Jems, echî 2 - Ejagham New Testament

O kâ kêp ên ńgyímí ane, ó jíghí ên etʉ̂, ó mághe ên etʉ̂

¹ Atem-abhon-í-nnyen, ó ki ên ḿbə́ŋé na Ńtâ Jisos Krayis nnyo a ri Ntûfâm ejík. Deê mân o kâ jíghâ ên etʉ̂ ane o maghá ên etʉ̂ ka á rî ńgyímí egyê-egyê.

² É kó sê, nne efaŋ a kâk nnyen i ḿfô na mkpák indəré nnyi gûl, a bhâ echəme ejə́né, mkpák fə́ne na achâk í ḿfô ka biji a bhâ echəme áji eróŋ.

³ Ó karé ên ejík mbâ nne efaŋ nnyó o tóŋe yê ekumi ejík, a kúmi, kən o sə́re ên mkpák nnyó sê á kot, a kə̂t ngyím, á kot, a kúmi ka nsi,

⁴ ó gbo ên. Echî aŋ? Ó kiri ên ane ka ńgyímí ka ńgyímí, o kóe ên ngyím ányi fə́ne na íkíkéré ibhí.

⁵ Atem í ḿbə́ŋé, yûk ên. Obhasi a sáŋe akpák ka ngun nnyí se á jóe ane efaŋ ka ḿbə́ŋé ekíím, á fôn otúi mbi yê a chimî a káre ane mba á kóre yê.

⁶ Kən ên, ó kebha akpák fóŋ. Mbán nâ á kára ên oseŋe á kaghá ên ka bisup? Ane efaŋ asík a?

⁷ Ábho bhát asík á chóra achot abhí á kpek na ekpatə́m í mbiŋ i Jisos Krayis nnyo a ri Ntûfâm owəné a?

⁸ Kən kpe nchot cháŋ. Mfoné ejûm ka nnyen-i-mbá nji o fonê ên eyimím a ri efiím ebhín otúi Obhasi nji á séŋe sê, “Kot ntem-nne ka ekpak o korê biji ibhâ.”

⁹ Kən ó kpo roghe o kébhá ên etʉ̂ ane sê á chiŋi abhô, mba tat sê á ká fap kpe ejûm, məŋê ên sê ó yim ên obhí, ó gbo ên ebhín njí.

¹⁰ Məŋê ên sê nne á kigha chénchén bibhín kən a gbô kpe mô ebhín yót, nne ányo a gbô chénchén.

¹¹ A ri nne nchane yót nnyo a kaghê ebhín se, “Ka gbo ekun, ka yúí nne.” Ájoé mân ó yui nne, é ká joé sê ta o gbô ekun kən o gbô ebhín.

¹² Nâ deê nne a chorá nchot, a yimá ekpin, a məŋé se á kí taŋ êt na ebhín nji é kí yim êt é sém.

¹³ Echî aŋ? Ájoé nne á bhó ri ntem nsôn, Obhasi a kí taŋ yê, á bhó ri nsôn. Kən nne nnyo á rik ntem nsôn, Obhasi á bhó bhibhi yê esup.

Ḿbə́ŋé ekíím na ntûm i nno eyimím

¹⁴ Atem-abhon-í-nnyen, ájoé nne a kí səre se yê a kâm na Obhasi kən á bhó toŋe ka oyima-ejûm obhê, ó kam ên sê ekamám ntʉ́ghi njí kə́n é yîm yê a sêm a?

¹⁵ É kó sê, atem-abhon-í-nnyen á rî mba á rî ka eket í ḿfô, nji díím cháŋ.

¹⁶ Bhaghé ono nâ ó yim ên ó kare ábho nji ó səre ên ábho se, “Deê Obhasi a joé na ên, ka kéré ên, dîk ên o gyʉ́rá ên,” kən ó ka karé ábho iyîm mbí?

¹⁷ Nâ ejûm é káma sê ekamám na Obhasi, ájoé etûm eno é ká joé na ekamám, áfo a ri chichi.

¹⁸ Etʉ̂ ane tîk á tô sê, “Ane etat á rî á kamá na Obhasi, mba tat á yimá ntûm i nno.” Táme ên ntʉ́ghi ane mbá sê, “O kí yim ên nan ó sə́ré ên sê ó kam ên na Obhasi nji ó bhó yim ên ntûm i nno. N kí toŋe mân bəre ń kam ka ntûm i nno amé.”

¹⁹ Ó kam ên sê Obhasi a ri yót a? É nop, kən kpe ágbán í Satan á kam eróŋ. Nâ ńjə́ne á fubhá yê na ḿbə́ŋé-a-ḿbə́ŋé.

²⁰ Ánə́mé iyîm í nchane! O wómá ên á tóŋé sê ekamám nji é ro jen na ntûm i nno, a ri chichi ejûm a?

²¹ Jen é yími kən Obhasi a kô ńsé éməné owəré, Abraham, se a fôn ekpin ka nnyen-i-mbá? A ri ka ekpin ejê nji a yimî ebhú a karê mmon owe Isak mbâ Obhasi ka eji ekəp etúbhúm.

²² Ó ka yén ên mân sê ekamám nji a kamê na Obhasi na ekpin ejê nji á yimá, í jen ekát jə́t a? A jéghe ekamám ejê na ntûm i nno.

²³ Nji á séŋe é fap ka etʉri sê, “Abraham a kíi ḿbə́ŋé na Obhasi. Ka obhô mbí, Obhasi a kô ekpin ejê se é rî ka nnyen-i-mbá.” Á chə́bhe á bhiŋá mân Abraham sê ntem Obhasi.

²⁴ Yen ên mân sê Obhasi a kí ko ekpin í nne se é rî ka nnyen-i-mbá ka ntûm nnyi nne á yimá, é ká joé ka ekamám ńjə́ne-njənê.

²⁵ É fábhe fə́ne ekan-ékân na nne-nkáé ejen yót nnyo á kamá se Rayap. Obhasi a kóe fə́ne ekpin í nne-nkáé nnyó se é rî ka nnyen-i-mbá ka oyima-ejûm obhê. Nne-nkáé nnyó a fî ágbán ane Jus nono, a nyáŋe fə́ne ábho á kô mbá etat á bê.

²⁶ Nâ noŋ é rî fə́ne. Ájoé nne a kâm na Obhasi kən á bhó yim ntûm i nno, é rî noŋ ékpoê-nne nji é ká kpo fon ńtʉgântʉ. Ntʉ́ghi ekamám njí a ri chichi.