ZECHARIAH 9 - Edisana ñwed Abasi Ibom

Ubiomikpe Emi Esimde Mme Asua Nditɔ Israel

¹ MBIOMO uyo Jehovah ke isɔŋ Hadrach, ndien Damascus eyedi ebiet nduɔk-odudu esie: koro owo ye kpukpru mme esien Israel eyetiŋ enyin ke Jehovah.

² Hamath ŋko emi adianade enye ke adaŋa, ye Tyre ye Zidon ŋko, koro enye ɔfiɔkde ŋkpɔ akan.

³ Tyre okonyuŋ ɔbɔp ɔkpɔsɔŋ ebiet ɔnɔ idem esie, onyuŋ okubi silver nte ntan, okubi edifɔn gold nte mbat efak.

⁴ Sese, Ɔbɔŋ eyebin enye efep, onyuŋ ɔtɔ odudu esie ke inyaŋ; ndien enye eyeta ikaŋ.

⁵ Ashkelon eyekut, onyuŋ efehe ndik; Gaza ŋko eyekut, onyuŋ ɔfuhɔ eti-eti, ye Ekron; koro mbuɔtidem esie enamde enye but; ndien edidem eyetak ke Gaza: owo idinyuŋ iduŋke ke Ashkelon.

⁶ Ndien isen owo eyeduŋ ke Ashdod: nyenyuŋ nsibe ubɔŋ mme Philistine mfep.

⁷ Ndien nyesio enye iyip esie ke inua mfep, nnyuŋ nsio enye ŋkpɔ ndek ke edet mfep; ndien enye kpa enye eyesuhɔ ɔnɔ Abasi nnyin, enye eyenyuŋ ebiet ɔbɔŋ ke Judah, Ekron eyenyuŋ ebiet mme Jebusite.

⁸ Ndien nyenam nna-ekɔŋ ŋkan ufɔk mi ŋkuk mbak udim-ekɔŋ, ke ini enye asaŋade ebe, onyuŋ ɔnyɔŋde edi: baba owo utuk idinyuŋ isaŋke aba ke otu mmɔ ibe: koro ke emi ke nda enyin mi nse.

⁹ O adiaha Zion, dat esit eti-eti; sio mkpo idara, O adiaha Jerusalem: sese, edidem fo eyedi ke ɔtɔ fo; enye enen, onyuŋ onim idem ke andinyaŋa; enye edi suŋ-suŋ, onyuŋ odoro ke ass, ye ke abak ass, eyen uman ass.

¹⁰ Ndien nyesibe chariot mfep ke Ephraim, nsibe horse mfep ke Jerusalem, eyenyuŋ esibe utiga ekɔŋ efep: ndien enye eyetaŋa emem ɔnɔ mme idut, onyuŋ ada ubɔŋ ɔtɔŋɔde ke inyaŋ kiet tutu osim inyaŋ eken, onyuŋ ɔtɔŋɔde ke akpa tutu osim ke mme utit ererimbot.

¹¹ Ndien ama edi afo ŋko, iyip ediomi fo eyesin nsio mbon ŋkpɔkɔbi fo mfep ke obube eke mmɔŋ miduhe.

¹² Mbufo mbon ŋkpɔkɔbi idori-enyin, efiak edi ke ɔkpɔsɔŋ ebiet: kpa mfin emi ke ndɔhɔ nte ke ndinɔ fi utim ikaba.

¹³ Koro ndudide Judah ke idem mi nda Ephraim nsin ke utiga, nnyuŋ ndemere nditɔ fo, O Zion, nte eŋwana ye nditɔ fo, O Greece, nnyuŋ nnim fi ke ofut owo uko.

¹⁴ Ndien eyekut Jehovah ke enyɔŋ mmɔ, ndien idaŋ esie eyewɔrɔ nte obuma: ndien ɔbɔŋ Jehovah eyefuri ukorowo, onyuŋ asaŋa ke oyobio Teman.

¹⁵ Jehovah mme udim eyekpeme mmɔ; ndien mmɔ eyedia, enyuŋ edigi itiat-utop; eyenyuŋ eŋwɔŋ, enyuŋ eyomo uyom nte ke wine; ndien iyip eyeyɔhɔ mmɔ nte ke bowl, ye nte inuk itie-uwa.

¹⁶ Ndien Jehovah Abasi mmɔ eyenyaŋa mmɔ ke usen oro, eyenyaŋa ikɔt esie nte otu ufene: koro mmɔ edide itiat anyaŋa, eke emenerede ke enyɔŋ isɔŋ esie nte banner.

¹⁷ Koro enye ɔfɔn didie! enye onyuŋ eye didie! Ibokpot eyenam mkparawa ekɔri, obufa wine eyenyuŋ anam nditɔ-iban ekpon.