Ane rom, echî 2 - Ejagham New Testament

Obhasi a kí taŋ esup, á bhó kep kpe nne ka ochî

¹ Deê ó mə́ŋe ên mân sê kpe nne a ri nan, a kâ tâŋ achot atem. Obhasi á bhó yighí yê esáŋ. O kí taŋ achot atem, kən we ntáŋá-táŋá ta ó gbo. Echî aŋ? We o ri ágo o yimá eróŋ achot mma ó taŋá atem.

² É məŋe sê nji Obhasi a kí taŋ ane mba á yimá achot mmá, otáŋá-nchot obhê ó bhó fon kpe akôp.

³ Kən ên ka ane o kí taŋ ên atem sê á yim obhí, ó kera ên tîk sê Obhasi á bhó taŋ ên? Ên ngá ó yimá ên ḿbə́ne bhə́t.

⁴ Obhasi á toŋá ekpatə́m onobhá-eji, a kə́bhá ḿbə́ŋé, a janá achot ojané, kən o kí ko ên mân éfébhé. Ó bhó riŋí ên sê a fiî énoê ekpin njí a nyáŋé ên sê ó yóŋé ekpin.

⁵ Kən ka osoná-echî obhə́né mbi ó bhó wom ên eyóŋóm, o kí yim ên Obhasi a yámá ḿbə́ŋé kpe-eji. Tîk a kpə́re ên ka ofú mbi yê a kí ko oyámá-ḿbə́ŋé mbí a táŋ ngun. A ri otáŋá-nchot obhê ó kí joé ka nnyen-i-mbá.

⁶ Obhasi a kí karé kpe énê nji é bhíghi na ekpak etûm nji yê a yimî.

⁷ Ane mba á kí kəp ḿbə́ŋé, á yimá nji é rî ka nnyen-i-mbá, sê á wóm ejík na nkat na ekpin nji é ká fon ntə̂m, Obhasi a kí karé ábho ekpin ka ótúm-ótúm.

⁸ Kən etʉ̂ á kéra a ri mbi ábho biji, nchot ka echî á bhó chot, á tóbha a ri obhí. Obhasi a kâk ntʉ́ghi ane mbá ka ḿbə́ŋé, tîk a kpə́re ábho ekpatə́m.

⁹ A kí karé chénchén ane abhí ekpatə́m oseŋe, eróghóm na ane Jus ta o gyê na ane nték ajéné.

¹⁰ Kən a kí karé ane ano ejík na nkat na enare, eróghóm fə́ne na ane Jus tata o gyê na ane nték ajéné.

¹¹ Tîk é jóe áno, ka Obhasi á bhó kep kpe nne ka ochî.

¹² Ane mba cháŋ ane Jus, á ká nok oyén ebhín í Mosis. Kən kpe noŋ á ká fon ebhín njí, á yimá obhí, á kí kpo fə́ne á tân. Kən ane Jus mba á fon ebhín njí, á yimá obhí, ebhín í nchane jə́t nâ é kí taŋ ábho.

¹³ Ka nan? Ebhín efonóm asík nâ é kí yim Obhasi a kó ekpin í nne se é rî ka nnyen-i-mbá, a ri eyimím ejûm nji ebhín é wóme.

¹⁴ É ko ane mba cháŋ ane Jus, kpe ebhín na atûŋ á ká nok oyúk, kən kpe bhaghé ebhú ḿbə́ŋé ábho a kí toŋâ ábho, á yimá ekpak nji ebhín é wóme. Ntʉ́ghi ane mbá á ká məŋé ebhín, kən á toŋe sê ebhín é rî ábho ka ḿbə́ŋé.

¹⁵ Iyîm í rî mbi í toŋe se ebhín é rî ane mbá ka ḿbə́ŋé. Iyîm mbí a ri erû ábho. Ḿbə́ŋé a kí səre ábho ebhú tat se á gbo, ebhú tat se á ká gbo.

¹⁶ Iyîm mbi ḿ kpik áno mân ka otîp ogyebhá-ḿbə́ŋé mbí tîk í fâp ekan-ékân ka ofú Obhasi a kí taŋ íkíkéré ḿbə́ŋé ane ngun. Jisos Krayis nâ a kí joé ntáŋá-táŋá.

Ńgyímí ane Jus na ebhín Obhasi

¹⁷ Ên mba ó bhiŋá ên biji sê ane Jus, o kérá ên sê nchot a mân ka eji Mosis a karê ên ebhín Obhasi ka obhô a? O kamá ên ńkamê sê o ri ên nono na Obhasi.

¹⁸ Sê ó məŋe ên nji Obhasi a wóme, ebhín é kpi ên ekpak o kí saŋ ên ono na obhí.

¹⁹ O kamá ên sê ên nâ o bhighî mbá etʉʉ́m mbâ ane mba á rî atáná-amə̂t ka nchot Obhasi. Sê o ri ên noŋ ngûn mmi o kí toŋe ên ebhát mbâ mba á rî ka ejírim.

²⁰ Ó kera ên sê ên nâ o bhighî ên etí etáám mbâ ánə́mé ane. Sê ên nâ o kí kpi ên ane mba á ká məŋé Obhasi nono, ka mfoné nchot Obhasi na chénchén nji yê a wóme, í rî ka ebhín nji Mosis a karê ên.

²¹ O kí kpighâ ên mân ane etat, biji ibhə́né ó bhó kpi ên jen? O kí sərâ ên ane etat á kâ jʉ̂ ejʉ̂, nâ-ngá ên áfoné ó bhó jʉ ên a?

²² O kí sərâ ên ane á kâ gbô ekun, ên cháŋ ágo o gbok ên a? Ó chorá ên sê achot ajom, ên ó ka kot bhúghí-bhúghí, nâ-ngá ên cháŋ o jʉ́k ên iyîm ka ojû ajom a?

²³ Ó kamá ên ńkamê sê ebhín Obhasi é rî ên ka obhô, kən jen ó kará ên Obhasi ísonê ka egboóm ebhín njí jə́t.

²⁴ Nwet Obhasi a chorê se, “Ka obhô obhə́né, ane mba á ká məŋé Obhasi á kí chorâ achot abhí, á kpek na mbiŋ eye.”

²⁵ Ájoé o kí tobhâ ên ebhín í Mosis, erû ejə́né nji sê nne Obhasi a ri a kím nkîm, kə́n é fon echî. Kən ájoé ó bhó top ên, nâ nkîm eyəné á ka fáp ejûm.

²⁶ Ájoé nne á ka kím nkîm kən a kí top ebhín, ka ochî Obhasi nne nnyó a ri bəre nne nnyo a kími nkîm, a kí top Obhasi.

²⁷ Mosis a káre ebhín Obhasi ka obhô obhə́né, ên ane Jus. Ó kim ên fə́ne nkîm ka etóŋóm sê ên ane Obhasi, kən ebhín njí, ên ó bhó ki. Ajéné mân mba nkîm, á bhó kim, á kik a ri ebhín. Ekpin ábho njí é toŋe sê ên ó gbo.

²⁸ Mfoné-mfoné nne Jus mân á ka joé sê ka o kí top erû ane Jus. Mfoné-mfoné nkîm nnyi sê ó tóŋé se we nne Obhasi á ka joé nkîm i biji.

²⁹ Kən mfoné nne Jus a ri ka ḿbə́ŋé. Mfoné nkîm a ri ka ḿbə́ŋé. Ḿfa a ri etûm Obhasi Ebhare Ntʉgantʉ, ebhín é ká fon obhô. Nne nnyo á kim ntʉ́ghi nkîm nnyí, ejík ejê é dʉ̂k ka Obhasi, mbâ ntem-nne asík.