I. Timote 1 - NAM NUMPUSOK ITĒVAU ENI IESU KRISTO NOVSUROMON ENUGKOS 2019

¹ Pol, Apostol eni Iesū Krĭsto ugi nam alam eni Nōbū Nēyōwara enugkos, ĭm Iesū Krĭstō ratevetūi enugkos; pugi Timote, netūg tanepo ran tavniri:

² Itemas pau, ĭm nelintugi ĭm ninparata, marugi Nōbū Itement ĭm Iesū Krĭstō Novsuromon enugkos.

³ Ya onūwi punok woretindowi Efesus pol sugkū yaū impe Masedonia, ma kĭk oyevora nugkon woretū tavsogi nam sī mōmū,

⁴ ĭm woretūrĭgi nam nagkaūĭntan sebet nam ĭm ninda ōvun ūvūmle ra nator, ĭt imo siame natipotni naūor ūr, ĭm tawi nesitū imo mori amamne ra Nōbū ugi tavniri; ĭm ya magkū sugkū punok marima.

⁵ Ko fan nam ugi imo nempasewugi oti nelintugi punora ōveteme, ūmamne ra nowant sentevives ĭm tarū aremī ĭm tavniri ĭtnesog:

⁶ dūmūwi imo siame nugkon ra irora, ĭm dūmūvoli irora pe irora worenūwi sebet nam; mūmnakĭugi woreti ōvun tavsogi ra nam alam,

⁷ kō irora ūtū magkili sie irora ūmanūwi, kū ugi imo mori irora ūmentavniri mūmnatekisah ugi.

⁸ Kō kos kĭm lagkili ma nam alam oti aremī, nagkū sī afinte aremī sugkū nam alam,

⁹ ĭm magkili ma dūtū tipe nam alam nisekon neteme ĭt nugko numpi isen, kō nisekonda ōvun nareki nam alam ōvun nugkugko, ĭm ōvun sendoekie ĭm ōvun narekisat, nisekonda ōvun nagkaū ōvun nam sat, nisekonda ōvun talugi itemenda ĭm dĭnemenda, nisekonda ūmentalokonda ōveteme, ĭm nisekonda ōvun tampalaū,

¹⁰ nisekonda ovatemen ūmnumpi sat iranda ūndū ĭtovatemen, nisekonda ūmnumprok ōveteme, nisekonda ōvun namli, ĭm nisekonda ūmentesūwī namli, ĭm nagkū sī entie sī mōmū tawi tanepo sugkū nam alam;

¹¹ sugkū nam navosavos aremī wokon eni Nōbū nevieves, dūmūtipe irag worefinte.

¹² Yakum umpalugi iran Iesū Krĭstō Novsūromon enugkos, yemumpi yaū faneteme, popōwo yemokū yaū tanepoves nimsin, yemetipe yaū ra imo nūmpūrah isen;

¹³ ĭt yaū menūwi nam sat nusian etūwī, im yaū mumpi nugkugko iranda, ĭm satevokonda ōveteme;

¹⁴ kō dumafielĭntokoyaū, popōwo yaū, mumpi ugi numgi ĭm netū tavniri; kō yeti nusian tamas itemas—paū eni Novsūromon enugkos, yemōvoyau tavniri ĭm nowag nelĭntugi nisekon ra Iesū Krĭsto.

¹⁵ Itnesog imo nam ĭm aremi wontavnirigi omwisū ugi, ma Iesū Krĭstō yivelum ra nemap woreumkorēyō wara ōvun narekisat; ĭt yaū numpūn numpindi enirora:

¹⁶ kō popōwo pe ugi imo dumefielĭntokoyaū, ma ra yaū sugkū numpūnda Iesū Krĭsto anūatumpene novsin nelintugi omwisū nimsin safi nisekonda wontavnirigi iran ugi nomūrep ūvrūni.

¹⁷ Im nisekon Natemonūk ūnam, otū avtar, ūtūmagesi. Nōbū mori saiteven wokon, antemante sesieves ĭm nilasilaswi ūvūm nevisū indowi indowi. Amen.

¹⁸ Im imo nempasewugi yakum manuwi pon ok, netūg Timote, sugkū nam pon ok ĭtmampūm dūpmūnūwi, memagkū popōwo ugi irora kante faneteme woratekisah ra imo numpūrk aremai;

¹⁹ momerarsivsi taviniri ra nōwan aremai; mori ugi imo nugkon ra irora dūmūtafugi morokonda ĭm dūmokeni tavniri (enirora):

²⁰ nugkon mori ra irora mori Hīmenius ĭm Aleksander; mori yaū ĭmtafugi irora nisekon Setan, magkū ontavsokonda woretūnūwi nam sat.