Ovun Apostol 1 - NAM NUMPUSOK ITĒVAU ENI IESU KRISTO NOVSUROMON ENUGKOS 2019

¹ Tiofilus, netiyi mori yobūm yaū metĭyi memokū ugi siainesū Iesū yimatepotni worumpi memtavsogi,

² Mafeli dan mori yempĭ sah iyi kō mampum ugi Naviat Tumpora iyi yempasiwokonda ōvun apostol mori iyi yimtampol ora;

³ Iyi yemesepen sesi iyi punora ugi ōvun numpūvsok itnesog ĭndowi mirora dūmūrūn okesi iyi dan sū forti, miyi yemorunenūwi punora memokū ugi lō isen Nōbū.

⁴ Im ra nempugon mori iyi dal irora dūmūsemsimokonda, iyi yempasiwokonda memokū irora ūtū awi Ierūsalem, kō wantevetwi nievĭwos nam isen Itemen, iyi yemenūwi memokū mori kĭmūrĭgi yaū mepmenūwi pugkūm memokū ugi.

⁵ It Yoane yemumbaptiso ugi nū, kō wam baptiso irami ugi Naviat Tumpora, ĭm tawi dan sikat.

⁶ Im pol sugkū dūmūsemsimokonda irora dūmūtagkeli iyi mūmōkū, Novsūromon, kĭk ampitorileki lō punora ōveteme Isrēel ra nempugon marima kū?

⁷ Miyi yemenūwi punora memokū, Tawi nisekomi worokili ugi ōvun nempugon mōvun dan mori Itemen umantipe isen.

⁸ Kō kĭmi kwampi horog nempugon Naviat Tumpora ampelum irami; ĭm kĭmi ōvun numpūvsok kwonumpūvsok ugi yaū ra Ierūsalem, ĭm Iūdia orawisū, ĭm Samēria ĭm ra nūrū sū nūrū sū.

⁹ Iyi yemenūwi imosū, polekū irora dūmūtopotnemi yempīsah iyi, ĭm sī numpūwaū yemuriuki sah iyi marugi niminda.

¹⁰ Im polekū irora dūmūtopotnemi ĭndowi ūnpokōp nempugon iyi yempe, ĭm dūrū ōveteme dūevora ugi ōvun nemas nesebo;

¹¹ Mirora dūmūnūwi mutnokū, Oveteme Kalili, irantie kūmantūrū mumuntopotneme ūnpokōp? Iesū mori okevīsah iyi ūnpokōp marugkūm umampelum sugkū kokesi iyi okeve ĭm sah ūnpokōp.

¹² Mirora, dūmūtorileki ra Ierūsalem mūwi numpūo Olivet, mori potipot Ierūsalem sugkū isūt dūmokū netevokontū wonavan ran danemindog.

¹³ Im pol sugkū dūmintorimpe dūmūsah ūnisog silebok imelūo dūmūte Piter ĭm Yakobo ĭm Yoane ĭm Andrū, Filip im Tomas Bartolomū ĭm Matīyū, Yakobo netni eni Alfius, ĭm Sīmon Selotes, Yūdas avinsĭ eni Yakobo.

¹⁴ Irora sū ugi tarū siteven dūmatikisah ugi nufwaki mesenigi movasiven dal sugkū, ĭm Mēri dineme isen Iesu, ĭm dal ravensieme isen.

¹⁵ Ran dan sū mori yemtoūk ileboteven irora ōvnūrie (ninda omwisū semsimak sugkū nagkū wun hunder ĭm twenti) memenūwi memokū,

¹⁶ Oveteme, Ravūgsīeme, okompelisū imo nam ra mumpon netiyi tumpora mori Naviat Tumpora yipmenūwi ra naveran eni Dēvid memokū ugi Yūdas mori yemtorora mori dūmūruleki Iesū.

¹⁷ Yeme-epi iyi dal kos, yivi imo numpūrah.

¹⁸ Neteme mori yivasi sī nūrū ugi nipmi satindi isen; miyi yemumol yobūm gi numpun yeseri ileboteven, mōvun nalnilniwara isen yeserim.

¹⁹ Im omwisū mori umantendowi ra Ierūsalem dūrĭgi mūmatovnin nūrū mori mokū, Akeldama, fan nam Nūrūn de.

²⁰ It yemetiyi nam ra mumpon netiyi Narūfo. Ete timnamgis eniwi, Im letūtewi yūi sī neteme: Mete tamponūm iran worotorugat.

²¹ Popowo imō sugkū aremi sī ra irora ōveteme mori dal kos dan sū polekū Novsūromon yemnavan dal kos.

²² Marugi baptisma isen Yoane mafeli dan mori okevĭsah iyi marugkos, worete neteme numpūvsok dal kos ugi nivsorasah isen marugi nemas.

²³ Mirora dūmutipe dūrū, Yosef nalĭg isen Barsabas, ĭm nin deselugi isen Yustus; ĭm Matīas.

²⁴ Mirora dūmūfwaki memokū; Ah, Novsūromon kīk e magkili tarū isenda ōveteme omwisū, sesi pugkam itokowo ra irora dūrū, koko tampoli.

²⁵ Moko iyi ampi nugkon imō numpūrah dal ōvun Apostol mori Yūdas yemowi ugi narekĭndi woreve ra nūrū isen.

²⁶ Mirora dūinasinduri ōvun lot, memokesi yemtampoli Matīas dūmūsepi iyi dal ōvun apostol eleven.