1 Jon, echî 4 - Ejagham New Testament

Chénchén otîp asík nâ ó dʉ̂ mbâ Obhasi

¹ Atem í ḿbə́ŋé, ka yûŋ ên ḿbə́ŋé ó kí na nchot i nne kpe nnyón nnyo a kí səre se yê á kará otîp na ikom í Ntʉgantʉ Obhasi. Gaé ên nchot eye ogaé kən ó mə́ŋe ên ájoé otîp obhê ó dʉ̂ mbâ Obhasi Ebhare Ntʉgantʉ. Echî egaám ejə́né é rî sê ane áfúbhí mba á jéna á rirá ane sê ábho á kára otîp Obhasi, á jabhe ngun.

² Nne kpe nnyón nnyo a kí səre ka nnyo se á jíi Jisos Krayis ojí ka ngun nnyí noŋ nne, məŋê ên sê nne ntʉ́ghi nnyó á kará otîp na ikom  Obhasi Ebhare Ntʉgantʉ.

³ Kən nne nnyo á ka kam se Jisos a bháe ka nsi nnyí noŋ nne, nâ á ka karé otîp na ikom í Obhasi Ebhare Ntʉgantʉ. Nne ntʉ́ghi nnyó á chorá na ikom mfi ńtʉgântʉ nne-ebhan i Krayis. A re nne-ebhan nnyó yót nnyo ta ó yuk ên sê tîk a bhák. Ka etʉri, nne nnyó ta a ri mfá-mfá na êt ka ngun nnyí.

⁴ Abhon í ḿbə́ŋé, ên o ri egyê ka ên a ri ane Obhasi. Ane-áfúbhí mbá á nok ên eyóbhóm, á nok, kən á ko eré, ka Obhasi Ebhare Ntʉgantʉ nnyo a ri na ên a sôn a chíŋi ńtʉgântʉ nnyo ane ngun.

⁵ Ane-áfúbhí mbá á dʉ̂ na ngun, nâ ńjə́ne ngun fə́ne á kí top achot ábho, ka á chóra na íkíkéré ngun.

⁶ Kən êt a ri ane Obhasi. Nne nnyo a məŋê Obhasi á korá nchot eyəré eyúghúm, nnyo á ka məŋé á bhó kot. Ka ekpak njí nâ e kí məŋé sê nne nnyó a fôn Ntʉgantʉ nnyo á toŋá yê ḿfoné nchot nnyi Obhasi, ńnyô a fôn ńtʉgântʉ nnyo á rirá yê.

Deê é kôt atem ekpak nji Obhasi a korê êt

⁷ Atem í ḿbə́ŋé, deê é kôt ên atem, ka okot ó dʉ̂ mbâ Obhasi. Kpe nnyón nne nnyo á tóŋe okot na ntem, a chə́bhe mmon Obhasi, a mə́ŋe fə́ne Obhasi.

⁸ Nne kpe nnyón nnyo á ka kot ntem, nâ á ka məŋé Obhasi, ka Obhasi nâ okot.

⁹ Obhasi a tóŋe okot obhê mbâ eyəré nji a túmi Mmon owe yót-ayorâ nnyo a fonê se a bhá ka ngun a bhá karé êt ekpin.

¹⁰ Nâ ejûm é káma sê okot. Ń ka to okot mbi ó dʉ̂ êt ka ḿbə́ŋé sê é kot Obhasi, kən ń chorá okot Obhasi mbi ta a tûm Mmon owe ka ngun se a bhá joé efin nji yê a kóe kən a kí ri nsôn a suk obhí obhə́ré.

¹¹ Atem í ḿbə́ŋé, ájoé Obhasi a tóŋe êt ntʉ́ghi okot mbí, deê êt fə́ne é tóŋé okot na atem.

¹² Kpe nne nnyo a nok oyén Obhasi na amə̂t cháŋ. Kən ájoé e kí fon okot na atem, Obhasi a kí kət a joá na êt. Ka ekpak njí, okot obhê na êt ó son nnyen esonóm.

¹³ E kí məŋé sê e kí kət na Obhasi ekpak nji yê a kí kət na êt, ka a karê êt Ebhare Ntʉgantʉ.

¹⁴ Ka amə̂t amə́ré e yên Mmon Obhasi, nâ ńjə́ne e kí səre ên fə́ne noŋ atî-isê sê Obhasi Ńsé a tûm Mmon owe ka ngun nnyí se a bhá yim ane á sém.

¹⁵ Kpe nnyón nne nnyo á səre ka nnyo se Jisos a ri Mmon Obhasi, Obhasi a kí kət na nne nnyó noŋ yê eróŋ á kərá na Obhasi.

¹⁶ Nâ ekpak nji e məŋê okot mbi Obhasi a fonê na êt, e yûŋ ḿbə́ŋé e kî na ḿbə́ne. Obhasi nâ okot. Kpe énê nnyo a fonê ekpin okot, a kə̂t na Obhasi, Obhasi eróŋ a kə̂t na yê.

¹⁷ Ájoé okot mbi e fonê na Obhasi ó son nnyen esonóm, ḿbə́ŋé á bhó rəm êt ka ofú mbi yê a kí taŋ ngun. Á bhó rəm êt fə́ne, ka ekpin ejə́ré ka nsi nnyí é rî noŋ nji Jisos Krayis.

¹⁸ Nji Obhasi a fôn okot na êt, é bhó fon orəmá-ḿbə́ŋé. Okot Obhasi mbí ó son nnyen esonóm, ó kí yighí orəmá-ḿbə́ŋé, ka orəmá-ḿbə́ŋé na ekpərə́m Obhasi á jéna ekát jə́t. Nne nnyo a ri na efup nâ okot Obhasi ó ká son nnyen esonóm ka ḿbə́ŋé eye.

¹⁹ E kí toŋe okot, ka Obhasi a râŋ mbá a tóŋe êt okot.

²⁰ Nne kpe nnyón nnyo a kí to se, “Ń kot Obhasi,” kən a kí bhan ntem-mmon-i-nnyen, a ri áfúbhí nâ á səra. Echî aŋ? Ntem-mmon-i-nnyen nnyo we o kí yen na amə̂t, ó ka kot, o kí yim nan ó kôt Obhasi nnyo ó ka nok oyén bhúghí-bhúghí.

²¹ Ḿfa mân nâ ebhín nji Krayis a karê êt: se kpe énê nnyo a kí kot Obhasi a ri a kot ntem-mmon-i-nnyen.