ZEPHANIAH 3 - Edisana ñwed Abasi Ibom

¹ ƆDIƆK ɔnɔ owo eke ɔsɔŋde ibuot onyuŋ edehede, obio utuk!

² Enye ikopke uyo: ibɔhɔ item: ibuɔtke idem esie ye Jehovah; isaŋake ikpere Abasi esie.

³ Mbɔŋ esie ke ufɔt esie edi lion mfriori: mme ebierikpe esie edi wolf mbubreyo; mmɔ isuhɔke baba ŋkpɔ kiet inɔ usenubɔk.

⁴ Mme prophet esie edi mbon ŋkimidem ye mbon mbubik; mme oku eise esabare edisana ŋkpɔ: mmɔ ebiat ibet.

⁵ Edinen Jehovah odu enye ke esit: enye idinamke se ikwaŋade: eyeda ikpe esie kpukpru usenubɔk onim ke uŋwana: enye ikpuhe; edi owo ŋkwaŋa ifiɔkke but.

⁶ Mmosibe mme idut mfep: mme tower mmɔ emewure; mmabiat mme efak mmɔ, ndien owo eke asaŋade ebe iduhe: emesobo mme obio emi, ndien owo eke oduŋde iduhe.

⁷ Ŋkɔdɔhɔ nte, Kam bak mi, bɔ item; ndien idisibeke iduŋ esie ifep, kpa kpukpru se ŋkonimde nnɔ enye: edi mmɔ ebak edemere enam kpukpru ido mmɔ ediɔk.

⁸ Jehovah ɔdɔhɔ, ete, Mbufo ebet mi ndien, tutu osim ke usen eke ndidahade ke enyɔŋ nda mbume. Koro mmaduak ndisop mme idut, nnyuŋ mbon mme obio ndidem, man ŋŋwaŋa mmɔ ifuresit mi ke idem, ofuri ikaŋ iyaresit mi: koro ofuri ererimbot eyeta ikaŋ ufup mi.

⁹ Koro ke ini oro nyekabare edisana mkpɔk-inua nnɔ mme idut: man kpukpru mmɔ ekot enyiŋ Jehovah, man enam ŋkpɔ enɔ enye ke esit kiet.

¹⁰ Mmɔ eke ekpede mi ubɔk, eyen-aŋwan ikɔt mi emi esuanade, eyeto ke edem mme akpa Ethiopia oko, ebiom utomo mi edi.

¹¹ Ke usen oro but idinamke fi ibaŋa kpu-kpru ido fo emi afo ekeduede mi: koro ke ini oro nyesio mbon iseri emi eburede mbure ke otu mbufo mfep: ndien afo udutɔŋɔke aba ntak utaŋ idem ke edisana obot mi.

¹² Nyenyuŋ nsuhɔ mbio unana ye nditɔ ubuene ke ufɔt mbufo, ndien mmɔ eyebuɔt idem ke enyiŋ Jehovah.

¹³ Ubak Israel emi ɔsuhɔde idinamke ukwaŋ-ŋkpɔ, idinyuŋ isuhe nsu: owo idinyuŋ ikwe edeme abiaŋa ke inua mmɔ: koro mmɔ eyedia ŋkpɔ enyuŋ esuhɔre ena, ndien baba owo kiet eke anamde mmɔ ndik ididuhe.

¹⁴ O adiaha Zion, kwɔ; mbufo Israel esio mkpo idara; O adiaha Jerusalem, dara nyuŋ bre ke ofuri esit.

¹⁵ Jehovah ɔmɔbɔ fi ufen efep, amakabare usua fo efep: edidem Israel, Jehovah, odu ke otu mbufo: afo udukwe aba idiɔk.

¹⁶ Ke usen oro eyedɔhɔ Jerusalem, ete, Kufehe ndik: O Zion, kuyak ubɔk emem fi.

¹⁷ Jehovah Abasi fo odu ke ufɔt fo, ɔmɔsɔŋ; enye eyenyaŋa, eyedat esit abaŋa fi ke idara; enye eyedop uyo ke ima esie, eyebre abaŋa fi ke ikwɔ.

¹⁸ Nyesop mmɔ eke etuade ebaŋa usɔrɔ, (mmɔ eto ye afo,) emi ebiomde esuene ebaŋa enye.

¹⁹ Sese, ke ini oro ami nyenam kpukpru mmɔ eke etukde fi; nyenyuŋ nnyaŋa enye emi edide mbuŋɔ, nnyuŋ ntaŋ owo emi mmɔ ekebinde enye efep ndi; nyuŋ nim mmɔ ke itoro ye ke etop ke kpukpru mme idut esuene mmɔ.

²⁰ Ke ini oro nyeda mbufo nduk, kpa ke ini emi nditaŋde mbufo mbon; koro nyenim fi ke etop ye ke itoro ke otu kpukpru mme idut ke ererimbot, ke ini emi ndidade mbufo emi edide mbuot-ekɔŋ mfiak ndi, ke enyin mbufo; Jehovah ɔdɔhɔ.