Ane rom, echî 7 - Ejagham New Testament

E kí karé biji mbâ Jisos Krayis, mbâ ebhín asík

¹ Atem-abhon-í-nnyen, nchot nnyi n kə́ bha nná ochot na ên, ó məŋe ên ńnyə́ne ka chénchén ên ó məŋe ekpak nji ebhín é rî. Ebhín é fóne ikom na nne təm ebhú nji nne a ri mbít.

² É ko nne-nkáé ndûm noŋ egaé. E kí yen sê ebhú ndûm owe á joé mbít, nne-nkáé nnyó á ro jíghí biji noŋ nkáé ndûm, ebhín é kí fi yê. Kən nji ndûm á kpo, eji ebhín é kí kpo fi yê cháŋ.

³ É fap sê nji ndûm a nyə́ne ka ekpin, nkáé owe á karé biji mbâ nne-ndûm etat, a gbô ekun. Kən ndûm á kpo, ebhín njí é man. Nne-nkáé nnyó a bhîk ekóóm nne-ndûm etat. Á ro kpó səre sê a gbô ekun.

⁴ Atem-abhon-í-nnyen, nâ noŋ é rî fə́ne na ên. Ka eji Jisos Krayis a kpóe ka echî ejə́né, eji ebhín é kí kpo fon ikom ka ekpin ejə́né cháŋ. É rî noŋ ndaŋa-mbá ndûm a kpô nne. Mfá-mfá o bhighî ên ekarám biji mbâ ndûm etat. O kí karé ên biji mbâ Jisos Krayis nnyo a nyəmê ka ekʉ̂ se a yim é fáp ejûm é káre Obhasi.

⁵ Ka ebhú nji é yimá ekpin ka ekpak é bhíghi êt ka ḿbə́ŋé, íkíkéré obhí eyimím mfi í rúi ngyím ka obhô obhí í súi êt echî. Ka ekpak njí, e kə̂t e tʉ́ghá obhí mbi ó bháe êt na ekʉ̂.

⁶ Ebhú áji, ebhín é fôn ikom é fî êt noŋ ayimá-obhí. Kən mfá-mfá á yighi êt ka óséré ikom mfí. E kí yim etûm mfá-mfá ka mbá mfê nnyi Obhasi. É ro yim ka etəm í mbá nnyi ebhín é tóŋe. É chəbhe e yimá ka mbá mfê nnyi Ntʉgantʉ Obhasi.

Ebhín é yim obhí ó toŋe biji

⁷ É tô mân sê jen? É tô sê ebhín a ri obhí eróŋ a? Bhúghí-bhúghí. Ebhín obhí asík! Kən a ri ebhín nâ é yími ə̂m m mə́ŋe obhí. Kə́n ń ka məŋé bəre amə̂t ekíím ka ejûm í nne a ri ejûm ebhí ájoé ebhín é ká to sê, “Ka kí amə̂t ka ejûm í nne.”

⁸ A ri ebhín nâ é yími obhí ó yén mbá ta ó yîm ə̂m n kík amə̂t ka iyîm ane. Echî aŋ? Obhí ó ká fon ikom ájoé ebhín cháŋ.

⁹ Mme ḿfoné, ebhú ebhín cháŋ, n di mbít jáé-jáé. Kən ebhú Obhasi a kpô túm ebhín ejê, obhí ó tə̂m ó rúi ngyím. Ka ebhú njí, n kə̂t nâ ékpoê nne.

¹⁰ Ebhín nji Obhasi a túmi se é bhá ə̂m na ekpin, é bháe a ri na ekʉ̂.

¹¹ Ka obhô ebhín njí, obhí ó ríri ə̂m m gbô. A ri ka obhô ebhín nâ obhí ó yúi ə̂m.

¹² É toŋe sê ebhín é ká fon kpe akôp. Nji ebhín é sə́re, é ká fon kpe akôp. É rî ka nnyen-i-mbá. É rî nono.

¹³ Nâ-ngá kə́n e tô mân sê ejûm eno noŋ ebhín, é bha ə̂m na ekʉ̂ a? Bhúghí-bhúghí! Nji é yúi ə̂m a ri obhí. Ka eyimím ane á mə́ŋe ka etʉri ejûm nji é káma obhí, obhí a kô ejûm eno a yúi ə̂m. Ka ekpak njí, ebhín é yim obhí a tóŋe biji se yê a bhîp a chíŋi ochíŋ.

Nne a wómá a yim ono, kən obhí ó bhó kam

¹⁴ É məŋe sê ebhín a ri ejûm Obhasi, kən mme ka nne, ḿ gbo osʉ́ŋ ń kare obhí.

¹⁵ Ḿ bó məŋé nji ń yimá. Nji ń wom bəre ń yîm ḿ bó yim, kən nji ń ka wóm ń yîm, ńjə́ne nâ ń yimá.

¹⁶ Ájoé ń ka kot nji ń yim, é toŋe sê ń kam bəre ebhín é rî ka nnyen-i-mbá.

¹⁷ Nâ é fap sê obhí mbi ń yimá, mme asík ń yimá ḿbə́ne, a ri obhí mbi ó rî ə̂m ka ḿbə́ŋé nâ á choa ə̂m.

¹⁸ Ka etʉri, mme ka nne, kpe ejûm eno na mme cháŋ. Kpe íkíkéré í rî ə̂m bəre ń yîm ono, eyimím nchane ḿ bó yim.

¹⁹ Ń kət n yimá a ri obhí mbi ń ka wóm bəre ń yîm, m mághe ono mbi kə́n n wóme ń yîm.

²⁰ Ájoé íkíkéré ḿbə́ŋé ifámé í səre ə̂m se ń yîm ejûm, kən n yóŋe ekpak etat n yîm, é fap se mme ḿfoné asík n tighî n yîm ejûm áji. A ri obhí mbi ó rî ə̂m ka ḿbə́ŋé nâ ó yími.

²¹ Nâ ekpin njí mân é chəbhe noŋ ebhín etat se kpe bhaghé ebhú n wóme ono eyimím, a ri ejûm ebhí nâ é bhâk ə̂m ka echî.

²² Ka ḿbə́ŋé amé, ń kot ebhín Obhasi.

²³ Kən ń yen bəre ebhín nji é yíma ə̂m etûm ka biji é rî egyê. Ebhín njí é kí nok na ebhín nji ń kera ka ḿbə́ŋé. Ka obhô mbí, ń kət ka osʉ́ŋ obhí mbi ó yíma ə̂m etûm ka biji.

²⁴ Bhaghé ntʉ́ghi ofará-ḿbə́ŋé nná! Énê nnyo tîk a nyáŋe ə̂m ka ekpin ejámé njí, nji é kí ko ə̂m nná é kâk ka ekʉ̂?

²⁵ A ri Obhasi átíŋ nâ a kí nyaŋe ə̂m. Deê é kúp yê ka obhô Ntûfâm owəré Jisos Krayis. Ńgyê ngyímí amé. Mme, ka íkíkéré ḿbə́ŋé amé, n kí gbo osʉ́ŋ ń káre ebhín Obhasi, kən ka biji, n kí gbo osʉ́ŋ ń káre obhí.