Job 18 - Biblia Enxet

Bildad

^1-2 ¿Háxko ekwánxa elwátessók appaqméteykha aqsa exchep? Ey'ásegwakxoho sekxók aptáhakxa', keñe sa' ólpaqhetchesaxkoho'.

³ ¿Yaqsa ektáha senteméssesa nak máxa aqsok nawha'ák, keñe han sẽltamheyncha'a sẽlyeyháxma?

⁴ ¿Meyke énxet ya sa' katnekxak se'e náxop, essenhan kayaqmagkasek mók ekheykegkaxa m'a meteymog élyawe eñama aplómo apagko'?

⁵ Máxa cháléwasso élsapane sa' etnahagkok elmassegwók ma'a élmasagcha'a nak apkeltémakxa. Sa' etnahagkok ma'a ektémól'a kaspónak táxa eyáléwe.

⁶ Kamaskok sa' élsássesso exma m'a cháléwasso; kalsapónak sa' cháléwasso m'a apxanák.

⁷ Kamaskok sa' élyennaqte apkelxega, kápekxohok sa' agkok ma'a aqsok apmáheyo nak elanagkok.

⁸ Kóltegyéssesek sa' apmonye' yám'én, keñe sa' kalespok apmagkok xa yám'én nak.

⁹ Kóltegyéssesek sa' táma apmonye', keñe sa' kalpextétek naxta'a apmagkok.

¹⁰ Kólpóshok sa' kelhanma m'a ámay apagkok nak, yaqwayam enxoho kamok ma'a apteyágwokmo enxoho.

¹¹ Elmeneyha sa' chá'a apmahágkaxa enxoho; eyaqmasakpok sa' chá'a apmahágkaxa enxoho.

¹² Masséssek apyennaqte meyk eyaqhe; peyk káhapwak ma'a ekmaso apha.

¹³ Kasawhaksek sa' aphápetek ma'a negmasse, kataqmelchesagkohok sa' keymhowaksek.

¹⁴ Katekkesek sa' han ma'a apxagkok ektaqmalmókxa nak apha, keyñawasagkok sa' ma'a aphakxa nak wesse' nétsapma.

¹⁵ Kólwatnések sa' apxagkok; kólexpaqheykha sa' aqsok apagkok ma'a aqsok ánek ekyátekto eyáléwomól'a.

¹⁶ Aphawók ma'a yámet élyamayél'a kepmenák tén han áwa'.

¹⁷ Kamassegwók sa' apxénamap keso náxop, megkaxénaxchekxók sa' chá'a kaxwók apwesey.

¹⁸ Kólyenyók sa' ekyáqtésakxa exma apkeñama m'a élsakókxa exma; kóltekkesek sa' keso nélwanmeygkaxa.

¹⁹ Méko sa' etnehek aptawán'ák neptámen ma'a aphakxa nak; megyeymakpehek sa' xama enxoho m'a aphawóxama nak.

²⁰ Legáxcheyk sa' agkok ektáhakxa, cham'a teyepmakxa ekhem, tén han taxnegwánxa ekhem, kalyegweyxchek sa', kalmeneyxkohok agko' sa'.

²¹ Cháxa ektémakxa kamassegwók apyennaqte m'a énxet ekmaso nak aptémakxa', megkamopmenyého nak ey'asagkohok ma'a Dios.