Jon, echî 20 - Ejagham New Testament

Jisos a chə́bhe njəm ka ekpin

¹ Ndaŋa-mbá ofú ka ogəm, na ofú-ofú, ngûm a nyə́ne a nyaghá, Meri Madarin a jak ka oyəm í Jisos. A jî yên se á yighi ntáé nnyi á bhúi nná ka nnyo-mbá oyəm.

² A bhéne a jak mbâ Simun Pita na ḿgbán i Jisos nnyo Jisos a korê, a jî sə́re ábho se, “Á yighi Ńtâ Jisos ka oyəm. É ka məŋé mbá á yíghi yê á kî.”

³ Pita na ḿgbán nnyó á mághe á jak ka oyəm mbí.

⁴ Á bhena obhə́né kən ntem nnyo ngá a bhéne a chíŋi Pita. A râŋ mbá a sî oyəm.

⁵ A sére, a yên íbháré ífô mfi á bhúi Jisos, kən á ka gyé ka etím oyəm mbí.

⁶ Kən Pita a kpo to a sí, a gyê ka etím oyəm ntə̂m yə́t, a yên íbháré ífô mfí.

⁷ A yên fə́ne éfô nji á bhóbhe nná Jisos ka echî. Ḿfô nnyí a nuŋ áfo ka nsi, kən á ka joé eji jə́t. Á fət nji echî á tʉri á ki.

⁸ Ḿgbán nnyo ngá nnyo a raŋê nná mbá a sî oyəm a gyê mân ka etím a yên, kən a kâm se Jisos a chə́bhe njəm ka ekpin.

⁹ Ta é si ebhú njí, é ká jae ábho nji á séŋe ka nwet Obhasi sê Jisos a ri a chəbhé njəm ka ekpin.

Jisos a fâp Meri Madarin ka ochî

¹⁰ Ágbán mbá ábháe á chə́bhe mân njəm á kʉra.

¹¹ Kən Meri a gyím áfo ka mkpe oyəm, ńga ka éré a rʉ́rá. A sére, a kêp ka etím oyəm.

¹² Nji a kébhe, a yên baénjel ábháe na ábháré ḿfô ka biji. Baénjel mbá á kûn ka eji á núŋi nná Jisos, yót ebhat echî, nnyo tat ebhat akát.

¹³ Á bhə̂p yê sê, “Mmá, ó rʉra jen?” A táme ábho se, “Á yighi ntûfâm omé, ń ka riŋí mbá á jî kî yê.”

¹⁴ Nne-nkáé nnyó a kpô kpíghí a yên Jisos noŋ a gyím yê ka mkpe biji, kən á ka məŋé se a ri Jisos.

¹⁵ Jisos a bhə̂p yê se, “Mmá, ó rʉra jen? Ó woma énê?” Nne-nkáé nnyó a kí kere se a ri mbábha-ebhin áji nâ á chorá áno na yê. A chôt mbâ Jisos se, “Ńsé, ájoé we nâ o yighî yê, ń gore wâ sə́re ə̂m, ń jí yíghi yê ka eji o kíi.”

¹⁶ Jisos se, “Meri!” Meri a kpíghi fə́ne a táme ka Ibru se, “Raboni.” Nâ se, “Ntóŋá.”

¹⁷ Kən Jisos a sə́re yê se, “Yighî ə̂m obhô, ka n nyə́ne ń ka ji mbâ Ńsé omé ka ósô. Kən choŋ osə́ré ane abhámé se n kí chəbhé njəm mbâ yê nnyo a ri Ńsé omé na owəné eróŋ. Yê nnyo a ri Obhasi omé na obhə́né eróŋ.”

¹⁸ Meri Madarin a jî sə́re fə́ne atóbhá Jisos se yê a yên yê. A sə́re ábho iyîm mbi Jisos a chorê na yê.

Jisos a fâp atóbhá abhê ka ochî

¹⁹ Na egu áji, ka ndaŋa-mbá ofú ogəm, atóbhá Jisos á fîn njû á chə́me ka etím, ka á kí fup atúi-ofâm ane Jus. Jisos a fâp áfo ka ekumi ábho. A kûp ábho se, “Deê Obhasi a joé na ên!”

²⁰ A tóŋe mân ábho abhô amê na egbaŋe ejê. É gyébhe atóbhá abhê kpe-eji nji á yéne Ńtâ Jisos.

²¹ A kpô chot na ábho se, “Obhasi a joé na ên! Ekpak nji Obhasi Ńsé a túmi ə̂m nâ noŋ fə́ne n kí tum ên.”

²² Nji a chorê nná, a fî ábho efébhe, a chôt se, “Kó ên Obhasi Ebhare Ntʉgantʉ.

²³ Nne nnyo ó ri ên nsôn o gyíni ên obhí obhê, Obhasi a kí ri fə́ne nsôn a su obhí nne ányo. Kən ên ó ro ri ên nsôn ó gyíni ên obhí nne, Obhasi á bhó ri fə́ne nsôn a su ḿbə́ne.”

Tomas á ka kam ta a yên Jisos na amə̂t

²⁴ Ebhú Jisos a bháe, ḿgbán owe yót a kamá se Tomas nnyo á bhíŋa se Ofât, á ka joé na atem.

²⁵ Atem á sə́re mân yê sê ábho á yen Ńtâ Jisos. Kən Tomas se, “Ń do yen ánáŋé mma á kúmi yê na mbáŋé ka abhô ta n kə́me ndəré imámé ka ḿmáne, n kə́me fə́ne obhô obhámé ka egbaŋe ejê, ḿ bó kam bəre a ri Jisos.”

²⁶ Ogəm ndə́m ó kpó man, atóbhá Jisos á kpô chəmé ka mmon i njû, Tomas a ri na ábho. Njû a ri mbámám. Kən Jisos a kpô fáp ábho ka ekam a kûp ábho se, “Obhasi ó jóe na ên!”

²⁷ A sə́re Tomas se, “Kəmê ndəré imâ mfá, kêp abhô abhámé. Tə́ne obhô kəmê egbaŋe ejámé. Maghê mân echáám ka ḿbə́ŋé. Yuŋ ḿbə́ŋé eya kî na mme.”

²⁸ Tomas a táme se, “Ntûfâm omé! Obhasi omé!”

²⁹ Jisos a bhə̂p mân yê se, “Ó yuŋ mân ḿbə́ŋé ó ki na mme mfá-mfá ka ó yen ə̂m a? Ane mba á ká yen ə̂m kən á kí ki ḿbə́ŋé na mme, ogyebhá-ḿbə́ŋé ábho ó chiŋi obhô.”

Echî nwet amé nnyí a ri jen?

³⁰ Jisos a yîm biriŋ okpógha-biji etî-etî mbi tat mbi atóbhá abhê á yéne. Kən chénchén cháŋ ka nwet nnyí.

³¹ Kən e séŋe áno mbí mfá sê ó kâm ên sê Jisos a ri Krayis, nne nnyo Obhasi a túmi se a bhá yim ngun á sém. Yê nâ a ri Mmon Obhasi. Nji ó yuŋ ên ḿbə́ŋé o kî ên na yê, o kí fon ên ekpin.