ZEPHANIAH 2 - Edisana ñwed Abasi Ibom

Ubiomikpe Emi Esimde Mme Asua Nditɔ Israel

¹ MBUFO esop idem mbufo, enyuŋ ebono, O idut eke mikemeke ndikut but;

² ke ewuhɔ mika-imanke kaŋa; usen eyebe nte mbio ibokpot; ke ikaŋ iyaresit Jehovah mika-isimke kaŋa mbufo.

³ Mbufo kpukpru suŋ-suŋ mbio isɔŋ emi enamde ikpe esie, eyom Jehovah; mbufo eyom edinen ido, eyom suŋ-suŋ ido: mme mbufo eyedibe ke usen iyaresit Jehovah.

⁴ Koro eyedaŋa ekpɔŋ Gaza, Ashkelon eyenyuŋ edi ndon-ndon; ama edi Ashdod, eyebin enye efep ke ufɔt uwemeyo; eyenyuŋ edibere Ekron efep.

⁵ Osuk ɔdiɔk ɔnɔ mme andiduŋ mben inyaŋ idut mme Cherethite! uyo Jehovah abaŋa mbufo; O Canaan, isɔŋ mme Philistine, nyesobo fi ŋko tutu owo eke oduŋde iduhe.

⁶ Ndien mben inyaŋ eyedi itie obube mmɔŋ mme ekpemerɔŋ ye eke nna ufene.

⁷ Mben inyaŋ eyenyuŋ enyene ufɔk Judah eke ɔsuhɔde; mmɔ eyedia ŋkpɔ ke esit: ke ufɔk Ashkelon mmɔ eyesuhɔre ena ke mbubreyo: koro Jehovah Abasi mmɔ eyenɔ mmɔ ufen; ndien enye eyeda mbuot ekɔŋ mmɔ afiak edi.

⁸ Ŋkokop esuene Moab, ye isuŋi nditɔ Ammon, emi mmɔ esuenede ikɔt mi, enyuŋ eseride iseri ebaŋa adaŋa mmɔ

⁹ Jehovah mme udim Abasi Israel ɔdɔhɔ, ete, Ma uwem mi, mmɔdo Moab miditreke ndi-biet Sodom: nditɔ Ammon idinyuŋ itreke ndibiet Gomorrah: ebiet eke nettle ɔkɔride, ye obube inuŋ, ye nsinsi ndon: ikɔt mi eke edisuhɔde eyebume mmɔ, nditɔ idut mi eke esuhɔde eyeda mmɔ enyene.

¹⁰ Mmɔ eyeda emi ke ibuot iseri mmɔ: koro mmɔ esuŋide, enyuŋ eseride iseri ebaŋa ikɔt Jehovah mme udim.

¹¹ Jehovah enyene ndik akan mmɔ: koro enye eyesobo kpukpru mme abasi ererimbot; ndien kpukpru mme isuo mme idut eyetuak ibuot enɔ enye, kpukpru owo ke ebiet mmɔ.

¹² Mbufo ŋko nditɔ Ethiopia edi se ofut mi ediwotde.

¹³ Ndien enye eyenyanare ubɔk esie odori edem edere, onyuŋ osobo Assyria; eyenyuŋ onim Nineveh ke ikpikpru ndon, edisat nte wilderness.

¹⁴ Ndien otu ufene eyesuhɔre ena ke esit, kpukpru mme unam idut: ikpaŋ ŋko ye ebiɔŋ eyeduŋ ke otu mbuot adaha esie; uyo mmɔ eyekwɔ ke window; ŋwure eyedu ke asaŋudɔk: koro efuhɔrede cedar emi ekenamde usɔ ke esit.

¹⁵ Emi edi obio mbre emi etiede ke ndue-idem, emi ɔdɔhɔde ke esit esie, ete, Ami ndu, ndien efen iduhe ke mibɔhɔke ami: enye anam didie akabare edi ikpikpu, ebiet eke mme unam esuhɔrede ena! kpukpru mmɔ eke esaŋade ebe enye eyesi, enyuŋ efuŋ ubɔk mmɔ.