Ovun Apostol 9 - NAM NUMPUSOK ITĒVAU ENI IESU KRISTO NOVSUROMON ENUGKOS 2019

¹ Im Sol yemetevigkerora woretalokonda ovnūrie eni Novsūromon, moĭmpe pugi potni sokowar.

² Memesenĭgi ovnetīyi nisekon memokū osesi punora ra ōvun nimō tavsogi Damaskus memokū iyi ietora sū mori iyi agesora dūmūtavniri ĭtovatemen movasiven.

³ Im polekū iyi yomemavan yemumpotipot Damaskus: sī nilara yemovlūselĭ (yemne ra pokop) nagkaūugi iyi.

⁴ Miyi yumol ra nemap memorigi sī navian yemenūwi pugi memokū, Sol,

⁵ Sol, irantie kempīesesat yaū? Miyi yemtagkeli, memokū kĭkemē, Novsūromon! Miyi Novsūromon yōmenūwi pugi memokū yaū Iesū, kĭk emumpīesesat yaū: oti nugkugko iram worowĭ novolĭpmi saū.

⁶ Miyi yumevekūrekūr memovkorĭtiwi yemtagkeli memenūwi memokū, Novsūromon tie kem nakiugi ya onumpi! Miyi Novsūromon yemenūwi pugi memokū, Etūok impe ra sĭti ĭm sī anūwi punok sie konumpi.

⁷ Meveteme dūmavan dal iyi dūmūtūr dūmatepū, dūmūrigi navian kō dūtokesi sī neteme.

⁸ Im Sol yemtūok marugi nemap; ĭm pol sugkū yemelampe yetokesi; mirora dumūlekavi nokoven eni niūmūtori sugkū ra Damaskus.

⁹ Miyi yemete yūi dan desel nimtei, iyi yetūoni metūmoneki.

¹⁰ Sī nūrie ra Damaskus nin eni Ananīas; Novsūromon yemenūwi pugi ra nilasivovora memokū, Ananīas. Miyi yemenūwi pugi memokū, Okesi yaū igko, Novsūromon.

¹¹ Novsūromon yemenūwi pugi memokū etūok mavan ra selat nin Nugko ĭmtagkeli sī neteme Sol neteme Tarsus, ra nimo eni Yūdas, ĭt iyi umnufwaki;

¹² Miyi yemokesi ugi nilasivrovora sī neteme nin eni Ananīas yivelum ūnisog mometipe nokoven iran ma sugkū iyi ampi nelampalam.

¹³ Im Ananīas yoimtamsi memenūwi memokū, Novsūromon yaū morigi marokonda sikat ugi imo neteme ĭm mov neleleki sikat iyi yemumpi iranda ōvun tumpora ra Yerūsalem:

¹⁴ miyi okevi marokonda ōvun potni sokowar worēetora omwisū igko mori umnufwaki iram.

¹⁵ Novsūromon yōmenūwi pugi memokū, Eveve ĭt iyi nūrah yaotampoli nisekūg woruriuki nin ūnĭminda lōsū, movun natemonok, mōveteme Isrēel sugkū:

¹⁶ ĭt ya kosesi pugi tiame sikat iyi ampi nesorū ugi popōwo ugi nin sorūg.

¹⁷ Im Ananīas yimpe memtorĭmpc ra nimo memetipe ov nokoven eni iran memenūwi pugi memokū, Avūgsī Sol, Novsūromon, Iesū mori yetūratumpeni punok ra selat kĭmavanwi, okotamūli yaū punok ma kĭk ōmene lampalam mampūarugi Naviat Tumpora.

¹⁸ Im marimago yemeserem nūrah sugkū nigeven ra nipmi miyi yōmelampalam mōĭmtūok empī baptisma iran.

¹⁹ Im pol sugkū iyi yivi nevag yemorigi torugat. Im Sol yemete nugkon dan dal ovnūrie ra Damaskus.

²⁰ Marimago iyi yemtorenūwi sah memokū Krĭstō Netni isen Nōbū ra mumpon ōvun nimo tavsogi.

²¹ Kō omwisū mori dūmūrigi dūmavlugi mūmūtagkelora mūmokū, Iyi mori yemokinora mori dūmūfwaki ra nin mori ra Yerūsalem, mokovelum ĭgko memokū onumpi sugkū, worēeti ĭm torora punora ōvun potni sokowar kū?

²² Kō Sol yemtorugat mōmū mo mumpi sumpelūlya tarū isenda ōveteme Isrēel mori dūmetĭndowi Damaskus, memsese punora ĭtnesog, ma iyi mori Krĭstō.

²³ Im penūri dan sikat ōveteme Isrēel dūmaūor ugi mūmokū wontalugi iyi:

²⁴ kō Sol yemorigi dūmūsenteri iyi. Mirora dūmavlis ra ōvun puketampet dan ĭm pūmrok mūmokū woretalugi iyi:

²⁵ kō ōvun nūrie dūmūvī iyi pūmrok mūmūvkisep ra mumpon woretovi ra nokoren novūvent.

²⁶ Im pol sugkū Sol yivelum ra Yerūsalem yemokū iyi onūrie iranda ovnūrie; kō irora sū dūmūmtitugi iyi mūtūtavnirĭgi ma iyi sī ra irora ovnūrie.

²⁷ Im Barnabas yivi iyi memtori punora ōvun apostol memenūwi punora memokū ugi nokowo iyi yokesi Novsūromon ra selat, mori yemenūwi pugi, ĭm nokowo ra Damaskus iyi yemtorenūwi sah nam ra nin eni Iesū.

²⁸ Miyi yempe ūnisog momemetūratumpeni ratilat dal irora ra Yerūsalem,

²⁹ miyi yememūasūmperi nam ra nin eni Iesu Novsūromon: meturamtugi nam enirora ōveteme Helene, mirora dūmokū wontalugi iyi.

³⁰ Kō pol sugkū raveneme dūmokili ugi irora dūmūtori ra Sesaria mūmūtamūli iyi ra Tarsus.

³¹ Movun semsimak dūmūte ra ninparata ra nūrū sū Yūdia ĭm Kalĭli ĭm Sameria mūmūteli horog. Im pol sugkū dūmavan ra nimtetugi ves Novsūromon ĭm nelintugi eni Naviat Tumpora mūmūtendam.

³² Im Piter yemavan ra nūrū sū yemeyep ra Lidapunora ōvun tumpora mori dūmūtindowi yūi.

³³ Miyi yemokesi yūi sī neteme nin eni Enias mori yemale ra nevlok eni nevi ēt; miyi yivi namarat palsi.

³⁴ Im Piter yemenūwi pugi memokū, Enias, Iesū Krĭstō umnumpi kĭk horigeves; etūok mēeve nevlok enugkĭk.

³⁵ Marimago iyi yemtūok. Momwisū ra Lida ĭm Saron dūmokesi iyi dūmūsorugi Novsūromon.

³⁶ Im sī nūrie ra Yoppa nin eni Tabisa nalig Dorkas, imo navisen yemnumpi ōvun numpūrak aremī sikat, mov numpelēves.

³⁷ Metepō ran dan sū mori iyi yivī ratekomisah. Im Lida potipot Yoppa, movnūrie dūnamarat momas:

³⁸ dūmūrowugi mūtipe iyi ra silevck mūrigi Piter yūi, mūmūtamūli dūrū ōveteme pugi mūmūsenigi worovelum itnum punora. Im Piter yemtūok moĭmpe dal irora.

³⁹ Im pol sugkū yivelum dūmūtori musah ra silevok ratekomisah: movun ne viumpūwi omwisū dūmūtūr ra nokoren eni mū mageri mūmūsesi ōvun simplaūon movun nemas mori Dorkas yemeteri polekū iyi dal irora.

⁴⁰ Im Piter yemtamūlora sū ratilat, miyi yemseumpūneterin memufwaki, miyi yemtopotnemi nokolisiran memen ūwi memokū, Tabisa, Etūok. Miyi yemelampe; ĭm pol sugkū yemokesi Piter yemtūok metesep.

⁴¹ Miyi yemovugi nokoven memtūki sah iyi; ĭm pol sugkū yemovrokonda ōvun tumpora neviumpuwi yemetipe iyi ūniminda nomūrep.

⁴² Narĭgi yemokompeligi Yoppa omwisū, ĭm sikat dūmūtavnirĭgi iran Novsūromon.

⁴³ Miyi yemete dan sikat ra Yoppa, ūndū Simon taner.