1 Timoti, echî 2 - Ejagham New Testament

Otágha-etí ka Obhasi ekúbhúm

¹ Ndaŋa-mbá ejûm nji n kí chot a ri bəre o gorá ên Obhasi, o tirá ane chénchén, kpe ka ebhə̂p, kpe ka ewómóm ejûm, kpe ka ekûp.

² Gorê ên Obhasi mbâ atúi-ofâm na ane chénchén mba á rî ka otúi, ejok é kâ jóe. Tîk e noghá mân sê é fôn ekpin ka ekpak nji Obhasi a wóme, ekpin ka nnyen-i-mbá.

³ É rî nono nji e kí yimâ ka ekpak njí. É kí gyebhâ fə́ne Obhasi nnyo á yimá êt e sémá.

⁴ Yê á woma se kpe énê a sém, a tʉrí oməŋé mfoné nchot eye.

⁵ Ka nan? Obhasi a ri yót. Nne fə́ne a ri yót nnyo á gyima ka étíŋanti, á tʉrá achot ane mbâ Obhasi. Nne nnyó a ri Jisos Krayis.

⁶ Yê nâ a karê nná ekpin ejê se ane chénchén á sém. Ḿfa nâ eriŋ nji é tóŋe sê Obhasi a wóme se chénchén ane á sém. Obhasi a túmi yê fə́ne ka nnyen ebhú.

⁷ Nâ ńjə́ne á túmi ə̂m noŋ ḿgbán owe se ḿ bá kpí ane nték ajéné. Se ḿ kpí ábho mfoné nchot eye, n kâ kpê nji tat. Ń ka sə́ré áfúbhí ka nchot nnyí, ń chorá ka echî.

⁸ Ń woma bəre ane-arûm kpe á rî fan, á góre Obhasi. Deê á góre na ḿbə́ŋé ábho jáé, kpe oyámá-ḿbə́ŋé kpe áfírí á kâ fôn.

⁹ N kí wom fə́ne bəre ane-akáé á kâ kô ḿfô sê a ri ejûm eyúp, á yíma osop ka mfoné mbá. Deê ábho á kâ kî nnyʉ̂ ka obhô ono. Á kâ bhíbhi ekpatə́m ntí ka mbáŋé-atûŋ na mbáŋé-obhô na ḿfô.

¹⁰ Kən deê á yimá ntûm nnyi no, nnyi ane-akáé mba á káme na etûm Obhasi á fóne ka eyimím.

¹¹ Deê á kpí achot na ejík, ejok é kâ jóe.

¹² Ń ka wóm ane-akáé á kpik ane-arûm achot na kpe á fôn ikom ka ngûm á chíŋi ane-arûm. Nne-nkáé a ri a kumí nyamḿ.

¹³ Echî aŋ? Obhasi a raŋê mbá kpá a yîm Adam ka nne-ndûm kən a yîm Ifa ka nne-nkáé.

¹⁴ Á ká riri Adam. Á ríri a ri Ifa. Ifa nâ a gboê ebhín Obhasi.

¹⁵ Nne-nkáé a kí sem nji á fon abhon, ájoé a kə̂t a kík ḿbə́ŋé na Jisos, a tóŋá okot mbâ atem-ane, ekpin ejê fə́ne é joá ka nnyen-i-mbá. Deê fə́ne nne-nkáé nnyó a fik biji ibhê.