Netiyi Eni Pol Apostol Punora Oveteme Rom 7 - NAM NUMPUSOK ITĒVAU ENI IESU KRISTO NOVSUROMON ENUGKOS 2019

¹ Kō kūmūtūk i i ravūgeme (ĭt ya ka manūwi) punora ūmagkili nam adam, ma nam alam umante iran neteme dan sū nomūrep eni?

² Popōwo nagkū sī nasiven okevi asūon nugkugko iran woresūli iyi marugi popōwo ugi nam alam mafeli nemas eni asūon; kō nagkū asūon okomas, umesūli iyi marugi nani alam ugi asūon.

³ Popōwo pe nagkū pol sugkū asūon umante iyi umampelesi iran nateman sī, wonatovnin memagkū nasiven tampalaū; kō nagkū okemas asūon, otin sūli iyi marugi nam alam, ĭm sugkū pe iyi tawi nasiven tampalaū popōwo nagkū yoĭmpī asūon sī mōmū.

⁴ Im sugkū ravūgeme dūmūmpi kĭmi nemas (sugkū nemas eni Iesū Krĭstō yivīpelah nūrian ra nam alam) ūndū nam alam ugi nokolisiran eni Kristo; ma kwanampelesi kĭmi iran sī mōmū, iran iyi mori dūmūvĭsah marugi nemas, ma ka kel ampi novwan pugi Nōbū.

⁵ Ra nempugon pol sugkū kokĭm lete ra netevarū ra nokolisiran, ōvun nĭlasĭvian satindi, dūmne ugi nam alam, dūmumpi numpūrak ra nokolĭsirant worevī novwan tovūni nemas.

⁶ Kō marima dūmūtĭnepe kos marugi nam alam, yimas nakiugi (satindi) mori ūnōwant yemete kos (ugi); ĭm popōwo kos kem len torugat ra naviat ĭtevaū, ĭm tawi ugi nam etūwi ratilat wokon.

⁷ Im kos kel anūwi sie ugi imo?—It sat nam alam ku? Eyi tawi, tawi sugkū, Kō nagkū, tawi nam alam yaū petūkili ugi sat popōwo yaū petūkili nĭlasĭvian nakīugi nagku nam alam yetūnūwi (memokū),

⁸ Kotū nĭlasĭvian: kō sat, yokosiwi yemumpi irag ugi nam alam ōvun nakīugi norĭgi sat omwisū: popōwo nagkū yetūvelum nam alam pimas netevarū ra sat.

⁹ Im pol sugkū nam alam yetuvelum ĭtetūwī yaū mete nomūrep: kō pol sugkū nam alam yivelum, sat yivsorasah, ĭm ya omaswi;

¹⁰ ĭm iyi nam alam, mori umnomūrep ugi,

¹¹ mimo yaū morigi sugkū nemas ugi: popōwo sat, yemokesi tanepugon, ugi nam alam yempiriwokoyaū, mugi iyi vitalokugiyaū.

¹² Popōwo pe nam alam oti tumpora, ĭm selnivi nam oti tumpora, ĭm tanepo, ĭm aremi.

¹³ Im imo nurah mori aremi yem mas nūsek ūg kū? Eyin tawi. Kō sat, ma wantin sesi memagkū sat ĭtnesog, ugi numpūrak isen umnumpi nemas irag ugi imo mori aremī; —memagkū ma ugi nam alam sat anti satindi wokon.

¹⁴ Popōwo kos kĭm lagkili ma iyi nam alam oti ugi fan ra naviat ūnisog: kō yaū sugkū netevarū nokolisiran, dūmūsevasi yaū worelĭvsaū ra sat.

¹⁵ Im imo ya um numpi ya otū kili ugi: popōwo siame ya um numpi, ya otū akiugi; kō yakum numpi imo siame mori yakum nakan pugi.

¹⁶ Kō nagkū imo mori ya otū akiugi, yakum numpi, ya magkū ugi nam alam ma iyi aremī.

¹⁷ Im popōwo pe ĭt tawi yaū pe yaū umnumpi, kō sat mori umantendowi ūnisog yaū.

¹⁸ Popōwo yakum magkili ma ūnisog, mori, ra nokolisiran, (otū mante) tawi sī sie sī aremī: yakum nakīugi pe, kō worumpi ōvun numpūrak aremī yaū tawi faneteme.

¹⁹ Popōwo siame aremī mori yakum nakiugi, ya otūm numpi: kō siame ūr mori ya otūm nakiugi, yakum numpi.

²⁰ Ko nagku imo mori ya otū akiugi, yakum numpi, ĭt tawi momū yaū pe yaū umnumpi, kō sat (mori) umantĭndowi ūnisog yaū.

²¹ Im sugkū yakum mandigi irag, ma, pol sugkū ya magkū worumpi aremī, sat umante ūndū yaū.

²² Popōwo ūnōwag yakum navos ugi nam alam:

²³ kō yakum magesi sī taiū sī pe ra nokolisirag, umnavokat ra nam alam ūnōwag memakīugi woretori yaū worelĭvsaū ra nakīugi satindi mori umante ra nokolisirag.

²⁴ Pah yaū paū yakum mandigi sat tamas! mē osemsempari irag marugi imo nokolisiran nemas?

²⁵ Yakum ompalugi iran Nōbū ra Iesū Krĭsto Novsūromon. Popōwo pe yaū ūnōwag yakum torugat ra nam alam eni Nōbū; kō ra nokolisirag netevarū ugi sat.