Ane ibru, echî 3 - Ejagham New TestamentJisos a fâŋ a chíŋi Mosis 1 Atem-abhon-í-nnyen, ó fon ên nkiri ka ebhiŋím nji Obhasi a bhiŋî êt ka ósô. Kô ên mân Jisos Krayis noŋ ḿgbán nnyo Obhasi a túmi se a bhá joé ntûfâm akará-agore ka ḿbə́ŋé nnyi e kíi na Obhasi. 2 Jisos nnyó a yimî etûm ejê na ḿbə́ŋé-a-ḿbə́ŋé a káre Obhasi nnyo a sáŋe yê. Nâ noŋ Mosis eróŋ a yimî na ḿbə́ŋé eye chénchén ebhú a tʉî ndə́p-i-njû Obhasi ka etə́m. 3 Kən ejík í Jisos é chiŋi nji Mosis kpe ka jen. Nâ noŋ fə́ne mgbegha-njû a fonê ejík a chíŋi njû nnyi yê a gbeê. 4 Kpe nnyə́n njû, nne nâ a gbeê, kən Obhasi a gbê chénchén ejûm. 5 Mosis a yimî etûm ejê noŋ ḿgbán ka ndə́p-i-njû Obhasi na ḿbə́ŋé eye chénchén, a tóŋe ane achot mma tîk Obhasi a chôt ka ngun ochî. 6 Kən Jisos Krayis a yimî etûm na ḿbə́ŋé eye fép noŋ Mmon nnyo á kebha njû Ńsé owe, Obhasi. Êt nâ e ri noŋ njû eye ájoé é ka yighí ḿbə́ŋé, amə̂t amə́ré á nyə́ne ka ejûm nji yê a sə́re se tîk a yîm a káre êt. E kí yim nan é sí é yóe biji na Obhasi 7 Nâ deê mân é yúk nchot nnyi Obhasi Ebhare Ntʉgantʉ a chorê sê, “Égyé, nne kpe a yúghi eyum Obhasi, 8 deê a kâ sôn echî noŋ ebhú áji ásé abhə́né á chə́bhe njəm á káre Obhasi nji á rî ka etə́m, á gaá fə́ne yê.” 9 Obhasi a chorê se, “Éməné ka etə́m, ásé abhə́né á gáe ə̂m sê á yén ekpak í n di, kpe noŋ á yéne ntûm nnyi n yimî ka nsam i nyâ ébháe. 10 Ejûm njí é yâm ə̂m na ábho ebhú áji. N chôt bəre, ‘Ane mbá á tána mbá kpe bhaghé ebhú ka íkíkéré ábho. Á ká məŋé erû ejámé.’ 11 N chími ka oyámá-ḿbə́ŋé ábhi bəre, ‘Tîk ane mbá á bhó si eji oyoá-biji ejámé, á jí yóe biji na mme.’ ” 12 Atem-abhon-í-nnyen, kô ên mân ebhú, nne owəné kpe yót a kâ fôn ekpatə́m í ḿbə́ŋé mbí, ḿbə́ŋé fə́ne á bhó ki na Jisos nji ta a kí chəp njəm a karé mfoné-mfoné Obhasi. 13 Kən kaghâ ên atem ḿbə́ŋé kpe bhaghé ofú, obhí ó kâ bhâ orirí ên, ó tə́né noŋ ntə́bhé. Yim ên ka ekpak njí ka eji “égyé” nji á séŋe nná a ri na êt. 14 Ń chorá áno, ka e kí chəm na Jisos Krayis ájoé é fi ka ḿbə́ŋé nnyi e kíi na yê ka eróghá-ndə́p tata é sí ntə̂m. 15 Á chóre sê, “Égyé, kpe o yúghi ên eyum Obhasi, ka sôn ên echî noŋ ásé abhə́né éməné á yími nji á chə́bhe njəm á káre Obhasi.” 16 Bhaghé énê nâ a yúghi nná eyum Obhasi kən á chə̂p njəm á káre yê? A ri ásé abhə́né chénchén mba ebhú áji Mosis a kóe ábho á mághe eték Ijip. 17 Mbán mba Obhasi a yáme nná ḿbə́ŋé na ábho ka nsam nyâ ébháe? A ri mba á yími nná obhí, á kpô á kə̂t ka etə́m. 18 A chimî nná se mbán ane nâ tîk á bhó si eji oyoá-biji ejê? A ri mba á ká top nji yê a chorê. 19 E kí yen mân sê ane mbá á ká bhik osí eji oyoá-biji Obhasi, ka á ká ki ḿbə́ŋé na yê. |
Ejagham New Testament © Bible Society of Nigeria and Bible Society of Cameroon, 1996.
Bible Society of Cameroon