i nyâ énî njəm énî, kən ndûm á ka kpó ko. Kpe bhaghé ofú ó yena Ana a ri ka ekpatə́m ókʉ́rí achot Obhasi. Atʉ́ na efín a kará ekûp na ejík mbâ Obhasi ka njaé ekáám na egoróm yê.

³⁸ Ebhú ane Jisos á kóe yê á bhak, Ana a bhâ yên yê, a káre ekûp mbâ Obhasi. A sə́re nchot i mmon nnyó mbâ ane chénchén mba á chígha sê ebhú é sí nji Obhasi a kí yim Jerusarem a sém.

Jisos na ane abhê á chəbhe njəm nnyi Nasaret

³⁹ Ebhú nji Jusep na Meri á jéghe chénchén achot ka ekpak nji ebhín Obhasi é fíi, á chə́bhe njəm ka mmon eték ábho nnyo á kamá se Nasaret, ka ebhát í Gariri.

⁴⁰ Á kə̂t ka Nasaret, Jisos a kúá na ikom na biməŋé. Obhasi a tóŋá yê fə́ne onobhá-eji.

Obhóné mbi Jisos

⁴¹ Eyâ kpe njə́n, ńsé Jisos na nnyen á jâk nnyi Jerusarem á jí dí erom í Ntə̂m Osʉ́ŋ.

⁴² Ebhú Jisos a ri nyâ ófó na ébháe, á jak erom njí na ane abhê.

⁴³ Erom é kpó to é mân, ane abhê á yəp á kí kʉri, toŋ Jisos a kə̂t ka Jerusarem, ane abhê á ká məŋé.

⁴⁴ Á yóŋe á kere a ri sê Jisos a ri na ane mba ábho á chə́me ekam. Á jên ejen ofú ndə́m kən á róghe mân yê enóróm ka ekam ane ndə́p-i-njû abhê na atem abhê.

⁴⁵ Nji á nóre yê á ká yen, á chə́bhe njəm nnyi Jerusarem, á jí nót yê.

⁴⁶ Ka osúí mfín énî, nnyi á not yê, á jî kpúghi yê ka ókʉ́rí achot Obhasi, a kun ka ekam akpíghá-ane achot, a yúghá iyîm mbi á chóra, a bhə́bhá ábho bibhə̂p.

⁴⁷ Biji í kpô chénchén ane mba á rî áfo kpe-eji na ntʉ́ghi aron amê na ekpak nji yê á tamá bibhə̂p.

⁴⁸ Nji ane abhê á yéne yê, á kêt. Nnyen a bhə̂p yê se, “Mmon omé, echî nji o kaghê êt ekpatə́m efup nji a ri jen? É gat wâ enóróm.”

⁴⁹ Kən Jisos a táme se, “Ó nora ên kpá ə̂m jen? Ó ka riŋí ên sê m fonê ka eyimím etûm í Ńsé omé a?”

⁵⁰ Kən ebhə̂p ejê é ká jae ane abhê.

⁵¹ A ri a chə́bhe njəm na ábho nnyi Nasaret. Nji á chə́bhe njəm, Jisos a kî biji nyamḿ, a yúghá ábho. Nnyen owe a kə̂t a tirá chénchén achot mmá ka ḿbə́ŋé.

⁵² Jisos a kák a kúá na ikom na oməŋá-ejûm. Ogyebhá-ḿbə́ŋé fə́ne mbi á kará Obhasi na atem-ane, ó nyigha onyíghí.