ZECHARIAH 4 - Edisana ñwed Abasi Ibom

Ɔyɔhɔ Ŋkukut Zechariah Ition: Uwuk-Utuenikaŋ

¹ EKEM angel oro ekenemede ye ami ɔtɔŋɔ ntak edi edidemere mi, nte owo eke edemerede enye ke idap.

² Ndien enye obup mi, ete, Afo omokut nso ŋkpɔ? Ndien ami ndɔhɔ nte, Mmokut, ndien, sese, uwuk-utuenikaŋ eke enamde ofuri ke gold, ye bowl esie ke ibuot esie, utuenikaŋ itiaba esie enyuŋ edoro enye; mme utuenikaŋ emi edoro enye enyuŋ enyene ekwa itiaba itiaba;

³ eto olive iba enyuŋ ekpere enye, kiet ke ubɔk bowl esie nnasia, kiet eken ke ufien esie.

⁴ Ndien ami mbɔrɔ nnyuŋ ndɔhɔ angel oro enemede ye ami, nte, Ɔbɔŋ mi, mme mmɔ emi edi nso?

⁵ Ndien angel oro ekenemede ye ami ɔbɔrɔ mi, ete, Nte afo ufiɔkke se mme mmɔ emi edide?

⁶ Ndien ndɔhɔ nte, Ih ih, Ɔbɔŋ mi. Ndien enye ɔbɔrɔ onyuŋ ɔdɔhɔ mi, ete, Ikɔ emi ke Jehovah ɔdɔhɔ Zerubbabel, ete, Itoho ke odudu, inyuŋ itoho ke nsɔŋidem, edi oto spirit mi, Jehovah mme udim ɔdɔhɔ.

⁷ Afo akamba obot edi nso ŋkpɔ? Afo eyekabare edi una-isɔŋ ke iso Zerubbabel: ndien enye eyesio itiat ibuot ke mkpo idara, ete, Ufɔn, ufɔn enyene enye.

⁸ Ndien uyo Jehovah osim mi, ete,

⁹ Ubɔk Zerubbabel emetɔŋɔ ndibɔp ufɔk emi, ubɔk esie eyenyuŋ enam enye ema; ndien afo eyefiɔk ete ke Jehovah mme udim ɔmɔdɔŋ mi utom ke ɔtɔ mbufo.

¹⁰ Koro anie owo esin usen ekpri ŋkpɔ ke ndek? Ndien mmɔ eyedat esit, enyuŋ ekut uruk ŋket ke ubɔk Zerubbabel, kpa mbitiaba emi; mme mmɔ emi edi enyin Jehovah emi esuanade ese ofuri ererimbot.

¹¹ Ndien mbɔrɔ mbup enye, nte, Nsidi mme olive iba emi edude ke edem nnasia utuenikaŋ ye ke edem ufien esie?

¹² Ndien ntɔŋɔ ntak mbɔrɔ nnyuŋ mbup enye, nte, Nsidi ŋkɔk mme olive iba emi eŋwaŋade aran o-gold esio ke idem mmɔ esin ke ekwa gold?

¹³ Ndien enye ɔbɔrɔ mi, ete, Nte afo ufiɔkke se ŋkpɔ emi edide? Ndien ndɔhɔ nte, Ih ih, Ɔbɔŋ mi.

¹⁴ Ndien enye ɔdɔhɔ ete, mme mmɔ emi edi nditɔ-aran iba emi edade ekpere Ɔbɔŋ ofuri ererimbot.