Jʉt, echî 1 - Ejagham New Testament

¹ Nwet nnyí a dʉ mbâ amé Jʉt nnyo mmon-i-nnyen i Jems kən nyima-etûm nnyo Jisos Krayis. N kí tum mbâ ên mba Obhasi a bhîŋ se ó jóe ên ane abhê. Obhasi Ńsé a kôt ên. Jisos Krayis a kí bhabhe ên.

² Deê Obhasi a ri ên nsôn, a karé ên enare, a tóŋe ên fə́ne okot. Deê a karé ên iyîm mbí jok-jok. Deê ó nôk ên obhô ó sôn ka nchot Obhasi

³ Atem í ḿbə́ŋé, n sîk oto bəre kə́n ń séŋ nwet mbâ eyəné ka nchot nnyi esémém nji e séme. Kən ḿbə́ŋé a kpíghi ə̂m bəre ń séŋ ń góre ên bəre deê ó nôk ên obhô ó sôn ka nchot Obhasi nnyi a nyaŋê obhô a káre ane abhê se a ri ison ábho.

⁴ Echî aŋ? Etʉ̂ ane mba á ká kam na Obhasi á nyame á gye ekam ejə́ré nji êt fə́ne é ka kí echî. Ntʉ́ghi ane mbá nâ á chígha otîp onobhá-eji Obhasi, á yîm ane á kâ kî echî ka achot akôp ábho. Ábho fə́ne nâ á táŋe nná Jisos Krayis nnyo a ri Ńsé na Ntûfâm owəré, yê átíŋ. Nwet Obhasi a sə́re ta ka éməné se tîk esup Obhasi é bhîp ane mbá.

⁵ Deê ń tît ên achot mma ta ó raŋ ên mbá ó məŋe. Ńtâ Obhasi nâ a yighî ane Isrel ka osʉ́ŋ Ijip. Kən é kpô kə́t, a yúi etʉ̂ mba á ká ki ḿbə́ŋé na yê.

⁶ Yê nâ a karê baénjel abhê ekpatə́m eji ekumi, kən baénjel mba tat á ká jighi eji ekumi ábho. Á kpíghi njəm á káre ngûm ekumi ábho. Ka obhô mbí, a bháŋe ábho ka ótúm-ótúm a fîn ka ejírim, á chîk esup ábho ka ntə́ma-njəm ofú. Esup njí tîk é bhîp ábho.

⁷ Ane Sodom na Gomora na ane nték fép nnyi á kpíri ábho eróŋ á yími ekpin noŋ baénjel ábha. Á gyê ka achot abhí eyimím noŋ enuŋ akôp na ntem-nne, kpe na ntem-nne-ndûm. Nji é fábhe na Sodom na Gomora, é kí tʉ êt obhô ka otûŋ e yéná ekpak ane mbá á kí yen oseŋe ka erəmta-ngûn ka ótúm-ótúm.

⁸ Ka ekpak njí eróŋ, ane mba á ká kam na Obhasi á kí kerâ achot mma á bhó gyimi. Achot mmá nâ á chóa ábho á nyobha biji, á bhó yubhi ebhín Obhasi, á soná fə́ne baénjel.

⁹ Kpe ntûfâm baénjel nnyo á kamá se Mayikel, ebhú á fóne áfírí na Satan ka nchot i nne nnyo a kí kən Mosis ebhú a kpóe, á ka gaé kpe egaám a tú Satan. Nji Mayikel a chorê a ri se, “Ńtâ Obhasi nâ a kí kpəré wâ.”

¹⁰ Kən ane mbá, iyîm mbi á ká məŋé á tû. Mbi á mə́ŋe mân oməŋé ekan noŋ nnyam etə́m á məŋá ejûm, ḿbə́ne nâ í kí yui ábho.

¹¹ Ekpatə́m otán mbi ó rî na ane mbá ó chiŋi abhô. Ka nan? Ekpin ábho é jen ekan-ékân noŋ nji Keyin. Ka achot ntí, á choghe biji á ji ekpak egboóm jə́t nji Beram a gboê. Á top ekát í Kora nji Kora a túbhi onyʉk ebhú áji. Ekpak Obhasi a bhíbhi Kora, nâ noŋ fə́ne ta a bhíbhi ane mbá.

¹² Ka obhô ekpin ábho, ane mbá á bhâk na atû ka ekumi ejə́né nji ó chəmé ên o kí di ên édî ka okot. Echî etat á bhâk cháŋ a ri édî. Nji á bha, oya ábho ḿbə́ne-mbənê nâ á kébha, echî é bhó yup ábho. Á rî noŋ ngûm nnyi a bhə̂t, ó yen se mbúta a kə́ bha ona, kən mfêp a kí nok, ngûm a chə́bhe njəm a bhât. Á rî noŋ étí-nkap nji ka ebhú nkap, ńjə́ne é bhó kap, arʉk fə́ne á kí bhaghé yê ka ndə́p fép. Nâ é fap sê étí njí é kpo ntə̂m-ntə̂m ébháe.

¹³ Á rî noŋ ébhúghí-aya, ka á kí juŋi biji á rə́bhe ndə́p ábho á mághe fóŋ na ísonê noŋ mfî nnyi aya á mághe ka akpe ebhú ébhúghí-aya é juŋí. Á rî noŋ ńdʉnândʉ-ósô mmi ń kət ń jobha ojóp ta fə́ne Obhasi a kâk ábho ka ekpatə́m ejírim ta ka ótúm-ótúm.

¹⁴ Ka éməné, Enok nnyo osúí ńsé anígisá éróghé ta mbâ Adam, a chorê a kpê na ane ntʉ́ghi mbá se, “Deê ń sə́ré ên bəre Ńtâ Obhasi tîk a bhák na baénjel abhê ka njok ka njok.

¹⁵ Ebhú á bha, tîk a tâŋ ngun fép, a kpə́re ane chénchén mba á ká kam na yê, ka obhí ábho mbi á yími na akpatə́m achot abhí fép mma á chóre á kpê na yê.”

¹⁶ Ane mbá á kət á məmá na ane ka ntuŋ, á bhibha atem. Á tobha a ri achot abhí mma á rî ábho ka ḿbə́ŋé, ńkamê nyúp-í-nyûp nâ á káma. Ane ntʉ́ghi mbá á tóŋa okot áfúbhí mbâ nne, ka á kí wom ejûm.

Deê ó gyê ên biji ibhə́né na nchot Obhasi

¹⁷ Atem ógbá, tit ên ka ḿbə́ŋé eyəné ejûm nji ágbán í Ńtâ Jisos Krayis á tóe sê tîk é fâp.

¹⁸ Ágbán abhê á tóe sê, “Ebhú mfín ányi á si nnyi ngun a kí man, ane tîk á fâp mba á kí kak ên ntuŋ. Ane mbá á kí tobhâ ntit i ḿbə́ŋé ábho nnyi bhí.”

¹⁹ Deê ń sə́ré ên mân bəre ekpak ane mbá nâ á túbha achât ka ekam, á mə́ŋe a ri achot í ngun, á ká fon Obhasi Ebhare Ntʉgantʉ.

²⁰ Kən ên, atem ógbá abhámé, deê ó gyê ên biji ibhə́né na nchot Obhasi. Nchot nnyí á ka fon akôp. Kó ên ikom Obhasi Ebhare Ntʉgantʉ goré ên Obhasi.

²¹ Kî ên biji nyamḿ ka okot Obhasi nji ó chighá ên áno sê ntûfâm í Jisos Krayis, ka nsôn eye, a karé ên ekpin ótúm-ótúm.

²² Tóŋe ên nsôn na ane mba á nyə́ne na efup ka nchot Obhasi.

²³ Nyáŋe ên etʉ̂ ábho yighî ên ka erəmta-ngûn oseŋe. Kən etʉ̂ ane á rî mba o kí ri ên nsôn, a ri kô ên ebhú eróŋ o kâ nyóbhe ên biji ka obhí ábho.

Ogora-biji na ejík

²⁴ Deê ejík é jóe é káre Obhasi nnyo a kí bhik eyighím ên o kâ gbô ka obhí. Yê nâ a kí ko ên ta o sî ka eji ekumi ejík ejê kpe akôp ó bhó fon ên, o kúmi ên na ogyebhá-ḿbə́ŋé.

²⁵ Deê ejík na efaŋ na ikom otúi í jóe í káre Obhasi nnyo a ri nná Obhasi átíŋ, yê nnyo á nyaŋa êt ka obhô Jisos Krayis. Ejík njí na efaŋ na ikom mbi yê a fonê nná ta ka eróghá-ndə́p í ngun, a fôn mfá-mfá, tîk a fôn fə́ne ka ótúm-ótúm. Áno.