Ane rom, echî 9 - Ejagham New Testament

Nsôn a kí yim Pol na atem-ane Isrel

¹ Nji ḿ bak ochot é rî ka echî. Ń chorá ńjə́ne noŋ nne nnyo a chə̂m na Jisos Krayis. Ḿ bó chot na áfúbhí ka etím. Ḿbə́ŋé amé nnyi a ri ka obhô Obhasi Ebhare Ntʉgantʉ a sə́re ə̂m se ḿ bó səre áfúbhí.

² Nsae a súi ə̂m ka ḿbə́ŋé kpe-eji na abhon-í-nnyen abhámé ane Isrel. Onoghá-ḿbə́ŋé obhámé ka echî ábho, ntə̂m cháŋ.

³ Ka echî ane Isrel mba á rî nâ abhon-í-nnyen abhámé, agyʉ́ŋ amə́ré mát, kə́n n wôm bəre deê Obhasi a bhíbhí ə̂m esup. A gbút ə̂m a yighí na Jisos Krayis, ájoé eyimím ka ekpak njí kə́n n yîm ábho á sém.

⁴ Obhasi a kóe ábho noŋ abhon abhê a tóŋe ábho ejík ejê. A chími ábho otem ka ńgyímí etat. A káre ábho ebhín ejê, a tóŋe ábho ekpak nji á kí jighi yê. A chími fə́ne ábho onono.

⁵ Ábho a ri biyábhé-abhon ane Obhasi éməné. Krayis yê ḿfoné, ebhú á bháe noŋ nne ka nsi nnyí, á jíi yê ka ndə́p-i-njû nnyí yə́t. Yê, ka Obhasi nnyo a faŋê a chîŋ ochíŋ, a fonê fə́ne ejík ka ótúm-ótúm. Áno.

Obhasi a yîm ka ekpak nji yê a chimî

⁶ Nâ é fap mân sê Obhasi á ka yim nji a chimî a? Bhúghí-bhúghí! É ká fap sê chénchén ane Isrel nâ Obhasi a sáŋe noŋ ane abhê.

⁷ É ká fap fə́ne sê chénchén biyábhé-abhon Abraham nâ á rî abhon Obhasi. Echî aŋ? Obhasi nâ a sə́re Abraham se, “Təm abhon mba mmon owa Isak nâ á kí joé mfoné-mfoné abhon abhámé.”

⁸ Nâ é ká joé sê ka eji á jíi wâ ka etʉri ka ndə́p-i-njû Abraham, we ó chəbhe mmon Obhasi. A ri ane mba á kíi ḿbə́ŋé noŋ Abraham ka ejûm nji Obhasi a chimî, nâ á rî mfoné-mfoné biyábhé-abhon.

⁹ Obhasi a chimî Abraham se, “Ebhú é bhik, tîk m bák ejen mbâ eya. Ḿ ba, nkáé owa Sara tîk a jî mmon.”

¹⁰ É ká man njí. Ńsé abhon í Rebeka a ri yót, Isak nnyo ńsé-nkúí owəré. Kən ebhú Rebeka a nyə́ne na oya,

^11-12 Obhasi a sə́re yê se, “Mmon nnyo ndaŋa-mbá tîk a jóe ḿgbán mbâ nnyo nsígha-njəm.” A sə́re yê kən kpe Rebeka a bhá ji ofât obhê, kən kpe abhon mbá á bhá mə́ŋe obhí na ono. A chorê nchot nnyí se yê a tóŋé se osáŋa-ejûm obhê, nji é gbʉ́a cháŋ. Echî aŋ? Yê á bhó saŋ a kóŋ etûm nji nne a yimî. É dʉ̂k a ri ka ekpak nji yê a wóme.

¹³ Á séŋe fə́ne sê Obhasi a toê se, “Ka Jakop na Isa, ń kot Jakop, ń taŋe Isa.”

¹⁴ E kí səre mân sê nâ ekpin Obhasi cháŋ ka nnyen-i-mbá a? Áfúbhí!

¹⁵ É kó nchot nnyi Obhasi a chorê na Mosis. A sə́re Mosis se, “N kí yim onono n káre ane mba n wóme, n dî fə́ne nsôn na ane mba n korê.”

¹⁶ É yen mân sê ebhú Obhasi á saŋ nne, é ká joé sê nne ányo nâ a wóme, na kpe a yîm ejûm nji é bhíghi kən Obhasi a kí saŋ yê. Esáŋám Obhasi é dʉ̂k ka nsôn nnyi yê a kí ri nne.

¹⁷ Echî aŋ? Ka nwet Obhasi á sə́re ntûfâm eték í Ijip sê, “A ri ka obhô mbí nâ n kóe wâ n yîm otúi. Bəre ń tóŋé ekpatə́m ikom ifámé. Ń yîm fə́ne ngun ndə́m á yúk mbiŋ amé.”

¹⁸ Deê é mə́ŋe mân sê Obhasi a kí ri nsôn na ane mba yê a wóme a ri. Ebhú á wom fə́ne se yê a yim nne a son echî na yê, a yîm.

Obhasi á yimá ekpak nji é rî yê ka ḿbə́ŋé

¹⁹ Ebhú tat tîk nne owəné a bhə̂p ə̂m se, “Ájoé ekpak Obhasi á səre se é jóe, nyóŋá cháŋ, jen mân kən a kí fi nne se a gbô?”

²⁰ Ntem, we ka nne, o fonê kpá bhaghé ikom mfi o kí bhəp ntʉ́ghi ebhə̂p njí mbâ Obhasi? Nne nnyo a kô otop a kí moŋe ebhí ka ekpak nji a kére, eji o nôk oyúk ebhí áji é bhə̂p se, “Jen é yími kən o kí yim ə̂m ekpak njí” a ri fan?

²¹ Nyima-ebhí nâ a fonê ikom mfi a kí ko otop mbí, a yim nji-nji é kóre yê. A kí ko ekpək otop jə́t a yîm abhí ábháe. A korê a yîm jə́t a kí se təm ka ofú erom kən á yîm kpe ejûm ka etím. Nji tat se kpe bhaghé ebhú á kô á yîm nji-nji á kóre.

²² Nâ noŋ fə́ne é rî na Obhasi. Kpe noŋ á woma a tóŋé oyámá-ḿbə́ŋé obhê na ekpatə́m ikom ifê, a kí kəbhâ ḿbə́ŋé, a kaghá biji na ane nchane bhát mba á yíma yê a yámá ḿbə́ŋé. Á rî mba kə́n á bhíbha obhíbhí.

²³ Á kəbhá áno ḿbə́ŋé a kaghá biji na ábho ka obhô ane mba ngá, mba yê a wóme a ri nsôn. Á woma a tóŋé fə́ne ábho efaŋ nji é rî ka ejík ejê. Nâ ane mba yê a yîm se á jóe na yê ka ekpatə́m ejík ejê.

²⁴ Êt a ri ane nchane mba Obhasi a sáŋe ta ebhú áji. Á ka sáŋ mbâ ane Jus átíŋ, a sáŋe fə́ne mbâ ane nték ajéné.

²⁵ Nâ ekpak fə́ne Obhasi a chorê ka nwet Oseya se, “Ane mba ebhú áji á ká joé ane abhámé, tîk m bîŋ ábho mfá-mfá bəre, ‘Ane abhámé.’ Nték nnyi ka ebhú áji ń ka kot, mfá-mfá tîk m bîŋ ńnyə́ne bəre ‘Nték okot amé.’ ”

²⁶ A kpô chot se, “Ka nkúbhi eji nji n sə́re ábho bəre ‘Ên ane abhámé asík,’ áfo nâ tîk á bhîŋ ábho sê ‘Abhon í mfoné-mfoné Obhasi.’ ”

²⁷ Nkara-otîp Obhasi nnyo á kamá se Asaya a kûk a kpê na ane Isrel se, “Kpe ane Isrel á tíi noŋ ésébhe ka mkpe aya, mba Obhasi a kí yim á sém, á bhó ti.

²⁸ Echî aŋ? Ebhú é bhó rap, Ńtâ Obhasi a kí gbut esup ejê a karé ane ngun.”

²⁹ Asaya nnyó yót a sə́re ebhú áji se, “É ro joé sê Ńtâ Obhasi ka ósô a maghé etʉ̂ biyábhé-abhon abhə́ré asík, kə́n ebhú njí, é man chénchén noŋ ane Sodom na Gomora.”

Ane Jus á ká ko mfoné mbá á mə́ŋe Obhasi

³⁰ E kí sə́re mân sê jen? É tô sê ane mba á ká dʉ ka nték i Jus, á ká nok ka biji ábho sê Obhasi a kó ekpin ábho se é rî ka nnyen-i-mbá, á fôn ekpin áji. Á fóne ńjə́ne ka ḿbə́ŋé nnyi á kí ki na Jisos Krayis.

³¹ Kən mân ane Jus á woma sê Obhasi a kó ekpin ábho se é rî ka nnyen-i-mbá ka ebhín ekíím, kən kpe echî na ndə́p á ká yen.

³² Echî a ri jen? Á ká ki ḿbə́ŋé na Jisos Krayis. Á kən ḿbə́ŋé ábho chénchén á kuni ka ntûm eno eyimím. Á kobhe á gbo ka nchot i ḿbə́ŋé ekíím na Jisos nnyo a ri nâ ntáé nnyi

³³ Obhasi a chorê ka nwet eye se, “Ńgyê, ń ki ntáé amé ka eték í Sayon nnyi a kí yim ane á kóbhe. Ekpatə́m í ntáé nnyi a kí yim ane á gbô. Kən nne nnyo á ki ḿbə́ŋé na ńnyə́ne, tîk á bhó kuk se, ‘A tok ə̂m eé.’ ”