1 Jon, echî 2 - Ejagham New Testament

Krayis nâ á kaghá êt obhô

¹ Abhon í ḿbə́ŋé, ń seŋa áno achot mmá fép bəre nne owəné a kâ yîm obhí. Kən ájoé nne kpe yót á yim obhí, é fon nne yót nnyo obhí kpák yê á bhó yim. Nne nnyó a ri Jisos Krayis nnyo a kí gyimi a gorá Obhasi ka echî ejə́ré.

² Jisos Krayis yê ḿfoné a ri efin ejə́ré nji Obhasi a kóe kən a kí ri nsôn a suk obhí obhə́ré. Obhasi a kí ri fə́ne nsôn a suk obhí ane chénchén ka ngun na efin njí.

³ Kən nne a kam ka etʉri se yê a mə́ŋe Obhasi, ntʉ́ghi nne nnyó a ri ágo a kík ebhín Obhasi.

⁴ Nne nnyo á to se, “Mme ḿ məŋe Obhasi,” kən á bhó kighâ ebhín Obhasi, nne ányo á səra áfúbhí, mfoné nchot nnyi Obhasi cháŋ yê ka ḿbə́ŋé.

⁵ Kən nne nnyo á kigha ebhín Obhasi, məŋê ên sê okot obhê na Obhasi ó son nnyen esonóm. Ńji nâ é kí toŋe êt sê ekpin ejə́ré é kí kət na Obhasi.

⁶ Ájoé ó səre se ekpin ejâ é kí kət na yê, deê ó mə́ŋe se o ri ágo o yimá ekpin ekan-ékân noŋ Jisos Krayis a yimî.

Ebhín Obhasi nji fê

⁷ Atem í ḿbə́ŋé, ebhín nji ń seŋa nná mbâ eyəné, é ká joé ebhín nji fê. A ri etəm ebhín njí jə́t nji o róghe ên eyúghúm ta ka eróghá-ndə́p. Ebhín njí a ri otîp mbi ta ó yuk ên.

⁸ Kən kpe noŋ é rî áno, n kí bhiŋ bəre ebhín efê fə́ne. É məŋe sê a ri mfoné ebhín, ka e kí yen ka ekpin í Krayis yê ḿfoné na ejə́né. É yen fə́ne sê ekpin noŋ ane á rî ka ejírim é kí manâ é jak, ta mfoné-mfoné ebhát Obhasi é roghe egboóm.

⁹ Nne nnyo á to se yê a ri ka ebhát, kən ntem-mmon-i-nnyen yê á bhó kot a yén na amə̂t, nâ a nyə́ne ka ejírim.

¹⁰ Ó fon okot na ntem-mmon-i-nnyen, o kí kət ka ebhát, kpe ejûm nji é kí choe wâ ó yîm obhí cháŋ.

¹¹ Kən ó ko ntem-mmon-i-nnyen ka ebhan, o kí kət ka ejírim nji ó bhó məŋé ekpak eyimím, ka ekpin ejírim é yim wâ mbá ó ro yén.

¹² Abhon í ḿbə́ŋé, n kí seŋ nná mbâ eyəné ka Obhasi a rî nsôn a sû obhí obhə́né ka obhô Jisos Krayis.

¹³ Ane-akúí ane, n kí seŋ mbâ eyəné, ka ó riŋi ên yê nnyo a ri ta ka eróghá-ndə́p í ngun. Abhóné, n kí seŋ mbâ eyəné, ka ó nok ên enok na ntûfâm obhí ó ko ên érûm.

¹⁴ Abhon í ḿbə́ŋé, n kí seŋ nná ń káre ên, ka ó məŋe ên Obhasi Ńsé. Ane-akúí ane, n kí seŋ ń káre ên, ka ó məŋe ên yê nnyo a ri ta ka eróghá-ndə́p í ngun. Abhóné, n kí seŋ ń káre ên, ka o gyím ên son-son na Obhasi. Eyum í nchot ejê é gye ên ka echî ta fə́ne ó ko ên érûm ka enok ejə́né na ntûfâm obhí.

Deê ekot iyîm í ngun é kâ gyê ên ka echî

¹⁵ Deê nne a kâ kə̂n echî a kí ka achot obhí ngun nnyí. Nne nnyo se achot obhí ngun nâ á rî ejûm, deê a məŋé se á ka fon okot na Obhasi Ńsé.

¹⁶ Chénchén achot ka ngun nnyí noŋ ekot achot abhí, noŋ ekpatə́m eyə̂t ekíím ka iyîm í ngun, noŋ iyîm enyaŋe eyúp-eyúp nji se, “Ḿ gbo efaŋ,” á ká dʉ mbâ Obhasi Ńsé. Chénchén a ri achot í ngun.

¹⁷ Iyîm mbí sê ngun na achot obhí chénchén mma ane á kóra í kí manâ í jak, kən nne nnyo a kí yim ekpin ka ekpak nji Obhasi a wóme, a kí fon ekpin ótúm-ótúm.

Ane-ebhan í Krayis á rî ka ngun

¹⁸ Abhon í ḿbə́ŋé, ngun a kə́ bha oman. Ebhú áji á sə́re ên sê ebhú ngun a kə́ bha oman, nne-ebhan i Krayis tîk a fâp. Deê é mə́ŋe mân sê ntə̂m i ngun a sî, ka ane-ebhan í Krayis ta á rî mfá.

¹⁹ Ane-ebhan mbá á dʉ̂ ka ekam ejə́ré, kən kpe ofú bhə́t á ká fon ḿbə́ŋé ábho yə́t na êt. Nâ ńjə́ne á mághe êt, ka ájoé sê á fóne ḿbə́ŋé yə́t na êt, kə́n á ká maghé êt. Emaghám ábho é toŋe jáé sê ábho á ká joé ane abhə́ré kpe ka ofú bhə́t.

²⁰ Kən Jisos Krayis a káre ên Ntʉgantʉ Obhasi noŋ eriŋ ane Obhasi. Nâ ńjə́ne ên chénchén ó məŋe mfoné nchot nnyi Obhasi.

²¹ Eséŋém ejámé mân mbâ eyəné é ká joé sê ka ó ka məŋé ên mfoné nchot nnyi Obhasi. Ń seŋá ka ó məŋe ên, ó məŋe ên fə́ne sê nchot áfúbhí na mfoné nchot nnyi Obhasi á bhó jen ekát jə́t.

²² Nne mân nnyo e kí ko sê nne baram ka étíŋanti njí a ri énê? A ri yê nnyo á ka kam se Jisos nâ Obhasi a túmi se a bhá yim ngun á sém. Ntʉ́ghi nne nnyó nâ nne-ebhan i nchane nnyo a taŋê nná Obhasi Ńsé na Mmon.

²³ Echî aŋ? Kpe énê nnyo á ka kam se Jisos a ri Mmon Obhasi, á ka fon Ńsé ka ḿbə́ŋé, kən nne nnyo á kam, a fôn Ńsé.

²⁴ Nâ deê mân achot fép mma ó yuk ên ta ka ebhú o róghe ên ḿbə́ŋé ekíím na Krayis á kə́t ên ka echî. Achot mmá á kət ên ka echî, ekpin ejə́né fə́ne é kí kət na Mmon Obhasi na Obhasi Ńsé.

²⁵ Ekəp ejə́ré ka etím ka ekpak nji Krayis yê ḿfoné a chimî, a ri ekpin ótúm-ótúm.

²⁶ Ń seŋa áno achot mmá fép bəre ó mə́ŋe ên ane mba á wóma sê á ríri ên orirí.

²⁷ Kən ên o ri egyê, ka Jisos Krayis a káre ên Ntʉgantʉ Obhasi noŋ eriŋ ane Obhasi. Ka nji Ntʉgantʉ nnyó a ri ka ekpin ejə́né, nne etat á kpok otʉ ên mbá se yim ên nná, yim ên ńnô cháŋ. A ri Ntʉgantʉ nnyó nâ a kí səre ên chénchén ejûm. Kpe bhaghé ejûm nji a sə́re ên, é rî ka echî, áfúbhí cháŋ. Deê ó tóp ên mân nji yê a sə́re ên se ekpin ejə́né é jóe na Krayis.

²⁸ Abhon í ḿbə́ŋé, n kí kpo səre ên bəre deê ekpin ejə́né é kə́t na Krayis. É kət áno, ebhú yê á bha, tîk ḿbə́ŋé á bhó rəm êt. Nji ḿbə́ŋé a kí rəm êt, e kí be e jî bhə̂t na nsôn ka ofú mbi yê a kə́ bha.

²⁹ Nji ó məŋe ên sê ekpin í Krayis é rî ka nnyen-i-mbá, nâ ó məŋe ên fə́ne sê nne kpe nnyón nnyo ekpin ejê é rî ka nnyen-i-mbá a chə́bhe mmon Obhasi.