Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Jems, echî 5 - Ejagham New Testament


Ane efaŋ, deê ó kó ên ebhú

1 Ane efaŋ, yûk ên. Deê ó kúk ên, ó rʉ́ri ên ka ekpatə́m achot mma á kə́ bha otə́m ên.

2 Efaŋ ejə́né é cha é man. Oké ó bhibhi ḿfô eyəné.

3 Ntí imə́né, ḿfáríkáŋ a dî. Ḿfáríkáŋ nnyí nâ a kí gyimi ntî-isê a bhíbhi ên. Ńnyə́ne nâ a kí di biji ibhə́né noŋ ngûn. Ó chui ên efaŋ ó ki nji ta ngun a mân chén.

4 Deê ń sə́ré ên! Ane á yimá mbin eyəné o moá ên ábho. Oseŋe mbi o karê ên ayimá-mbin mbá, na eyum ekʉ̂ ábho, Ńtâ Obhasi Ósô a yûk.

5 Ka ngun nnyí, ó di ên nnyen ekpin. Na ekpin njí, ó gye ên biji ó faŋ, o chighá ên ofú ekʉ̂ ábhi.

6 Ó bhibhi ên, ó yui ên ane mba kpe á ká mom. Á kpóe kpe sê á gyími enok cháŋ.


Kə̂p ḿbə́ŋé, gorê Obhasi

7 Atem-abhon-í-nnyen, kə̂p ên mân ḿbə́ŋé, chik ên Ńtâ Jisos Krayis a bhá. Kére ên noŋ nyima-ebhin a kí kəp ḿbə́ŋé a chighá se ebhin ejê é kúí, iyîm í nôp. A kí kəp ḿbə́ŋé a chighá se mfín i mbúta a sí, édî é kúí.

8 Ên eróŋ o ri ó kə́p ên ḿbə́ŋé, nne a kâ yíghi ḿbə́ŋé, ka ebháám nji Ńtâ Jisos Krayis, é kət kpít.

9 Atem-abhon-í-nnyen, deê nne a kâ bhíbhi ntem, á kâ bhâ obhíbhí yê eróŋ. Ntáŋa-achot ta a tʉ́ri biji á kə́ bha.

10 Atem-abhon-í-nnyen, tit ên akará-otîp Obhasi mba á chóre ka mbiŋ i Ńtâ Obhasi. Ábho á toŋe êt ekpak nji e fonê ekə́bhə́m ḿbə́ŋé.

11 Ó məŋe ên sê é kak ábho mbiŋ sê Ogyebhá-ḿbə́ŋé, ka á kə́bhe ḿbə́ŋé. Ó yuk ên ḿbə́ŋé ekə́bhə́m nnyi Job. O yûk ên fə́ne noŋ Obhasi a karê yê, ka yê, Ńtâ Obhasi a ri nne nsôn na onobhá-eji.

12 Atem-abhon-í-nnyen, nji é fáŋe mân é chîŋ ochíŋ a ri sê, ó chot nchot, deê o kâ chími. O kâ chími ka mbiŋ ósô, ka chími ka mbiŋ i nsi, na kpe mbiŋ ejûm etat. Ájoé ńji o wóme ó chôt a ri, “Nn̂,” chot ńjə́ne, nji tat o kâ chôt. Ájoé “Ée,” chot “Ée”. Ó chot é chíŋi njí, Obhasi a kí bhibhi wâ.


Egoróm Obhasi nji é kí yim nne a sôn

13 Ájoé nne owəné a ri ka oseŋe, deê a goré Obhasi. Nne á fon ogyebhá-ḿbə́ŋé, deê a kón nkôn a karé ekûp na ejík mbâ Obhasi.

14 Ájoé nne owəné kpe yót a kí maŋé, deê a bhiŋ ane-echî ka echəme atóbhá Jisos á góre Obhasi, á chóme yê akʉ́ ka mbiŋ i Ńtâ Jisos Krayis.

15 Ntʉ́ghi egoróm njí, nji nne a kíi ḿbə́ŋé na Obhasi, é kí yim nne a sôn. Ńtâ Jisos Krayis a kí yim yê a chə́bhe njəm a bhák ka biji. Obhí mbi a yimî, Obhasi tîk a rî nsôn a sû ḿbə́ne.

16 Ka obhô mbí, râk ên obhí obhə́né mbâ atem, gorê ên Obhasi ka obhô atem, a yim ên ó sôn. Egoróm nji nne nnyo á yimá nji Obhasi á woma, é fon ekpatə́m ikom.

17 Erayija a ri ntem-nne noŋ êt. A gorê Obhasi na ḿbə́ŋé-a-ḿbə́ŋé se mbúta a kâ nâ. Mbúta á ka na fə́ne ka nyâ ésá na ebhat.

18 A kpô goré Obhasi, ósô ó káre ebhə̂k, mbúta a bhə̂t, nsi a nôp édî.

19 Atem-abhon-í-nnyen, ájoé ntem á tan mbá mfoné nchot Obhasi, kən ntem etat a kô yê a chə́bhe njəm ka ńnyə́ne,

20 deê a məŋé se kpe énê nnyo á yim nne mbí a mághe obhí mbi a yimá, a yîm nne nnyó a sêm ka ekʉ̂, a yîm fə́ne se Obhasi a ri nsôn a su obhí ane etî-etî.

Ejagham New Testament © Bible Society of Nigeria and Bible Society of Cameroon, 1996.

Bible Society of Cameroon
ကြှနျုပျတို့နောကျလိုကျပါ:



ကြော်ငြာတွေ