Jon, echî 9 - Ejagham New Testament

Jisos a yîm ntána-amə̂t a yén mbá

¹ Jisos a kí jen a jak. A jî yên nne etat nnyo á jíi yê na otáná-amə̂t.

² Ágbán í Jisos á bhə̂p yê sê, “Ńsé, obhí énê nâ ó yími á jî nne nnyó kpup na otáná-amə̂t? Obhê kən mbi ásé abhê?”

³ Jisos se, “Obhí, kpe a ri obhê, kpe mbi ásé abhê, ó ká fon ejûm ó kpê na otáná-amə̂t í nne nnyó. A táne amə̂t ngun á yén ekpak ikom Obhasi í kí yim etûm ka ekpin ejê.

⁴ E ri é yîm etûm í nne nnyo a túmi ə̂m, é jî ochî nji ebhát é nyə́ne. Ejírim é bha chén. É kpo bha áfo, kpe ejûm é ro kpó yim.

⁵ Nji n di mfá ka ngun, mme nâ n di áno ebhát í ngun.”

⁶ Nji a chorê áno, a chô oson ka nsi a nyóbhe otop, a kô a chóme nne nnyó ka amə̂t.

⁷ A sə́re yê se, “Choŋ osu ochî obhâ ka mmon ayép í Siroyam.” (Siroyam a fábhe se, Átúmi-otúm.) Nne nnyó a jî sû ochî obhê, a chə́bhe njəm a kí yen mbá.

⁸ Akʉ́á-njû abhê na ane mba á raŋ mbá á məŋe yê noŋ ngyéŋa-egyéŋé á chə́bhe á bhəbha sê, “Ngyéŋá-egyéŋé nnyó nná asík a?”

⁹ Etʉ̂ sê a ri yê, kən mba tat sê a fóŋe ofóŋé. Kən nne nnyó yê ḿfoné se, “A ri mme áno.”

¹⁰ Á bhə̂p yê sê, “Ájoé a ri we, amə̂t amâ á yími nan á rə́bhe?”

¹¹ Kən nne nnyó se, “Nne nnyo á kamá se Jisos nâ a nyóbhe otop a chóme ə̂m ka amə̂t, a sə́re ə̂m se ń jí sû ochî ka mmon ayép í Siroyam. N jî sû fə́ne, amə̂t á rəbhe ə̂m.”

¹² Á bhə̂p yê sê “Jisos nchane a ri fan?” Se, “Ń ka məŋé mbá a ri.”

Ane echəme Farasi á ká kam sê Jisos a rə́bhe nne amə̂t

^13-14 Ofú Jisos a yimî otop a rə́bhe amə̂t í ntána-amə̂t nnyó a ri ofú oyoá-biji. Kən ane á kô nne nnyo á rə́bhe nná yê amə̂t á bhak mbâ ane echəme Farasi.

¹⁵ Nji á bháe, ane echəme Farasi á kpô bhə́p yê ekpak amə̂t amê á rə́bhe. A sə́re ábho se, “A chóme otop ka amə̂t amámé, n sû ochî, ń chəbhe n yéná mbá.”

¹⁶ Etʉ̂ ane echəme Farasi sê nne nnyo á yim ejûm ntʉ́ghi njí á bhó joé nne Obhasi ka á ka jíghí ofú oyoá-biji. Kən etʉ̂ fə́ne sê, “Nyima-obhí kpe yót nnyo a kí yim ntʉ́ghi ntûm okpógha-biji nnyí cháŋ.” Achât á bhâ gbô áfo ábho-ábhô.

¹⁷ Á kpô bhə́p nne nnyó sê, “Ó səre se a rə́bhe wâ amə̂t, o kí kere mân se yê a ri énê?” Nne nnyó se, “A ri nkara-otîp Obhasi.”

¹⁸ Atúi-ofâm ane Jus á ká wom owóm á kâm sê nne nnyó a jóe kpá ntána-amə̂t, kən mfá-mfá a kí yen mbá. Á wóma ta á yúk ka nnyo ásé abhê. Á bhîŋ mân ábho

¹⁹ á bhə̂p sê, “Nne nnyó a ri mmon owəné kən ee. Ó səre ên sê a gboê na otáná-amə̂t, é yími nan a kí yen mbá mfá-mfá njí?”

²⁰ Á táme ábho sê, “É məŋe sê a ri mmon owəré, e jíi yê na otáná-amə̂t.

²¹ Kən é ka məŋé ekpak nji é yími kən a kí yen mbá mfá-mfá. Nne fə́ne nnyo a rəbhê yê amə̂t, é ka məŋé. Yê mmonche asík, bhə̂p ên yê a támé ka imê nnyo.”

²² Ásé nne nnyó á chóre erə́bhe nchot njí ka efup. Echî aŋ? Atúi-ofâm ane Jus á kam sê kpe énê nnyo á səre se Jisos nâ Krayis, nne nchane nnyo Obhasi a túmi a bhá yim ábho á sém, á kí bhim yê, óchâm Obhasi a rô gyé.

²³ Nâ echî á táme sê, “Yê mmonche asík, bhə̂p ên yê.”

Ka osúí ntə̂m ébháe, ane echəme Farasi á kí bhəp nchot amə̂t nnyí

²⁴ Ka osúí ntə̂m ébháe, ane echəme Farasi á kpô bhiŋ nne nnyo á jíi yê nná amə̂t ntánám, á sə́re yê sê, “Chimî ka mbiŋ Obhasi se ó bhó səre áfúbhí. Êt é məŋe sê Jisos nnyó a ri nyima-obhí.”

²⁵ Kən nne nnyó se, “Ń ka məŋé ájoé nne nnyó a ri nyima-obhí. Nji m məŋê a ri bəre á jíi ə̂m ntána-amə̂t, kən mfá-mfá n kí yen mbá.”

²⁶ Kən á bhə̂p yê sê, “A yimî nan kən a rə́bhe wâ amə̂t?”

²⁷ A táme se, “Ń daŋ mbá kpá ń səre ên ó bhó kam ên, jen kən o kí kpo bhə́p ên ə̂m. Átíŋ o kí wom ên ó chə́bhe ane abhê?”

²⁸ Ane mbá á róghe yê etúúm sê, “Êt é tobha Mosis, we nâ ó toŋá yê ágo.

²⁹ É məŋe sê Obhasi a chôt mbâ Mosis ebhú áji, kən nne nnyó, é ka məŋé kpe mbá a dʉ a bhák.”

³⁰ A táme ábho se, “Nchot nnyí a kpô ə̂m biji kpe-eji. Ó ka məŋé ên mbá nne nnyó a dʉ a bhák, kən a rə́bhe ə̂m amə̂t.

³¹ É məŋe ên sê Obhasi á bhó yuk nchot na nyima-obhí. Á yugha a ri na nne nnyo á jigha yê, a yimá ka ekpak nji yê á wóme.

³² Mbôp nnyí ngun a róghe, é ká nok ên oyúk sê nne a rə́bhe amə̂t í nne nnyo á jíi yê kpup na otáná-amə̂t.

³³ Ájoé nne nnyó á ka dʉ mbâ Obhasi, á bhó bhik eyimím kpe ejûm jə́t.”

³⁴ Ane mbá sê, “Mbôp á jíi wâ ta é si égyé, ó kpiná ka obhí. O kə́ bha okpí êt achot égyé a?” Á bhîm yê sê a ji.

Jisos se otáná-amə̂t ka nchot Obhasi nâ ó rî mfoné otáná-amə̂t

³⁵ Jisos a bhâ yûk se á bhim nne nnyo yê a yimî nná a yên mbá. A jak a jî nôt yê ta a yên. A bhə̂p yê se, “Ó yuŋ ḿbə́ŋé ó kí na Mmon-i-ntem-nne a?”

³⁶ Nne nnyó se, “Ńsé, yê a ri énê? Sə́re ə̂m mme ń yûŋ ḿbə́ŋé ń kí na yê.”

³⁷ Jisos a sə́re yê mân se, “Ta ó yen yê. Yê nâ á chorá áno na we mfá-mfá.”

³⁸ Nji nne nnyó a kpô yúk, a chôt se, “Ntûfâm, ń yuŋ ḿbə́ŋé amé ń ki na we.” A tə̂m mân achî-arúŋ áfo ka nsi a káre Jisos ekûp na ejík.

³⁹ Jisos se, “M báe ka ngun bəre ḿ bá tóŋé ane obhí ábho. Mba á rî noŋ atáná-amə̂t, á yén mbá, mba sê ábho á ká tan amə̂t, á tán.”

⁴⁰ Kən etʉ̂ ane echəme Farasi mba á rî áfo á yugha á bhə̂p yê sê, “O kí səre tîk se êt eróŋ a ri atáná-amə̂t?”

⁴¹ Jisos se, “O kamê ên nná sê ên a ri atáná-amə̂t ka achot mmá eê, kə́n ó ka fon ên ogbo, kən ka eji sê ên ó məŋe, məŋê ên sê ó gbo ên.”