ZECHARIAH 5 - Edisana ñwed Abasi Ibom

Ɔyɔhɔ Ŋkukut Zechariah Itiokiet: Ikpa-Ŋwed Emi Efede

¹ NDIEN ŋkabare, nnyuŋ mmenere enyin mi ŋkut; ndien, sese, ikpa-ŋwed eke efede.

² Ndien enye ɔdɔhɔ mi, ete, Afo okut nso ŋkpɔ? Ndien mbɔrɔ nte, Ami mmokut ikpa-ŋwed eke efede, uniɔŋ esie edi ibio-idomo-okuk edip, ubara esie ŋko edi ibio-idomo-okuk duop.

³ Ndien enye ɔdɔhɔ mi, ete, Emi edi isuŋi eke ɔwɔrɔde asaŋa ke iso ofuri isɔŋ: koro eyesɔhi kpukpru inɔ ke edem emi efep, nte enye asaŋade; enyuŋ esɔhi kpukpru owo eke etomode ke edem eken efep,

⁴ nte enye asaŋade. Jehovah mme udim ɔdɔhɔ ete, Nyeda enye ŋwɔrɔ, ndien enye eyeduk ke ufɔk inɔ, ye ke ufɔk owo eke otomode nsu-nsu ke enyiŋ mi: ndien enye eyeduŋ ke ufɔt ufɔk esie, onyuŋ osobo ufɔk ye eto esie, ye itiat esie.

⁵ Ndien angel oro ekenemdede ye ami ɔwɔrɔ, onyuŋ ɔdɔhɔ mi, ete, Menere ndien enyin fo, nyuŋ se nsiwɔrɔ ntre. Ndien ndɔhɔ nte, Enye edi nso?

⁶ Ndien enye ɔdɔhɔ ete, Emi edi ephah eke ɔwɔrɔde. Enye onyuŋ ɔdɔhɔ ŋko, ete, Iso mmɔ etie ntem ke ofuri isɔŋ.

⁷ Ndien, sese, mmɔ emenere talent ŋket efep: ndien ŋwan kiet etie do ke esit ephah oro.

⁸ Ndien enye ɔdɔhɔ ete, Emi edi idiɔk-ŋkpɔ. Enye onyuŋ emen ŋwan ɔduɔk ke esit ephah oro; onyuŋ odori enye itiat ŋket ke inua.

⁹ Ndien mmenere enyin mi ŋkut, ndien, sese, iban iba eto edi, ofum onyuŋ odu mmɔ ke mba: mmɔ enyuŋ enyene mba iba-iba, ebiet mba akpantana: ndien mmɔ emen ephah oro esin ke ufɔt isɔŋ ye ikpa-enyɔŋ.

¹⁰ Ndien mbup angel oro ekenemede ye ami, nte, Mme mmɔ emi eda ephah emi eka mmɔŋ?

¹¹ Ndien enye ɔbɔrɔ mi, ete, Ndibɔp ufɔk ke isɔŋ Shinar nnɔ enye: ndien eyewuk enye, enyuŋ ediɔk enye do ke itie esiemɔ.