ZECHARIAH 2 - Edisana ñwed Abasi Ibom

Ɔyɔhɔ Ŋkukut Zechariah Ita: Isuŋ-Utom Abasi Akama Uruk Udomo

¹ NDIEN mmenere enyin mi ŋkut, ndien, sese, owo ye uruk udomo ke ubɔk.

² Ndien ndɔhɔ nte, Afo aka mmɔŋ? Ndien enye ɔbɔrɔ mi, ete, Ŋka ndidomo Jerusalem, ŋkut se idide ubom esie, ye se idide uniɔŋ esie.

³ Ndien, sese, angel oro ekenemede ye ami ɔwɔrɔ, ndien angel eŋwen ɔwɔrɔ okosobo ye enye.

⁴ Ndien ɔdɔhɔ enye, ete, Fehe kɔdɔhɔ akparawa emi, ete Jerusalem eyeduŋ obio-iŋwaŋ, oto ke uwak owo ye eke ufene eke edude ke esit.

⁵ Jehovah onyuŋ ɔdɔhɔ, ete, Ami nyedi ibibene ikaŋ ŋkan enye ŋkuk, nyenyuŋ ndi ubɔŋ ke ufɔt esie.

⁶ Ho, ho, mbufo eto ke isɔŋ edem edere efeŋe, ke edi uyo Jehovah: koro ŋkasuande mbufo nte mme ofum heaven mbinaŋ; ke edi uyo Jehovah.

⁷ Ho Zion, emi oduŋde ye adiaha Babylon, nyaŋa idem fo.

⁸ Koro ntem ke Jehovah mme udim ɔdɔhɔ, ete Ke ini ubɔŋ edide, enye eyedɔŋ mi utom ke ɔtɔ mme idut oro ekebumede mbufo: koro enye emi otukde mbufo otuk eyen enyin esie.

⁹ Koro, sese, nyenyeŋe ubɔk mi nse mmɔ, ndien mmɔ eyekabare edi se ifin mmɔ ebumede: ndien mbufo eyefiɔk ete ke Jehovah mme udim ɔmɔdɔŋ mi utom.

¹⁰ O adiaha Zion, kwɔ nyuŋ dara: koro, sese, mmɔŋ ndi ndiduŋ ke ufɔt fo: ke edi uyo Jehovah.

¹¹ Ndien ediwak mme idut eyedian idem mmɔ ye Jehovah ke usen oro, eyenyuŋ edi ikɔt mi; ndien ami nyeduŋ ke ufɔt fo, ndien afo eyefiɔk ete ke Jehovah ɔmɔdɔŋ mi utom ke ɔtɔ fo.

¹² Ndien Jehovah eyeda Judah udeme esie enyene ke edisana isɔŋ, onyuŋ emek Jerusalem ŋko.

¹³ O ofuri obukidem, mbufo edop uyo ke iso Jehovah: koro edemerede enye ɔwɔrɔ ke edisana iduŋ esie.