1 Jon, echî 5 - Ejagham New Testament

Érûm ejə́ré ka nsi nnyí é rî ka jen?

¹ Kpe énê nnyo á kam se Jisos nâ a ri Krayis, nne nnyo Obhasi a túmi se a bhá yim êt é sém, a chə́bhe mmon Obhasi. Nne fə́ne kpe nnyón nnyo á kot ńsé nne, a kí kot mmon eróŋ.

² E kí məŋé sê é kot chénchén ane mba á chə́bhe abhon Obhasi ájoé é fon okot na Obhasi yê ḿfoné, e yimá fə́ne nji yê á sə́re êt se é yîm.

³ Sê e kí fon okot na Obhasi a ri ebhín ejê ekíím. Ebhín njí é ká son kpe esonóm.

⁴ Ka nan? Kpe nnyón nne nnyo a chə́bhe mmon Obhasi ta a râŋ mbá kpá a fôn érûm ka enok ejê na obhí ka nsi nnyí. Nji é kí karé êt érûm njí a ri ḿbə́ŋé ekíím na Jisos.

⁵ Bhaghé ekpak í nne nnyo a kí nok enok na obhí ka ngun nnyí a kô érûm, á ro joé təm nne nnyo a kí kam se Jisos a ri Mmon Obhasi.

Atî-isê mba Jisos

⁶ A ri Jisos Krayis nâ a bháe ka nsi nnyí. A bháe ka mbá ayép mma á kóe á fûk yê na fə́ne agyʉ́ŋ amê mma á gbóe ka nsi. Á ka bhá ka mbá ayép a mághe agyʉ́ŋ, a bháe ka ayép na agyʉ́ŋ eróŋ. Obhasi Ebhare Ntʉgantʉ a kí toŋe êt fə́ne se achot mmá a ri ka echî, ka yê á bhó səre áfúbhí.

⁷ Nâ é fap sê atî-isê á rî ásá mba á toŋe sê Jisos Krayis a ri Mmon Obhasi Ńsé.

⁸ Atî-isê mbá ásá mba eyum í nchot ábho é rî jə́t, a ri Obhasi Ebhare Ntʉgantʉ na ayép na agyʉ́ŋ.

⁹ Ebhú ntem-nne á gyimi achot noŋ ntî-isê, e kí kam na yê. Jen mân kən é bhó kam na atî-isê Obhasi mba á sóne á chíŋi ochíŋ? A re yê nâ a sə́re êt achot mmá fép a kpê na Mmon owe.

¹⁰ Ka ekpak njí, nne nnyo a yuŋî ḿbə́ŋé a kî na Mmon Obhasi, a kâm na atî-isê Obhasi mbá, a fî ka ḿbə́ne. Kən nne nnyo á ro kam na atî-isê mbá, nâ a kô Obhasi noŋ nne-áfúbhí, ka nâ a kô se achot mma Obhasi a sə́re noŋ ntî-isê a kpê na Mmon owe cháŋ ka echî.

¹¹ Nji Obhasi a sə́re êt noŋ ntî-isê a ri se yê a káre êt ekpin ótúm-ótúm. E kí fon ekpin njí ka obhô Mmon owe.

¹² Kpe énê nnyo á fon Mmon owe ka ḿbə́ŋé a fôn ekpin njí, kən se áno asík, ekpin njí á bhó fon.

Ejegha-ndə́p í nwet

¹³ Achot mma ń seŋ nná fép, ń noghá bəre ên mba o yuŋî ên ḿbə́ŋé o kî na Mmon Obhasi ó ríŋi ên sê ó fon ên ekpin nji ótúm-ótúm.

¹⁴ É kam nnyen ekamám sê kpe jen nji e bhə́bhe nji yê a wóme se é fôn, a kí yuk êt.

¹⁵ Nji é məŋe sê kpe e bhə́bhe yê jen a kí yuk, nâ é məŋe fə́ne sê yê ta a káre êt nji e bhə́bhe.

¹⁶ Kpe énê nnyo a yéne ntem-mmon-i-nnyen a kí yim obhí, kən a ri mbi ó bhó tʉ yê ó kâk ka ekʉ̂, deê a goré Obhasi a tʉ ntem nnyó a kâk ka ekpin. Ń chorá njí a ri mbâ ane mba obhí ábho ó bhó kak ábho ka ekʉ̂. Kən obhí etat ó rî mbi ó yim, ó kâk wâ ka ekʉ̂. Ḿ bó səre ên bəre nne a goré Obhasi ka obhí ntʉ́ghi mbí.

¹⁷ Obhí a ri obhí kpe ó rî mkpât, kən obhí etat ó bhó kak wâ ka ekʉ̂.

¹⁸ É məŋe sê kpe énê nnyo a chə́bhe nne Obhasi á bhó kət ka obhí eyimím, ka Mmon Obhasi a ri ágo a bhábhá yê se Satan a kâ néme yê.

¹⁹ É məŋe sê êt e ri ka obhô Obhasi kpe noŋ Satan a fonê áno ikom ka ngun ndə́m.

²⁰ É məŋe fə́ne eróŋ sê Mmon Obhasi a bhâ. Nji a bháe, a káre êt aron se é mə́ŋe mfoné-mfoné Obhasi. Mfoné Obhasi nchane, nâ ekpin ejə́ré é rî na yê. É rî eróŋ na Mmon owe Jisos Krayis. Ńgyê mfoné Obhasi nchane, yê nâ á kará êt ekpin ótúm-ótúm.

²¹ Abhon í ḿbə́ŋé, deê ó mághe ên achot ajom mbá ane mba á kébha sê nâ Obhasi ábho.