Jon, echî 12 - Ejagham New Testament

Meri a rʉ́ri Jisos mbít

¹ Mfín a kə̂t eságasá kən erom í Ntə̂m Osʉ́ŋ é sí. Jisos a mághe a jak Betani, eték í Lasaros nnyo a kpóe nná kən yê a sʉk.

² Ane á yâm édî á gyê Jisos. Mata nâ a jighî ńjə́ne ojighí. Lasaros a chə̂m fə́ne abhô na ane á kí di édî njí na Jisos.

³ Kən Meri a kə̂n ékpímí akʉ́ ndə́m mma á kpóe ntí, a bhâ yʉ́ri Jisos ka akát. Á yími akʉ́ mmá na mfoné-mfoné nât. A kô nnyʉ̂-echî eye a kí fon. Egyʉ akʉ́ mmá é súi njû.

⁴ Nji Meri a yimî ejûm njí, ḿgbán i Jisos yót a kamá se Juda Iskariyot, nnyo a kí gurí nná Jisos a chôt se,

⁵ “Kə́n á ká ko akʉ́ mmá á gúri ka ntâk i ntí kpe ésá, á káre mbâ akpák a? Echî ebhíbhím njí a ri jen?”

⁶ Juda á ka chot ka a fonê nsôn na akpák, kən a chorê na ḿbə́ŋé nnyágha-ejʉ̂. Ka ágbán í Jisos, yê nâ a ri mfigha-ntí. Chénchén ebhú nji á chui ntí mmí á káre yê, a kí ko a nyáŋá ibhê biji.

⁷ Kən Jisos a táme Juda se, “Deê nne-nkáé nnyó a yim nji á yimá. Ḿfa nâ nji yê a fonê a rʉ́rí ə̂m mbít.

⁸ Akpák á kí joé na ên chénchén ebhú, kən mme ḿ bó joé.”

⁹ Ane etî-etî ka Judiya á yûk sê Jisos a ri Betani, á yə̂p á jak ágo. Á ká ji ka obhô Jisos átíŋ, á jíi fə́ne á jí yén Lasaros nnyo Jisos a sʉghî ka ekʉ̂.

¹⁰ Ka obhô mbí, ane-echî akará-agore Obhasi á bhôp ekubhi sê á yúí fə́ne Lasaros.

¹¹ Echî aŋ? Nji é fábhe na Lasaros é yim etî-etî ane Jus á kí maghé atúi-ofâm ábho á yuŋá ḿbə́ŋé á kik na Jisos.

Jisos a gyê Jerusarem na ekpatə́m ejík

¹² Ofú ó kpó che ntem-ofú, njok ane mba á bháe nná Erom í Ntə̂m Osʉ́ŋ á yûk sê Jisos a kə́ bha Jerusarem.

¹³ Á gbût amâŋ-abhî á fî, á jak á jí kpúghí yê. Á kughá sê, “Ekûp na ejík é jóe é káre Obhasi. Deê enare Ńtâ Obhasi é jóe na nne nnyo a kə́ bha ka mbiŋ eye. Deê enare Obhasi é jóe na Ntûfâm ane Isrel.”

¹⁴ Jisos a kô mmon i mfoŋ-anyanyâ a kúmi. Nâ noŋ fə́ne á séŋe ka nwet Obhasi sê,

¹⁵ “Abhon eték í Jerusarem, ka fôn ên efup, ńgyê ntûfâm owəné a kə́ bha. A kə́ bha ka njəm i mmon i mfoŋ-anyanyâ.”

¹⁶ Kən echî achot mmá á ka jáé ágbán í Jisos ka ebhú njí. Ebhú Jisos a kpô nyəmé ka ekʉ̂, Obhasi a yûŋ yê a káre ejík, á kí tit mân sê nâ noŋ á séŋe á kpê na yê. É fap fə́ne ka ekpak á séŋe.

¹⁷ Ekam ane nji é rî ebhú Jisos a bhiŋî Lasaros ka oyəm a yîm yê a chə́bhe njəm ka ekpin, á nyə́ne á jabha esə́re njí ka ngûm.

¹⁸ Nâ ńjə́ne njok ane á fábhe sê á bhá kpúghí yê, ka á yuk eriŋ okpógha-biji nji a tóŋe.

¹⁹ Kən ane echəme Farasi á kpó yen áno, á kə̂t á chorá ábho-ábhô sê, “To ó yen ên sê enoghóm ejə́ré é kí tan otán. Yên noŋ ngun ndə́m á tóbha nne nnyó.”

Kpe ane Grik á kí wom Jisos

²⁰ Ane Grik etat á jíi fə́ne ogora-Obhasi ka Jerusarem ka ebhú erom njí.

²¹ Á bhâ kpúghi Firip nnyo a dʉ eték í Besayida ka Gariri, á sə́re yê sê, “Ńsé, e kí wom é yén Jisos.”

²² Firip a jî sə́re Andru, á chə̂m ábho ábháe á sə́re Jisos.

²³ Nji á sə́re yê, a chôt se, “Ebhú é si mân nji á kí karé Mmon-i-ntem-nne ejík.

²⁴ Deê ń sə́ré ên ka etʉri bəre mməghe nkʉi á kərá mməghe nkʉi ta á bhê ka nsi, a kpô. Á kpo, kən a kí dʉ a karé nkʉi a tí.

²⁵ Nne nnyo se ekpin ejê nâ é fáŋe é chîŋ é kí tan yê, kən nnyo á ka yim áno, a kí fon ekpin ótúm-ótúm.

²⁶ Nne nnyo á wóm ə̂m etʉ́ghʉ́m, a ri a tóp ə̂m. Chénchén ágbán abhámé á kí joé ka eji mme ḿfoné n di. Ńsé omé tîk a jíghi nne nnyo a kí tʉk ə̂m.”

Jisos se tîk á yúi yê

²⁷ Jisos se, “Mfá-mfá n di na ekpatə́m í nsae ka ḿbə́ŋé, n kí chot jen? Ń sə́ré Ńsé omé bəre a gbʉ́í oseŋe mbí ó kâ bhâ ə̂m mbâ biji tîk? Ée! Ńji nâ é kóe ə̂m é bhak ka ngun, bəre ḿ bá yén oseŋe mbí.

²⁸ Ńsé, yim ejík é jóe é káre mbiŋ eya.” Nji a chorê áno, eyum é fâp nnyi ósô se, “Ń yim mbiŋ amé a fôn ejík, n kí kpo yim.”

²⁹ Ekam ane nji é gyím áfo á yûk ejok njí, sê a ri nsân. Etʉ̂ sê énjel a chôt na yê.

³⁰ Kən Jisos se, “Eyum nji o yúghi ên áno, é ká chot ka obhô obhámé, a ri ka onono obhə́né.

³¹ Ebhú é si nji Obhasi a kí taŋ ngun. É si nji Obhasi a kí bhibhi ikom í ntûfâm obhí.

³² Ebhú á tʉghi ə̂m ka ósô, n kí chəmé ane chénchén á chə́bhe abhámé.”

³³ Ka nchot nnyí, Jisos a tóŋe ekpak ekʉ̂ nji yê tîk a kpô.

³⁴ Kən ekam ane njí á sə́re yê sê, “Nwet Obhasi a toê se Krayis á bhó kpo, yê nnyo Obhasi a kí tum se a yim êt é sém. O kí yim nan ó sə́ré se tîk á tʉ́ghi Mmon-i-ntem-nne ka ósô. Mmon-i-ntem-nne nchane nâ nnyón?”

³⁵ Jisos se, “Yê nnyo a ri ebhát, á bhó joé na ên ebhú é râp. Nne a jen mfá-mfá nji ebhát é nyə́ne na ên, o kâ kúmi ên ejírim é gbô. Nne nnyo á jená ka ejírim á bhó məŋé mbá á jak.

³⁶ Kî ên ḿbə́ŋé na ebhát njí, nji é nyə́ne nná na ên, ó chə́bhe ên abhon ebhát.” Nji Jisos a kpô sə́ré ábho nchot nnyí, a mághe a jî wôm eji a bhə̂t.

Ane Jus á nyə́ne á ká yuŋ ḿbə́ŋé á kí na Jisos

³⁷ Kpe na biriŋ okpógha-biji etî-etî mbi Jisos a tóŋe ane Jus á yên, á ká ki ḿbə́ŋé na yê.

³⁸ Ńji é fap fə́ne ka ekpak nji nkara-otîp Obhasi nnyo á kamá se Asaya a séŋe se, “Ńtâ Obhasi, énê nnyo a kâm na otîp mbi e yúghi e sə́re ábho. Ntûfâm a tóŋe ikom ifê mbâ bhaghé énê?”

³⁹ Ka obhô mbí, á ká məŋé okí ḿbə́ŋé. Asaya fə́ne a chorê se,

⁴⁰ “Obhasi a toê se, Ń tane ábho amə̂t, ḿ bəm ábho ḿbə́ŋé á kâ yên mbá, á kâ fôn íkíkéré ka ḿbə́ŋé. N dô yim áno eê, kə́n á kpíghi á tôp ə̂m, n yîm ábho á sôn.”

⁴¹ Asaya a chorê nchot nnyí, ka a yên ejík í Jisos kən a kí chot fə́ne a kpek na yê.

⁴² Kən kpe noŋ é rî áno, ane-echî etî-etî á kî ḿbə́ŋé na Jisos, kən á ká toŋe jáé. Á kí fup ane echəme Farasi á kâ bhâ otaŋé ábho egyéém óchâm Obhasi.

⁴³ Echî aŋ? Á kóre ejík atem-ane á chiŋi nji Obhasi.

⁴⁴ Jisos a bhâ sə́re mân ane jáé se, “Nne kpe nnyón nnyo á yuŋ ḿbə́ŋé a kî na mme, á ka kí na mme átíŋ, a kî na yê nnyo a túmi ə̂m.

⁴⁵ Nne nnyo á yen ə̂m, a yên fə́ne yê nnyo a túmi ə̂m.

⁴⁶ M báe ka ngun nnyí noŋ ebhát bəre kpe énê nnyo a yuŋî ḿbə́ŋé a kî na mme a kâ kə̂t ka ejírim.

⁴⁷ Nne nnyo á yuk otîp obhámé, kən á bhó yim ka ekpak nji a yúghi, mme asík n kí bhibhi yê. Echî aŋ? Ń ka bhá ḿ bá bhíbhí ngun, kən m báe bəre ngun á sém.

⁴⁸ Nne nnyo á taŋé ə̂m, otîp obhámé á ka yúk, a fôn nne nnyo a kí bhibhi yê. Achot mmá ń chorá nná nâ á kí bhibhi yê ka ntəma-njəm ofú.

⁴⁹ Nâ noŋ é kí fap, ka ń ka chot ka ikom ifámé. A ri Obhasi Ńsé yê ḿfoné nnyo a túmi ə̂m nâ a karê ə̂m ikom se ń chôt.

⁵⁰ Ḿ məŋe ngá bəre nji yê á chot é kára ekpin ótúm-ótúm. Nji-nji ń chorá mân é dʉ̂ ka ekpak nji Ńsé a sə́re ə̂m se ń chôt.”