Jon, echî 4 - Ejagham New Testament

Etʉ̂ ane Samariya á kam sê Obhasi nâ a túmi Jisos

¹ Ane Jus mba echəme Farasi á yûk sê ane mba á chə́bhe á tobha Jisos, a fúghá ábho ayép, á kí tighâ á chiŋa mba Jon.

² Kən Jisos yê ḿfoné á ka fúk kpe nne yót ayép, ágbán abhê nâ á fúgha ane.

³ Nji Jisos a kpô yúk se ane echəme Farasi á məŋe nchot nnyí, a mághe kpá Judiya a chə́bhe njəm nnyi Gariri.

⁴ A fonê ka echíŋím ebhat í Samariya kən a sí Gariri.

⁵ A bhâ sî eték í Samariya etat nji é káma sê Sika. Eték njí é rî kpít na ebhat í nsi nji éməné Jakop a karê mmon owe Jusep.

⁶ Ébhírí-ayép nji Jakop a sə́me ka eji áji é rî áfo. Jisos a jên ejen a kêt, a bhâ kúmi ka eji ébhírí-ayép njí a yoé. Ka ebhú njí, nchên a kúi.

⁷ Nne-nkáé Samariya yót a bhák a bhá tuk ayép. Jisos a sə́re nne-nkáé nnyó se, “Karê ə̂m ayép ń gwó.”

⁸ Ka ebhú njí ágbán í Jisos cháŋ. Á ji onam édî ka eték.

⁹ Kən nne-nkáé nnyó a bhə̂p Jisos se, “We a ri nne Jus, mme nne-nkáé Samariya. É kí yim nan ó bhə́p ə̂m ń káre wâ ayép ó gwó?” Nne-nkáé nnyó a chorê áno nchot nnyí, ka ane Jus á bhó koné na ane Samariya.

¹⁰ Jisos se, “Ebhú sê ó məŋé ekəp nji Obhasi á kará, o mə́ŋe fə́ne nne nnyo á bhəbha wâ áno ayép, kə́n we nâ o kí bhəp ə̂m ń káre wâ ayép mma á kára ekpin.”

¹¹ Nne-nkáé nnyó se, “Ńsé, we ejûm nji o kí tuk ayép ó ka fon, ébhírí-ayép njí fə́ne é rəme kpe-eji, o kí ko ayép ekpin áma fan ó káre ə̂m?

¹² Jakop nnyo a ri ńsé owəré chénchén a gwóe ayép mfá, ane abhê á gwô, onyam obhê ó gwô. Yê nâ a maghê êt ébhírí-ayép njí. Ń kere bəre ó bhó kep biji se ó faŋ ó chiŋi Jakop. Nâ nji o kére tîk?”

¹³ Jisos a táme se, “Kpe énê nnyo á wok ayép mmá a kí kpo joé ka ekot ayép.

¹⁴ Kən nne nnyo á gwo ayép mma ń kará yê, a rô kpo joé ka ekot ayép. Ayép mma n kí karé yê á kí joé noŋ njû-ayép nnyi ayép á fə́ma á kará ekpin ótúm-ótúm.”

¹⁵ Nne-nkáé nnyó se, “Ńsé, karê ə̂m ayép mmá, tîk ń do joé ka ekot ayép. Ń do bhá fə́ne mfá bəre ḿ bá tûk ayép.”

¹⁶ Jisos a sére yê se, “Choŋ obhiŋ ndûm owa bhák ên.”

¹⁷ Kən nne-nkáé nnyó se, “Ń ka fon ndûm.” Jisos se, “Ó səre se ó ka fon ndûm, ó chot nchot eya ka echî.

¹⁸ Ó fap arûm árôn. Nnyo mfá-mfá mfoné-mfoné ndûm owa asík. Ó sə́re ə̂m nchot ka echî.”

¹⁹ Nne-nkáé nnyó se, “Ńsé, ń yen bəre we a ri nkara-otîp Obhasi. Ásé abhə́ré éməné á sə́re sê e jíghá Obhasi ka egúí njí.

²⁰ Kən ên ane Jus sê Obhasi ejíghím ó chəbhe a ri ka eték í Jerusarem.”

²¹ Jisos se, “Mmá, yûk, mme ń sə́ré wâ, bəre ebhú é kí si nji ájoé nne a kí jighi Obhasi Ńsé, é ro joé sê ta ka egúí njí na kpe ka Jerusarem.

²² Ên ane Samariya ó ka məŋé ên oməŋé nne nnyo ó jigha ên, kən êt ane Jus nâ e məŋê, ka é dʉ̂ mbâ eyəré kən Obhasi a kí yim ane á sema.

²³ Kən ebhú é kə́ bha, ta é bha é si njû, nji mfoné-mfoné ane mba á kí jighi Obhasi Ńsé, á kí yim áno ka ńtʉgântʉ. Áfúbhí á bhó joé. Nâ ane fə́ne mba Obhasi Ńsé a wóme se á jíghí yê.

²⁴ Obhasi a ri ńtʉgântʉ. Ka obhô mbí, ane mba á kí jighi yê á rî á jíghí ka ńtʉgântʉ, áfúbhí á bhó joé.”

²⁵ Nne-nkáé nnyó se, “Ḿ məŋe bəre Krayis, Ntûfâm nnyo Obhasi a túmi se a bhá yim ngun á sém, a kə́ bha. Ebhú á bha, tîk a tóŋe êt achot chénchén.”

²⁶ Jisos a sə́re yê mân se, “Mme nnyo ń chorá áno mbâ eya a ri nne nchane.”

²⁷ Ka nkúbhi ebhú áji, ágbán í Jisos á chə́bhe njəm á bhak. É kpô ábho biji nji á kpúghi Jisos a chorá na nne-nkáé. Kən kpe nne ábho nnyo a bhə́bhe nne-nkáé nnyó ejûm nji á woma cháŋ. Kpe nne nnyo a bhə́bhe fə́ne Jisos echî á chorá na yê cháŋ.

²⁸ Nne-nkáé nnyó a mághe ebhí-ayép ejê áfo, a jak ka eték a jî sə́re ane se,

²⁹ “Bhák é jí yén ên nne nnyo a sə́re ə̂m chénchén achot mma n yimî. Nâ-ngá kə́n a jóe Krayis, nne nnyo Obhasi a túmi se a bhá yim ngun á sém a?”

³⁰ Ane á bhâ mághe eték á jak mbâ Jisos.

³¹ Ágbán í Jisos ngá á rî á gorá ńsé ábho sê a kó mô ejûm a dí.

³² Kən Jisos a táme ábho se, “Ḿ fon édî nji kpe nne owəné nnyo a məŋê cháŋ.”

³³ Ágbán abhê á róghe mân ebhə́bhə́m ábho-ábhô sê, “Nâ-ngá nne a kô édî a bhâ káre yê tîk?”

³⁴ Kən Jisos a sə́re ábho se, “Édî ejámé a ri eyúghúm nne nnyo a túmi ə̂m na ejeghém etûm nji a túmi ə̂m se ḿ bá yîm.

³⁵ To ó fon ên egan sê, ‘É kət nnyam-ósô énî kən ebhú efʉ é si?’ Deê ń sə́ré ên mân bəre ó túp ên amə̂t ó kép ên mbin ó fáre, tîk o yên ên sê ebhú efʉ é kpiri mân.

³⁶ Mfʉghá-fʉ́ghá a kí fon orʉrí. Nji tat á fʉk cháŋ a ri ane mba á kíi ḿbə́ŋé á fôn ekpin ótúm-ótúm. Ka ekpak njí, mkpaŋá-kpáŋá na mfʉghá-fʉ́ghá tîk á fôn ogyebhá-ḿbə́ŋé bhə́t.

³⁷ Egan njí é rî ka echî sê, ‘Mkpaŋá-kpáŋá egyê, mfʉghá-fʉ́ghá egyê.’

³⁸ Ń tum ên bəre ó jí fʉ̂ ebhin nji ên asík o kpaŋê. Ane etat nâ á yéne oseŋe á kpâŋ. Ên o kí fon mân a ri orʉrí etûm ábho.”

³⁹ Etî-etî ane Samariya ka eték áji, á yûŋ ḿbə́ŋé á kî na Jisos, ka nne-nkáé ányo a sə́re ábho se Jisos a sə́re yê chénchén iyîm mbi yê a noghê oyim ka ekpin ejê.

⁴⁰ Á kpó bha mbâ Jisos, á góre yê sê a té a ká na ábho. A kâ fə́ne mfín ébháe.

⁴¹ Otîp mbi Jisos a karê áfo ó yîm ane mba tat etî-etî á kî ḿbə́ŋé na yê.

⁴² Ane á sə́re nne-nkáé nnyó se, “É ki ḿbə́ŋé mfá-mfá na yê, cháŋ kpe sê ka achot mma o sə́re êt, kən êt é yuk êt áfoné achot mma yê á chorá. É məŋe sê yê nâ a ri nne nnyo Obhasi a túmi se a bhá yim ngun á sém.”

Jisos a yîm mmon i nne-eyúp a sôn

⁴³ Nji Jisos a káe mfín ébháe áfo, a chîŋ a jak nnyi Gariri.

⁴⁴ Kpe noŋ Jisos yê ḿfoné á chorá se, “Nkara-otîp nnyo á foná ejík sê é dʉ̂ mbâ ane abhê cháŋ”, á ka re ejiím.

⁴⁵ Kən a kpo to a sí Gariri, ane á kô yê nono. Echî aŋ? Á yen iyîm mbi a yimî ka Jerusarem ebhú á jíi erom í Ntə̂m Osʉ́ŋ.

⁴⁶ Jisos a jak mân ka eték í Kana ka Gariri. Kana nâ eji nji yê a kpíghi nná ayép ka aməm. Ntûfâm yót ka mba á fíi otúi eték a ri ka Kapanom. Mmon owe nnyo nne-ndûm a ri a maŋá omaŋé.

⁴⁷ Ntûfâm nnyó a kpo to a yúk sê Jisos a mághe Judiya a bhâ Gariri, a jî góre yê se a bhá nnyi Kapanom a bhá yim mmon owe a son. Se mmon owe a kə̂t kpít na ekpóóm.

⁴⁸ Jisos a táme yê se, “Kpe nne owəné nnyo a kí yuŋ ḿbə́ŋé a kí na mme cháŋ ta a yên ntûm okpógha-biji nnyi ń yimá.”

⁴⁹ Kən ntûfâm nnyó se, “Ńsé, ka kâm mmon a kpó ə̂m, bhák é jî.”

⁵⁰ Jisos se, “Choŋ kʉ́ri, mmon owa á bhó kpo.” Nne-ndûm nnyó a kâm na nchot nnyi Jisos a sə́re yê, a kʉ́rá.

⁵¹ Nji á kʉra a jak, ágbán abhê á bhâ kpúghi yê ka mbá, á sə́re yê sê, “Mmon owa a sôn.”

⁵² A bhə̂p ábho se, “Bhaghé ebhú nâ a sonê?” Á sə́re yê sê, “A ri ényané ka ńkánínká enígisá.”

⁵³ A bhâ tît mân se ka ebhú áji títí nâ Jisos a sə́re yê se, “Choŋ kʉ́ri, mmon á bhó kpo.” Ka obhô mbí, yê na ndə́p-i-njû eye chénchén á bhâ yûŋ ḿbə́ŋé á kî na Jisos.

⁵⁴ Nâ osúí biriŋ íbháe mbi Jisos a tóŋe nji a maghê Judiya a jak nnyi Gariri.