Jon, echî 13 - Ejagham New Testament

Jisos a tóŋe se nne nnyo a faŋê a chîŋ ochíŋ cháŋ

¹ Erom í Ntə̂m Osʉ́ŋ é kət ofú bhə́t. Jisos a mə́ŋe se ebhú é si nji yê a kí maghé ngun nnyí a chəbhé njəm mbâ Ńsé owe. Ka ekumi ejê ka ngun, á korá ane abhê. A korê ábho a jéghe ojeghé.

² A bhâ kúmi mân na ágbán abhê, á kí di édî. Ntûfâm obhí ta a kâk Juda íkíkéré ka echî se a gurí Jisos. Juda a ri mmon i Simun Iskariyot.

³ Jisos a mə́ŋe se Ńsé owe a káre yê ikom chénchén. A mə́ŋe se yê a dʉ mbâ Obhasi Ńsé, a kí chəbhé fə́ne njəm mbâ eye.

⁴ Nji á kûn á kí di édî, a rúi ngyím, a yíghi ewubha-wubha nkʉ̂ ejê. A kô íkpáŋ-inokun a bhôp ka ebhûn.

⁵ A kô ayép a kâk ka ékpáŋkpáŋ abhô, a róghe akát ágbán abhê esuúm a fóná na íkpáŋ mfí.

⁶ Kən a kpô sí se yê a su mma Simun Pita, Simun Pita a bhə̂p yê se, “Ntûfâm, o kí su ə̂m akát eróŋ á?”

⁷ Jisos se, “Ó ka məŋé ejûm nji ń yimá áno, kən tîk o mə́ŋe ka nsígha-njəm ebhú.”

⁸ Pita se, “Kpák, we asík ó bhak ə̂m akát osu.” Kən Jisos se, “Ó ro kam ń sû wâ akát, ó ro joé ḿgbán omé.”

⁹ Simun se, “Ntûfâm, nâ ka sû ə̂m akát-ákât, su ə̂m fə́ne abhô na echî.”

¹⁰ Jisos se, “Kpe énê nnyo a yumî ayép, á ka kpó fon akôp. Ayép etat a rô yumí təm akát esuúm. Chénchén ên kpe nnyo a fonê akôp cháŋ təm nne owəné yót.”

¹¹ Jisos ta a mə́ŋe nne ábho nnyo a kí gurí yê. Nâ ńjə́ne a chorê se təm nne ábho yót nâ a fonê akôp cháŋ, é ká chiŋi yót.

¹² Nji a manê ábho akát esuúm, a chə́bhe njəm a kâk nkʉ̂ eye, a jî kúmi ka ekumi ejê. A bhə̂p mân ábho se, “Ó məŋe ên ejûm nji n yimî áno mbâ eyəné a?

¹³ Ó bhiŋá ên ə̂m sê Ńsé, o bhiŋá ên ə̂m sê Ntûfâm. Ó ka tán ên mbá, ka nâ ńgyímí amé ka ekam ejə́né.

¹⁴ Ájoé mân mme, ka ntûfâm owəné na ńsé owəné, ń su ên akát, ên o fonê ên fə́ne ka esuúm akát atem.

¹⁵ N yimî noŋ erû bəre ên ó yîm ên fə́ne ka ekpak njí.

¹⁶ Deê ń sə́ré ên ka etʉri bəre kpe ḿgbán yót nnyo a kí faŋ a chíŋí ńsé cháŋ. Nne nnyo á túmi otúm á bhó faŋ a chíŋí nne nnyo a túmi yê.

¹⁷ Nji mfá-mfá ó məŋe ên ekpak é rî, o kí fon ên ekpatə́m ogyebhá-ḿbə́ŋé ájoé ó yim ên ka ekpak o yúghi ên.

¹⁸ Ḿ bó chot nchot nnyí mbâ eyəné chénchén. Ḿ məŋe ên mba n sáŋe. Kən deê é jóe ka ekpak á séŋe á kâk ka nwet Obhasi sê, ‘Nne nnyo á dik ékpáŋkpáŋ édî jə́t, nâ a kí gurí yê.’

¹⁹ N sə́re ên áno mfá-mfá kən achot í nchane á fáp. Ebhú á kpo fap, tîk o kâm ên mân sê nâ mme nná.

²⁰ Deê ń sə́ré ên ka etʉri bəre nne nnyo á fi nne nnyo n túmi nono, a fiî ə̂m áno. Ó fi ə̂m nono, nâ ó fi yê nnyo a túmi ə̂m eróŋ.”

Jisos se ḿgbán owe yót tîk a gúri yê

²¹ Nji Jisos a kpô chot njí, nsae a súi yê ḿbə́ŋé. A sə́re ágbán abhê jáé se, “Deê ń sə́ré ên ka etʉri bəre nne owəné yót tîk a gúri ə̂m.”

²² A kpó chot nchot nnyí, ágbán abhê á kə̂t á kebha atem ka amə̂t. Kpe nne ábho nnyo a məŋê ntem nnyo ńsé ábho á chorá áno cháŋ.

²³ Ḿgbán yót nnyo Jisos a korê a kun kpít na yê.

²⁴ Kən Simun Pita a bhî nnyo a sə́re ntem owe nnyó se, “Bhə̂p yê a sə́ré nne nnyo a kí gurí yê.”

²⁵ Ḿgbán nnyó a cháe a kpúghi Jisos a bhə̂p yê se, “Ntûfâm, énê nchane nnyo a kí gurí wâ?”

²⁶ Jisos se, “Nne nnyo n kí bhi édî njí ka isú n káre yê, a ri yê.” A bhî fə́ne ńjə́ne, a kô a káre mbâ Juda nnyo mmon i Simun Iskariyot.

²⁷ Ka ngyím ányi nji Juda a kóe édî njí, Satan a gyʉ̂t yê ka echî. Jisos a sə́re yê se, “Nji o fonê ka eyimím, yim babhap.”

²⁸ Kpe nne ábho yót áfo á ka məŋé echî nchot nnyi Jisos a chorê nná mbâ Juda.

²⁹ Echî aŋ? Juda nâ á fik ntí. Atem á kí kere mân sê Jisos á səra yê se a nam iyîm mbi ábho á wóme ka erom. Na kpe é rô joé áno, nâ ebhú tat Jisos a sə́re Juda se a karé mkpât ejûm mbâ akpák.

³⁰ Nji Juda a kóe édî njí mbâ Jisos, a yə̂p a fábhá fə́ne ntə̂m yə́t. Ta atʉ́ á nyak.

Jisos a sə́re ágbán abhê se á korá atem

³¹ Juda a kpo ji, Jisos a sə́re atem mba ngá se, “Obhasi a róghe mân ejík í Mmon-i-ntem-nne etóŋóm. Ejík Obhasi fə́ne é kí fap jáé ka obhô Mmon-i-ntem-nne.

³² Ájoé ejík Obhasi é kí fap jáé ka obhô Mmon-i-ntem-nne, Obhasi tîk a tóŋe fə́ne ejík ejê ka nji á kumí na yê. A kí yim njí mfá-mfá.

³³ Abhon abhámé, tîk ń do kpó joé na ên ebhú é râp. Tîk o wôm ên ə̂m, kən noŋ n sə́re fə́ne atúi-ofâm ane Jus, ó ka bhik ên ebháám mbá n kí ji.

³⁴ N kí karé ên ebhín efê, bəre ó kôt ên atem. Ekpak nji mme n korê ên, kot ên atem.

³⁵ Ó fon ên okot na atem, ngun ndə́m tîk á mə́ŋe sê ó tobha ên ə̂m.”

Jisos se Pita tîk a táŋe yê

³⁶ Kən Simun Pita a bhə̂p yê se, “Ntûfâm, o kí ji fan?” Jisos se, “Ka mfá-mfá ó bhó bhik ə̂m etóbhóm mbá ń jak áno, kən ka nsígha-njəm ebhú, tîk o tôp.”

³⁷ Pita se, “Ntûfâm, jen kən ḿ bó bhik wâ etóbhóm mfá-mfá? Mme kpe ekʉ̂ ń kam, tîk m kpô ka echî ejâ.”

³⁸ Jisos a bhə̂p yê se, “Se o kí kpo ekʉ̂ ka echî ejámé a? Deê ń sə́ré wâ mân ka etʉri bəre kən nkok echî-ofú a bhá kuk, we tîk o táŋe se ó ka məŋé ə̂m, ntə̂m-ntə̂m ésá.”