Jon, echî 19 - Ejagham New Testament

¹ Piratus a sə́re á kô Jisos á jî tə̂m.

² Ane-enok á tʉ́ri itam ajoŋe-ájóŋe á kə́bhe yê ka echî, á kâk yê ḿfô noŋ ntûfâm.

³ Á kî yê áfo ka ochî ábho, á bhak á kubha yê ka okagha-ntuŋ sê, “E kí kup wâ, Ntûfâm ane Jus!” Á bhura yê na asâp ka ochî.

⁴ Piratus a kpô fáp a bhâ chôt na ane Jus se, “Yûk ên, n kí ko yê a fáp a bhá. Tîk o kâm ên mân sê ń ka yén kpe ejûm ebhí jə́t nji a yimî.”

⁵ Jisos a fâp mân a bhák na itam ajoŋe mfí ka echî na ḿfô nnyi á kághe nná yê. Piratus a chôt se, “Ńgyê nne nchane.”

⁶ Nji ane-echî akará-agore Obhasi na abhábhá-ókʉ́rí Obhasi á yéne yê, á kûk káŋ káŋ káŋ sê, “Kûm yê ka ego! Kûm yê!” Piratus se, “Kô ên yê choŋ okúm ên afoné, ka ń ka yén kpe ejûm ebhí jə́t nji a yimî.”

⁷ Ane Jus mbá sê, “A gbô ebhín ejə́ré, ka a sə́re se yê a ri Mmon Obhasi. Ka obhô mbí, a ri a kpó.”

⁸ Piratus a kpo yúk nchot nnyí, efup é yîm mân yê é chíŋi ochíŋ.

⁹ A chə́bhe njəm ka etím ókʉ́rí, a jî bhə̂p Jisos se, “We o dʉ fan?” Jisos á ka támé yê kpe nchot.

¹⁰ Piratus se, “Ó bhó tame ebhə̂p ejámé a? Ó ka məŋé se ḿ fon ikom mfi ń səre bəre á nyáŋe wâ obhô á nyáŋe. Ń səre bəre á kúm wâ ka ego, á kúm a?”

¹¹ Jisos se, “O fonê ikom áfi ka Obhasi nâ a karê wâ. Nne mân nnyo a fiî ə̂m a karê wâ nâ á yim ekpatə́m obhí mbi ó chíŋi ochíŋ.”

¹² Ka ngyím ányi, Piratus a chə́bhe mân a kaghá ikom se yê a yim á nyáŋe Jisos obhô. Kən ane Jus mbá á kə̂t á kughá sê, “Ó nyaŋé nne nnyó abhô, məŋê se we ó chəbhe nne ebhan í Ntûfâm i Rom. Kpe énê nnyo á ko biji se yê a ri ntûfâm, nâ a túi áno a ri Ntûfâm i Rom.”

¹³ Ebhú Piratus a yúghi nchot nnyí, a kô mân Jisos a fâp a bhák ka éré. Yê ḿfoné a kúmi ka ekumi otáŋá-nchot. Eji ekumi njí é rî ka eji etat nji á bhíŋa sê Ebhə̂k Atáé-átáe. Á bhíŋa ka eyum ane Ibru sê Gabata.

¹⁴ Ofú ábhi a ri egu erom í Ntə̂m Osʉ́ŋ. Ńkánínká ta a kí si eságasá. Piratus a sə́re ane Jus mbá se, “Yên ên ntûfâm owəné.”

¹⁵ Á kûk sê, “Yúi yê! Yúi yê! Kúm yê ka ego!” Piratus a bhə̂p ábho se, “O kí wom ên ń kúm ntûfâm owəné ka ego a?” Ane-echî akará-agore Obhasi á táme sê, “É ka kpó fon ntûfâm etat é chíŋí Ntûfâm i Rom.”

¹⁶ Piratus a kô mân Jisos a káre se á jí kúm ka ego. Nji Piratus a nyaŋê Jisos a káre ábho, á kô yê

Á kum Jisos ka ego

¹⁷ á káre ego nji á kí ji yê okúm sê a kə́n. A kə̂n fə́ne a jak na ábho ta a sî eji etat nji á bhíŋa sê Ékə́p-Echî. Ka eyum ane Ibru á bhíŋa sê Gogota.

¹⁸ Á kûm mân yê ka eji njí. Á kûm fə́ne ane etat ábháe ka mma ábho ágo, á tə̂p, yót mkpe obhô-orûm í Jisos, nnyo tat mkpe obhô-okáé.

¹⁹ Piratus a sêŋ ejûm, á yághe njəm-ósô ego nji á kúmi Jisos. A séŋe se, “Jisos nnyo nne Nasaret, ntûfâm ane Jus.”

²⁰ Ane Jus etî-etî á bhîŋ ejûm njí, ka eji á kúmi yê é ká rap mbá na eték. Á séŋe ejûm njí ka nyum i nték ésá, Ibru na Laten na Grik.

²¹ Kən ane-echî akará-agore Obhasi á sə́re Piratus sê, “Ka séŋ se ntûfâm ane Jus. Sêŋ se nne nnyó se yê a ri ntûfâm ane Jus.”

²² Kən Piratus se, “Nji ń seŋ, n séŋe áno oséŋ.”

²³ Ane-enok á kpó kum Jisos ka ego, á kíri ḿfô eye ka ngûm énî, kpe nnyón á kô eye. Kən nkʉ̂ eye yə́t a kə̂t. Á ká jəm nkʉ̂ nnyí ojəm, á kóe éfô jə́t á tûp otúp na arík.

²⁴ Ane-enok mbá á sə́re atem sê, “E kâ wáre nkʉ̂ nnyí owáré. É túp ebháŋé. Nne nnyo é gbo é káre yê, a kô.” Ńji é fap fə́ne noŋ á séŋe ka nwet Obhasi sê, “Á kíri ḿfô amé á kô á tûp ebháŋé á yén nnyo a kí ko nkʉ̂ amé.” Ka ekpak njí fə́ne nâ ane-enok á yími.

²⁵ Nnyen i Jisos a gyím áfo kpít na ego nji á kúmi nná mmon. Mmon-i-nnyen i nnyen a ri fə́ne áfo na Meri nnyo nkáé Kropas na Meri Madarin.

²⁶ Jisos a yên nnyen na ḿgbán nnyo yê a garê a kôt. A sə́re nnyen se, “Mmá, ńgyê mmon owa nná.”

²⁷ A sə́re fə́ne ḿgbán nnyó se, “Ńgyê nnyen owa.” Ta ka ofú ábhi, ḿgbán nnyó a kô nnyen i Jisos a chə́bhe a kúmá ka ókʉ́rí obhê.

Jisos a kpô

²⁸ Ḿma á kpó chiŋ, Jisos a mə́ŋe se nchot a mân. Ka ejeghém achot mma á séŋe ka nwet Obhasi a chôt se, “Ayép á kí kot ə̂m.”

²⁹ Ekâ aməm etat á rî áfo ka ékpáŋkpáŋ esúi. Á kô ítí ísop, á bhôp égúsá ka echî, á bhî ka aməm mmá á yûŋ á tə́me yê ka nnyo.

³⁰ Nji a gwóe aməm mmá a chôt se, “A mân.” A bhî echî ka nsi, a sére.

Á jəm mkpe egbaŋe Jisos na érôp

³¹ Ka egu ofú oyoá-biji, atúi-ofâm ane Jus á jî sə́re Piratus sê a karé ikom á bhə́n akát ane mba á kúmi nná ka ego, á yíghi ábho. Echî é rî sê á ká wom sê ofú oyoá-biji mbí títí ó kpúghí ane mbá ka ego, ka ó faŋ ó chiŋi ochíŋ.

³² Ane-enok mbá á bhâ bhə̂n akát í nne nnyo ndaŋa-mbá, á bhə̂n nnyo ngá. Nâ ane mba á kúmi nná ebhú jə́t na Jisos.

³³ Á kpó to á sí Jisos, á yên sê ta a kpô. Á kpére á mághe, á ká bhən yê akát.

³⁴ Kən nne ábho yót a jə̂m mkpe egbaŋe Jisos na érôp, agyʉ́ŋ na ayép á fə̂m fə́ne ntə̂m yə́t.

³⁵ Nne nnyo a yéne achot mmá oyén nâ a sə́re noŋ ntî-isê, se ó yûŋ ên fə́ne ḿbə́ŋé ó kí na Jisos. A mə́ŋe se nji yê a sə́re é rî ka echî, áfúbhí cháŋ.

³⁶ Achot mmá á fap fə́ne ka etʉri noŋ á séŋe sê, “Kpe ékə́p jə́t ka biji ibhê á bhó bhən.”

³⁷ Á séŋe fə́ne ka eji etat sê, “Tîk á yûŋ amə̂t á kêp yê nnyo á jə́me áno.”

Á kən Jisos

³⁸ Ḿma á kpó chiŋ, nne-ndûm yót a kamá se Jusep, a dʉ eték í Arimatiya. A bhâ bhə̂p Piratus se a karé yê ikom yê a jí yighí ékpoê biji Jisos a kə́n. Yê Jusep a ri ntóbhá Jisos, kən á tobha yê ka ebhə̂t, ka á fubhá atúi-ofâm ane Jus. Nji Jusep a bhə́bhe Piratus ikom mfí, Piratus a kâm. Jusep a bhâ yíghi mân biji Jisos ka ego, a kô, a jak.

³⁹ Nikodemus nnyo a raŋê nná mbá a bhák mbâ Jisos na atʉ́, a tôp Jusep, a jak. Yê, Nikodemus, a jiî na njân etat mmi á jóma nkə́bha-nsi sê a kâ châ. Njân mmí ń káma sê máya na aro. Mmi a kóe a jak ń kí sui kpe ekîm í ntâk owurinó.

⁴⁰ Á kô njân mmí á jóme Jisos. Á kô ébháré-éfô á bhôp yê ka ekpak nji ane Jus á bhóbha nkə́bha-nsi.

⁴¹ Mmon ebhin etat a ri ka eji á kúmi nná Jisos. Oyəm ofê ó rî ka ebhin njí, nne á ká nok okə́n ka ḿbə́ne.

⁴² Noŋ é rî egu ofú oyoá-biji ane Jus, oyəm mbí fə́ne ó rî áfo kpít, á kə̂n Jisos ka eji njí.