Job 27 - Biblia Enxet

Job

^1-2 ¡Naqsók ko'o ektemessásak sekpeywa yetlo sekxeyenma apwesey m'a Dios ekha apyennaqte, memáheyo nak hetaqmelchessásekxak sekha, seyánchessáseykegkoho nak eklo ewáxok,

³ segkéssama nak makham sekyennaqte, tén han sénnama,

⁴ matnehek chá'a sekmowána amya'a, maxének sa' nahan chá'a m'a amya'a megkamámnaqsoho nak!

⁵ Alenxanmohok sa' aqsa sekxeyenma sekteme meyke sektémakxa sekyennákxa nak makham; ¡magwohók sa' ko'o kéxegke kólteméssesek naqsók ma'a kéltémakxa sélxeyenma!

⁶ Malwátéssemek sa' sekxeyenma sekteme meyke sektémakxa, hakte méko aqsok kamegqaksek ewáxok.

⁷ ¡Apyókxoho sélenmexeykha nak chá'a ko'o kaxhok sa' ektáhakxa m'a ektémakxa nak chá'a m'a élmasagcha'a apkeltémakxa, tén han megkapéwomo nak chá'a apkeltémakxa!

⁸ ¿Yaqsa aqsok eleyxek kaxwók ekmaso aptémakxa apmasséssesa enxoho apweynchámeykha m'a Dios?

⁹ Apwet'ak agkok ekyentaxno apha, megyéxok Dios ma'a apwóneykha.

¹⁰ Hakte méteyágweykmok ekpayheykekxa apwáxok apyetleykencha'a m'a ekha nak Apyennaqte, melmaxnagkók han chá'a eltamhok epasmok.

¹¹ Axekmósek sa' ko'o ektémakxa ekha ekyawe apmopwána m'a Dios, tén han aqsok apmáheyo nak elának ma'a ekha nak Apyennaqte.

¹² Kélweteyak agkok kéxegke kélyókxoho xa, ¿yaqsa ektéma kélpaqméteykencha'a aqsa chá'a?

Sofar

¹³ Keso apkellegeykegkoho apmáheyo nak egkések Dios ekha Apyennaqte m'a énxet'ák megkalmayósa nak elanok aqsok, tén han élmasagcha'a apkeltémakxa:

¹⁴ apxámok sa' eykhe etnehek ma'a apketchek, eletsapok sa' eyke kempakhakma, essenhan eñama meyke aptéyak.

¹⁵ Negmasse ekmaso sa' kalnápok ma'a apkeleymomap nak meletsapma, megkallekxagwaha sa' nahan ma'a apnaqteyegka'a neptámen.

¹⁶ Exámasagkok sa' eykhe sawo ekmope élmomnáwa m'a ekmaso nak aptémakxa, ektémól'a xapop, apxámok apagko' sa' han etnehek ma'a apkelnaqta,

¹⁷ énxet ekha kéláyo sa' eyke elmaha xa apáwa nak, xama énxet meyke aptémakxa sa' nahan elmaha xa sawo ekmope élmomnáwa nak.

¹⁸ Aphápek apxagkok ma'a ekmaso nak aptémakxa, máxa m'a nátetkok axagkok la'a, máxa m'a apkeláneykha nak namyep appakxanma.

¹⁹ Xámok sa' makham katnehek aqsok apagkok etyenek ma'a ekxákma nak aqsok apagkok, keñe sa' apxatakha'a enxoho, meyke aqsok apagkok sa' katnehek.

²⁰ Apyegwakto sa' kay'áwak ma'a ekhem, éxchahayam ekyennaqte sa' kaswok axta'a.

²¹ Segyettekhane eñama teyapmakxa ekhem sa' katekkesek apxagkok kaswok;

²² kawátekhápok sa' meyke apmopyósa élányo, emáwhok sa' eykhe exyánegkesek.

²³ Kayaqmaksek sa' éxchahayam yetlo éxtegyawà tén han ekpáwà émpehek.