Jon, echî 18 - Ejagham New Testament

Á wubhi Jisos

¹ Jisos a kpo to a man agore mmá chénchén, a mághe na ágbán abhê á jî yáŋe á jak ebhat í ńcherê nnyi Kidron. Ebhin órif é rî ebhat njí. A gyê ńjə́ne na ágbán abhê.

² Juda nnyo ngura Jisos a mə́ŋe eji njí nono, ka Jisos á chəmá na ábho áfo chénchén ebhú.

³ Juda a kô mân ane mba ane-echî akará-agore Obhasi na echəme ane Farasi á túmi, a bhák ka eji njí. Ane mbá á rî ane-enok na abhábhá-ókʉ́rí Obhasi. Á bháe na iyîm enok, á fî átʉ́ríkáŋ, á nyóe ńsáé.

⁴ Jisos a mə́ŋe chénchén nji é bhâk ofáp, a chêm a kpúghi ábho, á bhə̂p se, “Ó woma ên énê?”

⁵ Á táme sê, “É woma Jisos, mmon i Nasaret.” Jisos se, “Ńgyê mme nná.” Juda nnyo ngura Jisos a gyím áfo na ábho.

⁶ Nji Jisos a toê se, “Ńgyê mme nná”, ane mbá á jak njəm-ńjə̂m, njəm-ńjə̂m, á jî gbô ka nsi.

⁷ Kən Jisos a kpô bhə́p ábho se, “Ó woma ên énê?” Á táme sê, “É woma Jisos, mmon i Nasaret.”

⁸ Jisos se, “Ń daŋ mbá ń səre ên bəre mme a ri Jisos nchane. Ájoé mân ó woma ên ə̂m, maghê ên mba ngá á jî.”

⁹ A chôt áno se é fáp ekân-ekân ekpak nji a sə́re Ńsé owe se, ka ane mba a karê yê, kpe yót á ka tán.

¹⁰ Simun Pita a ri áfo na akparanja amê. A yə̂p a gbût otûŋ obhô-orûm mbi nsʉ́ŋ nnyo ntûfâm akará-agore Obhasi. Mbiŋ i nsʉ́ŋ nnyó á kamá se Machus.

¹¹ Kən Jisos a sə́re Pita se, “Chəbhê njəm fê akparanja amâ ka mbâk. Ńsé omé nâ a túmi ə̂m se ḿ bá yén oseŋe mbí, n kâ yên a?”

Á ko Jisos á bha ka ochî Anas

¹² Ekam ane-enok njí na ntûfâm ábho na abhábhá-ókʉ́rí á fî Jisos á bhôp abhô.

¹³ A kô yê kpá a jak mba Anas. Anas a ri ńsé nkáé Kayifas nnyo a ri ntûfâm akará-agore Obhasi eyâ áji.

¹⁴ Kayifas ngá nâ a táe nná atúi-ofâm ane Jus etí se é nóbhe sê nne yót a kpó, na nji ane chénchén á kpó.

Pita se yê á ka məŋé Jisos

¹⁵ Simun Pita na ḿgbán i Jisos nnyo tat á tôp Jisos á jak. Ntûfâm akará-agore Obhasi a mə́ŋe ḿgbán nnyó nono. Ka obhô mbí, á kâm yê a gyê ka etím ókʉ́rí mbí na Jisos.

¹⁶ Á ká kam Pita a gyé ka etím ókʉ́rí, a kə̂t a re ka nnyo-mbá. Kən ḿgbán nnyo ngá nnyo ntûfâm akará-agore Obhasi a məŋê a chə́bhe njəm a bhâ chôt na mmon i nkáé nnyo a gyím ibhábhé ka nnyo mbá. A kô mân Pita a gyê ka etím ókʉ́rí.

¹⁷ Mmon i nkáé nnyó a bhə̂p Pita se, “To we ḿgbán i Jisos eróŋ?” Kən Pita a táme se, “Ée, mme asík.”

¹⁸ Egyʉk é rî ebhú áji. Ágbán í ntûfâm akará-agore Obhasi na abhábhá-ókʉ́rí Obhasi á fə́ghe ngun á kúmi á fáre, á kí yobhe. Pita a jî chə̂m ábho a kí yobhe fə́ne.

Ntûfâm akará-agore Obhasi a kí bhəp Jisos bibhə̂p

¹⁹ Ntûfâm akará-agore Obhasi a bhə̂p Jisos achot atóbhá abhê na okpígha-ejûm obhê.

²⁰ Jisos se, “Ń chorá jáé kpe bhaghé ebhú, ngun ndə́m á yugha. Ḿ kpik achot amámé chénchén ka óchâm Obhasi na ókʉ́rí achot Obhasi. Nâ ngûm nnyi ane Jus chénchén á chə́ma. Kpe nji n chorê ka ebhə̂t cháŋ.

²¹ Echî mân nji o kí bhəp ə̂m a ri jen? Bhə̂p ane mba á yúghi okpígha-ejûm obhámé. Ábho á məŋe iyîm mbi n chorê.”

²² Nji Jisos a chorê nná, mbábha-ókʉ́rí yót nnyo a gyím áfo a sûm yê nsâp, a chôt se, “Énê a sə́re wâ se o támá ntûfâm akará-agore Obhasi nchot áno.”

²³ Kən Jisos se, “Ájoé nji n chorê é ji nchík, sə́re se yên nji é jíi nchík. Ájoé kpe nji é jíi nchík cháŋ, o súmi ə̂m mân áno jen?”

²⁴ Anas mân se á kó Jisos á jî mba Kayifas nnyo ntûfâm akará-agore Obhasi. Jisos a nyə́ne abhô mbóbhóm.

Pita a kpô taŋé se yê á ka məŋé Jisos

²⁵ Pita a nyə́ne ka mkpe ngun nnyí a yóbhá. Ane mba á rî fə́ne áfo á bhə̂p yê sê, “To we a ri ntóbhá nne ányo yót?” Kən Pita a kpô taŋé se, “Ée, mme asík.”

²⁶ Nsʉ́ŋ i ntûfâm akará-agore Obhasi yót, nâ nnyo Pita a gbúri nná otûŋ í mmon-i-nnyen, a bhə̂p Pita se, “Ń ka yén wâ ka ebhin áji na nne ányo a?”

²⁷ Kən Pita a kpô taŋé. Ka nkúbhi ebhú áji, ndûm nkok a kûk.

Jisos ka ochî Piratus

²⁸ Á kô mân Jisos ka njû Kayifas á jak ka ókʉ́rí Piratus, nne Rom nnyo a ri ntûfâm eték. Ka ebhú njí, ofú ó roghe eyuŋúm. Atúi-ofâm ane Jus á ká gye ka etím ókʉ́rí mbí. Echî aŋ? Ebhín ábho é fíi sê, á gye nâ á nyaghe biji ábho, erom í Ntə̂m Osʉ́ŋ á ro kpó di.

²⁹ Ka obhô mbí, Piratus a fâp a kpúghi ábho, a bhə̂p se, “Sê nne nnyó a yimî ên jen?”

³⁰ Á táme sê, “A rô yim êt ejûm asík kə́n é ka kó yê é bhá mbâ eya.”

³¹ Piratus se, “Nâ ên afoné, kô ên yê á jí taŋ ka ekpak ebhín ejə́né é fíi.” Kən ane Jus mbá sê, “Êt é ka fon ikom mfi e kí yui nne kpe yót.”

³² Ńnyi a fábhe a yim nchot nnyi Jisos a chorê a kpê na ekpak ekʉ̂ ejê, a joé ka echî.

³³ Piratus a chə́bhe njəm ágo ka etím ókʉ́rí, a bhîŋ Jisos a bhə̂p se, “We nâ o ri ntûfâm ane Jus a?”

³⁴ Jisos a bhə̂p fə́ne yê se, “Ebhə̂p njí é dʉ̂ wâ ka nnyo kən ane etat nâ á sə́re wâ nchot á kpê na mme?”

³⁵ Piratus se, “Ó kera tîk se mme nne Jus? A ri ane abhâ na ane-echî akará-agore Obhasi nâ á gbíbhi wâ á káre ə̂m. O yimî jen?”

³⁶ Jisos se, “Otúi obhámé cháŋ mfá ka nsi. Ó rî mfá eê, kə́n ane abhámé á gyími enok, sê atúi-ofâm ane Jus á kâ fî ə̂m. Otúi obhámé cháŋ mfá.”

³⁷ Piratus a bhə̂p yê se, “Nâ we a ri ntûfâm a?” Kən Jisos a táme se, “Nchot eya a ri ka echî. Á jíi ə̂m m bák ka ngun bəre ḿ bá sə́ré ane mfoné nchot Obhasi. Kpe énê nnyo a kamê na mfoné nchot nnyí a kí yuk nchot amé.”

³⁸ Piratus a bhə̂p mân yê se, “Mfoné nchot nâ jen?” Nji Piratus a bhə́bhe nchot nnyí, a kpô ji ka éré a jî kpúghi ane mba á rî ágo, a chôt se, “Mbâ amé, ń ka yén kpe echî nji n kí bhibhi nne nnyó.

Á kimi ngom ekʉ̂ á kare Jisos

³⁹ Kən ó fon ên erû nji kpe njə́n erom í Ntə̂m Osʉ́ŋ n yíghi nne nnyo o korê ên ka ókúmí. Ń yíghi ntûfâm ane Jus a?”

⁴⁰ Kən ane á kûk sê, “Ka yíghi yê. Yighî Barabas.” Barabas a ri ka ekam ane mba á bháe na onyʉk etat ka eték.