Jon, echî 10 - Ejagham New Testament

Egan í mfoné-mfoné mbábha-obhúi

¹ Jisos se, “Deê ń sə́ré ên ka etʉri bəre nne nnyo á ka chíŋ ka mfoné nnyo-mbá kən a gyé ekam obhúi, a gyʉ̂t a ri ebhat etat a gyê, a ri nnyágha-ejʉ̂. A ri nne nnyo a kí yui nne ka ejʉ̂.

² Nnyo á chiŋ ka mfoné nnyo-mbá, a ri mfoné mbábha-obhúi.

³ Mbábhá-nnyo-mbá a kí maghé nne nnyó a chíŋ ka tebhe. Obhúi obhê mbí ó kí yuk ekpak nji yê á bhiŋá ábho ka obhiŋ ka obhiŋ a chə́me a kô a jak.

⁴ Á ko ḿbə́ne a fâp ngá ka éré, a kí jen mbá-ochî, ḿbə́ne ó tobha, ka ó məŋe eyum ejê.

⁵ Ó bhó top njéné, ó bêk obé, ka ó ká məŋé eyum í njéné nnyó.”

⁶ Nji Jisos a túbhi egan njí a káre ane Jus, á ká məŋé ejûm nji á səra ábho.

Jisos nâ a ri mfoné nnyo-mbá njû obhúi

⁷ A kpô sə́ré ábho se, “Deê ń sə́ré ên ka etʉri bəre mme nâ n di mfoné nnyo-mbá njû obhúi.

⁸ Chénchén ane mba á ráŋe mbá á bhak kən mme ḿ bá, a ri anyághá-ajʉ̂. A ri ane mba á yúa nne ka ejʉ̂. Kən kpe mbúi yə́t nnyi a tóbhe ábho cháŋ.

⁹ Mme nâ n di mfoné nnyo-mbá. Nne kpe nnyón nnyo a chíŋi mbâ amé kən a gyê, tîk a sêm. A kí chiŋ a gyék a fábhá jáé-jáé, a yéná fə́ne édî ejê a dík.

¹⁰ Nnyághá-ajʉ̂ á bhak a bhá jʉ, a yúí oyúí, a bhíbhí fə́ne obhíbhí. Kən mme m báe bəre ngun á fôn ekpin. Á fôn ńjə́ne é súi é fúk.”

Jisos nâ a ri mfoné-mfoné mbábha-obhúi

¹¹ Jisos se, “Mme nâ n di mfoné-mfoné mbábha-obhúi. Mfoné-mfoné mbábha-obhúi nâ a kí karé ekpin ejê se obhúi obhê ó sém.

¹² Kən nne nnyo á kóe yê ka etûm á kará ntí sê a bhábhá obhúi mbí, yê asík a ri mfone mbábha-obhúi mbí. Obhúi fə́ne obhê asík. Ebhú á yen nnyam i mbí a kə́ bha, a kí be, nnyam nnyí a bhâ gyê a chât ekam obhúi njí, a wúbhi mbi wúbhúm.

¹³ Nne nnyó a kí be a mághe obhúi mbí, á ka fon kpe ebhú na ḿbə́ne. Echî aŋ? Á kóe yê ka etûm á kára ntí sê a bhábhé ḿbə́ne.”

¹⁴ “Mme nâ n di mfoné-mfoné mbábha-obhúi. Ḿ məŋe obhúi obhámé, obhúi obhámé ó məŋe ə̂m.

¹⁵ Ka ekpak nji Ńsé omé a məŋê ə̂m, mme fə́ne ḿ məŋe Ńsé omé. N kí karé ekpin ejámé ka echî obhúi obhámé.

¹⁶ Obhúi obhámé etat ó rî mbi cháŋ ka ekam njí. N di ń kó ḿbə́ne ḿ bá. Tîk ó yûk eyum ejámé. Ka ekpak njí ekam tîk é jóe jə́t, mbábhá-bhábhá fə́ne yót.

¹⁷ “Ńsé omé a korê ə̂m, ka n kí kam ka ekarám ekpin ejámé bəre ń chə́bhe njəm ḿ fôn ńjə́ne.

¹⁸ Nne nnyo á yua ə̂m ka ikom cháŋ. Mme ḿfoné nâ ń tighá bəre ḿ kpó. Ń wom ḿ kpó, m kpô, ń wom bəre ń chə́bhe njəm ka ekpin, n chə́bhe. Ḿfa nâ ikom mfi Ńsé omé a karê ə̂m.”

¹⁹ Nji Jisos a chorê nchot nnyí, achât á kpô gbo ka ekam ane Jus.

²⁰ Etî-etî sê, “Ojê nâ ó kará nne nnyó oseŋe. Ekí é kí nok yê. Jen ta o jî gyími ên o kí yuk nchot eye?”

²¹ Kən etʉ̂ sê, “Nne nnyo ojê ó kára yê oseŋe á bhó məŋé ochot nchot ka ekpak njí. Ojê ó kí yim nan ó rə́bhe amə̂t í ntána-amə̂t?”

Ane Jus á jiŋ Jisos bhúghí-bhúghí

²² Ebhú egyʉk é si. Nâ ebhú Erom í Ntit Ókʉ́rí Obhasi Eyóróm é gbok.

²³ Jisos a jî gyê ka etím ókʉ́rí mbí, a jená a sék osé a gyʉ́rá ogyʉ́t ka eji ókʉ́rí nji á bhíŋa sê Agbá-njû Soromon.

²⁴ Ane á bhâ fáre yê á kâk, á bhə̂p yê sê, “O kí ki êt é chîk nan kən ó sə́ré êt ájoé we nâ Krayis, nne nnyo Obhasi a túmi se a bhá yim êt é sém? Sə́re êt jáé.”

²⁵ Jisos se, “Ń səre ên kən ó ka kam ên. Ntûm nnyi ń yimá ka ikom í Ńsé omé a gyím ə̂m ntî-isê.

²⁶ Kən ên ó bhó kam ên, ka ó ka joé ên noŋ obhúi obhámé.

²⁷ Obhúi mbi ó joé obhámé, ó yúgha eyum ejámé. Ḿ məŋe ḿbə́ne, ó tóbha ə̂m fə́ne.

²⁸ Ń kará ḿbə́ne ekpin ótúm-ótúm, etánám ó bhó tan, nne fə́ne kpe yót nnyo a kí jʉ ḿbə́ne cháŋ.

²⁹ Ńsé omé nnyo a karê ḿbə́ne mbâ amé a fâŋ a chíŋi kpe bhaghé ejûm, nne fə́ne nnyo a kí jʉ ḿbə́ne mbâ eye cháŋ.

³⁰ Mme na Ńsé omé a ri nne yót.”

³¹ Nji Jisos a chorê áno, ane mbá á kpô bhúp arə́m-atáé sê á túp yê.

³² Kən Jisos a sə́re ábho se, “Ó yen ên ánoê ntûm etî-etî nnyi n yimî. Ntûm nnyí a dʉ mbâ Ńsé omé. Bhaghé etûm ejámé nji ń yim kən o kí wom ên sê ó túp ên ə̂m na atáé?”

³³ Á sə́re yê sê, “É bhó tup wâ atáé ka ó yim ánoê ntûm. É tubha wâ ka ó chorá achot abhí o kpek na Obhasi. We ka nne, o kí səre se we Obhasi.”

³⁴ Jisos a bhə̂p ábho se, “Á ká seŋ ka nwet ebhín eyəné sê Obhasi a chorê se, ‘Ń səre bəre ên a ri Obhasi-í-nsi a?’

³⁵ É məŋe sê nji nwet ebhín á chot é jóa ka echî ta ótúm-ótúm. Ájoé Obhasi a kí bhiŋ ane mbá yê á kará otîp obhê se Obhasi-í-nsi,

³⁶ yê ngá nâ a sáŋe ə̂m a tûm ka ngun, jen mân nji o kí səre ên sê ń tu yê ka ń səre bəre mme Mmon owe?

³⁷ Nne a kâ kâm na mme mân ájoé etûm í Ńsé omé asík ń yimá.

³⁸ Kən nne á məŋé se ń yimá a ri etûm í Ńsé omé, deê a kam na ńjə́ne kpe a rô kam na mme. Nne á kam na etûm njí, tîk a mə́ŋe mân ka etʉri se Obhasi Ńsé a ri na mme, mme eróŋ n di na yê.”

³⁹ Ane mbá á kpô nok sê á fíi yê, a bê a ruá.

⁴⁰ A chə́bhe njəm a yáŋe aya Jodan, a jak ka eji Jon á fúgha nná ane ayép ofú ábhi, a jî kúmi ágo.

⁴¹ Ane etî-etî á bhak mbâ eye. Sê, “Jon á ka tóŋé eriŋ okpógha-biji kpe jə́t, kən chénchén nji a chorê a kpê na nne nnyó é rî ka echî.”

⁴² Ane etî-etî mba á rî áfo, á bhâ yûŋ ḿbə́ŋé á kî na Jisos.