Jon, echî 5 - Ejagham New Testament

Jisos a yîm nne nnyo a máŋe emaŋé ka nyâ na nyâ a sôn

¹ É kpo ka, erom ane Jus etat é sî. Jisos a mághe a jak nnyi Jerusarem.

² Nnyo-mbá etat ń dî kən ó gyé eték, á bhiŋá sê Nnyo-mbá Obhúi. Eji ayép eyumúm é rî ka nnyo-mbá mmí á bhiŋá ka eyum ane Ibru sê Besayida. É fóne ngûm énarâna érôn nnyi ane á yoá biji.

³ Njok ane bimaŋé ka mkpak ka mkpak á chə́me á nûŋ ka ánarâna mmá. Atáná-amə̂t, abhə́né, ane mba abhô na akát á kpo, á rî áfo. [Á chighá sê ayép á jʉ́ŋ.

⁴ Echî aŋ? Ka ebhú ka ebhú, énjel Obhasi a kə́ bha a bhâ nyíŋi ayép. Ndaŋa-mbá nne emaŋé nnyo a kí gye ayép mmá nji á nyiŋí, kpe bhaghé emaŋé nâ é nógha yê a kí son.]

⁵ Nne yót a ri ka ane emaŋé mbá, a máŋe emaŋé ka nyâ esam njəm ekû na ésá.

⁶ Nji Jisos a yéne nne nnyó a nuŋ, a mə́ŋe se a yên oseŋe ebhú é rap ka emaŋé njí. A bhə̂p yê se, “Tîk o kôt se emaŋé ejâ é mân a?”

⁷ Nne nnyó a kâm. A sə́re Jisos se, “Ńsé, ń ka fon kpe nne nnyo a kí kən ə̂m ń wághé ń sí ayép ebhú nji á nyíŋi ḿmáne. Kpe bhaghé ebhú n noghê bəre ń sí, nne etat a kí raŋ mbá a sî.”

⁸ Jisos se, “Duî ngyím, kə́n ekpa ejâ jen ejen.”

⁹ Etʉri-étʉ́ri áji nne nnyó a sôn, a rúi ngyím, a kə̂n ekpa ejê a kí jen a jak. Nchot nnyí a fábhe ka ofú oyoá-biji.

¹⁰ Kən atúi-ofâm ane Jus á kpó to á yén nne nnyo á yími nná a sôn, á sə́re sê, “Égyé a ri ofú oyoá-biji, ebhín é ká kam sê kpe ekpa áji ó kə́n ka ofú ntʉ́ghi mbí.”

¹¹ Kən nne nnyó a táme ábho se, “Nne nnyo a yimî ə̂m n sôn a sə́re ə̂m se ń kə́n ekpa ejámé ń jên ń jî.”

¹² Á bhə̂p yê sê, “Nne nchane a ri énê nnyo a sə́re wâ se ó kə́n ekpa ó jên?”

¹³ Kən nne nnyó á ka kpó məŋé nne nnyo a yimî yê a sôn. Echî aŋ? Ekam ane é tî é chîŋ ka eji njí, Jisos a nôn a jak eye mbá.

¹⁴ É kpó kət, Jisos a bhâ kpúghi nne nnyo yê a yimî nná a sôn ka ókʉ́rí achot Obhasi. A sə́re yê se, “Mfá-mfá ó son, maghê mân obhí obhâ. Áno asík, ebhú tat nji é kí kpo fap na we tîk é bhîp é chíŋi ochíŋ.”

¹⁵ Nne nnyó a mághe mân a jî sə́re atúi-ofâm ane Jus se a ri Jisos nâ a yimî yê a sôn.

¹⁶ Atúi-ofâm mbá á róghe fə́ne ekarám Jisos oseŋe, ka a yîm nne a sôn ka ofú oyoá-biji.

¹⁷ Kən Jisos a sə́re ábho se, “Ńsé omé á yimá etûm chénchén ebhú, mme eróŋ n di ń yîm ka ekpak njí.”

¹⁸ É kpére é yâm mân atúi-ofâm mbá é kpô. Á chími sê á rî á yúí yê, ka a gbô ebhín ofú oyoá-biji. Sê a sə́re fə́ne se Obhasi a ri Ńsé owe. Nâ é fap sê a kí ko biji ibhê ekan na Obhasi.

Jisos se ikom ifê í dʉ̂ mbâ Ńsé owe Obhasi

¹⁹ Jisos se, “Deê ń sə́ré ên ka etʉri bəre Mmon á bhó yim kpe ejûm jə́t ka biji ibhê. Kpe jen nji a kí yim, á yena mbâ Ńsé owe. Nji-nji Ńsé a yimî, ńjə́ne nâ Mmon á yimá.

²⁰ Echî aŋ? Ńsé a kôt Mmon, nâ ńjə́ne a kí toŋe Mmon chénchén ejûm nji yê ḿfoné á yimá. Tîk a tóŋe Mmon iyîm mbi í fáŋe í chîŋ ochíŋ. Tîk biji í kpô ên fə́ne kpe-eji.

²¹ Ka ekpak nji Ńsé á sʉghá áno ane mba á kpóe á chəbhá njəm ka ekpin, nâ noŋ fə́ne Mmon a kí karé ekpin mbâ kpe énê nnyo yê a wóme a karé.

²² Ńsé fə́ne asík á taŋá esup na kpe nne yót. A mághe achot áma chénchén ka obhô Mmon.

²³ Se ngun ndə́m á jíghí Mmon noŋ á jígha yê. Nne nnyo á ka jíghí Mmon nâ á ka jíghí Ńsé nnyo a túmi Mmon.”

²⁴ “Deê ń sə́ré ên ka etʉri bəre kpe énê nnyo a kí yuk nji ń chorá nná, a yûŋ ḿbə́ŋé a kî na yê nnyo a túmi ə̂m, a fôn ekpin ótúm-ótúm. Á bhó gyimi ka ochî esup, a yáŋe ekʉ̂ a gyê ka ekpin.”

²⁵ “Deê ń sə́ré ên ka etʉri bəre ebhú é kə́ bha, ta é bha é si njû nji ane mba á kpóe á kí yuk eyum í Mmon Obhasi. Mba á yuk eyum njí á kí fon ekpin.

²⁶ Nan? Ńsé nnyo a ri nâ njû ekpin a yîm fə́ne se Mmon a jóe njû ekpin.

²⁷ A káre Mmon ikom se a táŋ ngun, ka Mmon a ri Mmon-i-ntem-nne.

²⁸ Deê é kâ kpô ên biji. Ebhú é kə́ bha nji akə́bha-nsi chénchén ka ayəm á kí yuk eyum ejê.

²⁹ Á yuk, á kí fap ka ayəm ábho. Ane mân mba á yími ono ka ngun nnyí, tîk á nyə́me á gyê ka ekpin. Mba á yími obhí, á kí nyəmé á gyê ka oseŋe.”

Atî-isê Jisos

³⁰ Jisos se, “Kpe ejûm jə́t nji n kí yim ka ikom ifámé cháŋ. Ekpak nji n kí taŋ ngun nâ ekpak nji Ńsé omé Obhasi a sə́re ə̂m se ń táŋ. Nâ otáŋá-nchot obhámé ó rî ka mbá. Ḿ bó yim nji é bhíghi ə̂m ka ḿbə́ŋé, kən ń yimá nji yê nnyo a túmi ə̂m a wóme.

³¹ “Ń gyimi ntî-isê biji ibhámé, nji ń chot á bhó ko sê nâ mfoné nchot.

³² Kən ntî-isê omé a ri. Ḿ məŋe bəre otî-isê obhê áfúbhí cháŋ.

³³ O tûm ên ane mbâ Jon. Nji á jíi, Jon a chôt noŋ ntî-isê mfoné nchot Obhasi.

³⁴ É ká joé sê ta ntem-nne a gyími ə̂m ntî-isê. Ń chorá áno ńji bəre ó sém ên.

³⁵ Jon a ri ebhú áji noŋ ngûn mmi ń kí ya, ń toŋa ebhát. O kâm ên ka ebhú jə́t sê ó fon ên ogyep ebhát njí.

³⁶ Kən ḿ fon ntî-isê ka biji ibhámé nnyo a sonê a chíŋi kpe otî-isê mbi Jon a gyími ə̂m. Otî-isê mbí a ri ntûm nnyi ń yimá. Ntûm nnyí Ńsé omé a karê ə̂m se ń yîm. Ntûm nnyí nâ a gyím ə̂m ntî-isê se Obhasi Ńsé nâ a túmi ə̂m.

³⁷ Ńsé fə́ne nnyo a túmi ə̂m a gyími fə́ne noŋ ntî-isê omé yê ḿfoné. Nne owəné nnyo a noghê eyum ejê oyúk cháŋ. Ekpak fə́ne nji yê a ri, nne nnyo a məŋê cháŋ.

³⁸ Nchot eye fə́ne á bhó kumí na ên, ka ó bhó yuŋ ên ḿbə́ŋé ó kí na mme nnyo yê á túmi.

³⁹ O kí gat ên nwet Obhasi ekpíím o kérá ên sê a ri ka ńnyə́ne nâ o kí fon ên ekpin ótúm-ótúm. Nwet nnyí ngá, a ri noŋ ntî-isê omé.

⁴⁰ A ri ên ó bhó kam ên ó bhá ên mbâ amé, ń káre ên ekpin ótúm-ótúm.

⁴¹ “Ḿ bó nok bəre ngun á kât ə̂m.

⁴² Kən ḿ məŋe ḿbə́ŋé eyəné. Ó ka kot ên Obhasi.

⁴³ Ḿ ba ka mbiŋ i Ńsé omé, kən nne owəné nnyo a kamê na mme cháŋ. Nne etat áfo nâ a bháe, nne nnyo a túmi yê cháŋ kə́n o kâm ên na yê.

⁴⁴ O kí yim ên nan ó yûŋ ên ḿbə́ŋé ó kí na Obhasi, nji o noghá ên ngá sê ngun á kât ên. Ó maghe ên ewómóm nkat mbâ mfoné Obhasi.

⁴⁵ A ri o kâ fôn ên efup sê mme nâ n kí bhibhi ên ka ochî Obhasi. Nji é kí bhibhi ên a ri ebhín í Mosis nji ên o fiî sê tîk é yîm ên ó sêm.

⁴⁶ Ebhú sê o kamê ên na ebhín í Mosis mfoné ekamám, kə́n o kâm ên fə́ne na mme. Echî aŋ? Achot mma a séŋe chénchén a ri mme.

⁴⁷ Kən ájoé ó bhó kam ên na nji yê a séŋe, o kí yim ên nan ó kâm ên na nchot amé?”