Ane rom, echî 6 - Ejagham New Testament

Ó maghe ekpin obhí, ó gye nji Jisos Krayis

¹ Nâ é fap mân sê jen? É kə́t e yimá obhí e jak ochî sê é yîm onobhá-eji Obhasi ó súí a?

² Áno asík! Ka ebhú áji, obhí ó fon ikom ka ekpin ejə́ré, kən mfá-mfá, ikom áfi kpó cháŋ. Nâ e kâ kpô yimâ ên mân obhí ka ekpin ejə́ré.

³ Ó məŋe ên nono sê ebhú e fúghi ayép, e chə̂m na Jisos Krayis, e kpô fə́ne ekʉ̂ na yê.

⁴ Ḿfa nâ e ri bəre ebhú e fúghi ayép, e chə̂m Jisos Krayis ka ekʉ̂, e gyê na yê ka oyəm. Echî é rî sê e kí fon ekpin efê na yê ka ekpak Obhasi Ńsé, ka ekpatə́m ikom ifê, a yimî yê a nyə́me ka ekʉ̂.

⁵ Ájoé ka ochəma-biji na Jisos Krayis é gyebhe ekʉ̂ ejê, tîk e gyébhe eróŋ enyəmə́m ejê ka ekʉ̂.

⁶ É məŋe sê etəm ekpin ejə́ré, á kum ka ego na Jisos Krayis sê á yúí ekpin obhí njí, á yíghi êt ka osʉ́ŋ obhí.

⁷ Nne á kpo kpo, obhí a rô kpó yim.

⁸ É kam sê ka eji e kpóe na Jisos Krayis, e kí chəbhé njəm fə́ne ka ekpin na yê.

⁹ Echî aŋ? É məŋe sê nji Jisos Krayis a nyəmê ka ekʉ̂, a rô kpó kpo bhúghí-bhúghí. Ekʉ̂ é ká kpo fon ikom ka ekpin ejê.

¹⁰ Ntə̂m ányi yə́t nâ Jisos Krayis a kpóe ka obhí ane ngun. Mfá-mfá, ekpin ejê é rî na Obhasi.

¹¹ Ka ekpak njí, deê ó mə́ŋe ên sê obhí ó ká kpo fon ikom ka ekpin ejə́né. Ó chəbhe ên ka ekpin na Obhasi ka obhô ó chəm ên na Jisos Krayis.

¹² O kâ kâm mân se obhí ó kpó gye, ó fôn ikom ka biji mbi tîk í kpô. O kâ kpô tóp ên achot abhí.

¹³ Nne a kâ kâm se eyô-biji ejê é jóe a ri ejûm ebhí noŋ ejûm enok nji é kí kak obhí ikom. Deê é jóe ejûm enok, é nôk enok é káre Obhasi ka nnyen-i-mbá. Karê ên biji mbâ Obhasi noŋ ane mba á kpo kən Obhasi a chə́bhe njəm a sʉ̂k ábho.

¹⁴ Ka ekpak njí, obhí ó bhó kpo fon ikom na ekpin ejə́né. Echî aŋ? Ó chəbhe ên na ekpin, é dʉ̂ ka obhô onobhá-eji Obhasi, ka obhô ebhín asík.

Nne Obhasi a mân ka osʉ́ŋ obhí

¹⁵ Noŋ ebhín é ká kpó fon ikom ka ekpin ejə́ré, e kí fon ekpin ka onobhá-eji Obhasi, nâ-ngá é yîm mân obhí ekpak é kóre êt a? Bhúghí-bhúghí!

¹⁶ Ó məŋe ên sê ó nok ó gbô osʉ́ŋ ó káre nne se ó tʉ́k yê, o yúghá yê, ó chəbhe nsʉ́ŋ i nne ányo. Ó bhó gbo osʉ́ŋ ebhú jə́t o káre obhí mbi ó kí choe wâ ó kâk ka ekʉ̂, o gbô fə́ne o káre Obhasi, o yúghá yê se a kó ekpin ejâ se é rî ka nnyen-i-mbá.

¹⁷ Ka ebhú áji o ri ên ka osʉ́ŋ obhí, kən deê é kúp Obhasi nono nji ó top ên mfoné nchot eye na ḿbə́ŋé-a-ḿbə́ŋé. Mfoné nchot nnyi o yéne ên ka achot mma e kpíi ên.

¹⁸ Ka obhô mbí, Obhasi a yíghi ên ka osʉ́ŋ obhí se ó gbô ên a ri osʉ́ŋ ó káre ekpin nji é rî ka nnyen-i-mbá.

¹⁹ N kí wom achot mmá á jáé ên nono. Nâ ńjə́ne n kí ko egaé nji nsʉ́ŋ na ńsé. Ebhú áji, o káre ên biji ibhə́né ka obhí na ekpatə́m achot abhí eyimím. Kən mfá-mfá o ri ó káre ên biji ó yîm ên achot mma á rî ka nnyen-i-mbá sê ekpin ejə́né é jóe kpe akôp é kâ fôn ka ochî Obhasi.

²⁰ Ebhú nji o nyə́ne ên ka osʉ́ŋ obhí, achot ka nnyen-i-mbá á ká fon kpe ejûm á bháŋé na ên.

²¹ Orʉrí mbi o fonê ên ka etím, ebhú áji a ri jen? Kpe orʉrí etat cháŋ é ká chiŋi achot mma mfá-mfá ó kpighi amə̂t o kêp, echî é yûp ên. Echî aŋ? Achot ntʉ́ghi áma á chóa ên á kaghá ka ekʉ̂.

²² Kən mfá-mfá ó sem ên ka achot obhí, ó gbo ên osʉ́ŋ ó kare Obhasi. Orʉrí obhə́né ka etím a ri ekpin nji ó kare ên biji chénchén mbâ Obhasi, ó fon ên ekpin ótúm-ótúm.

²³ Echî é rî sê orʉrí mbi nne a kí fon ka obhí eyimím a ri ekʉ̂. Kən ekəp nji Obhasi á kará ane a ri ekpin ótúm-ótúm, kpe ejûm á bhó bhəp, ka é chəm biji na Ntûfâm owəré Jisos Krayis.