ZECHARIAH 14 - Edisana ñwed Abasi Ibom

Ndutime Emi Edidide ye Akpatre Edikan

¹ SESE, usen Jehovah ke edi, ndien mmɔ eyedeme mbume fo ke ufɔt fo.

² Nyenyuŋ mbon kpukpru mme idut ndi Jerusalem, nte eŋwana ekɔŋ; ndien mmɔ eyeda obio, enyuŋ ebume ufɔk, enyuŋ esabare iban; ndien etaŋ ubak obio enyɔŋɔ nte mbuot-ekɔŋ, ndien idisibeke mbio eke esuhɔde ke obio ifep.

³ Ndien Jehovah eyewɔrɔ aka ekeŋwana ekɔŋ ye mme idut oro, kpa nte ke usen oro enye aŋwanade, ke usen ekɔŋ.

⁴ Ndien ke usen oro ukot esie eyeda ke enyɔŋ obot Olive emi anade ke iso Jeru-salem ke edem usiaha-utin, ndien obot Olive eyesiaha ufɔt-ufɔt ese edem usiakha-utin ye edem usop-utin, esine ke ata akamba itihere; ndien ubak obot kiet eyesehere aka edem edere, ubak eken eyenyuŋ aka edem usuk.

⁵ Ndien mbufo eyefeŋe ekeduk ke itihere ikpɔ obot mi: koro itihere ikpɔ obot eyetuak ke Azel: ndien mbufo eyefeŋe kpa nte ekefeŋede ebak unyek-isɔŋ ke eyo Uzziah edidem Judah: ndien Jehovah Abasi mi ke edi: kpukpru edisana ikɔt fo eyenyuŋ etiene fi edi.

⁶ Ndien ama ekem ke usen oro uŋwana ididuhe: ŋkpɔ uto eyedaŋa.

⁷ Ndien usen kiet eyedu, Jehovah ɔmɔfiɔk enye, idige uwemeyo, inyuŋ idige okoneyo: ndien ama ekem ke ini mbubreyo uŋwana eyedu.

⁸ Ndien ama ekem ke usen oro, mmɔŋ idim eyeto ke Jerusalem; ubak kiet eyeka inyaŋ edem usiaha-utin, ubak eken eyeka inyaŋ edem usop-utin: eyedu ke nda-eyo ye ke tuep.

⁹ Ndien Jehovah eyedi edidem ofuri isɔŋ emi; ke usen oro Jehovah eyedu kierakiet, ye enyiŋ esie kierakiet.

¹⁰ Ofuri isɔŋ eyekabare ebiet una-isɔŋ ɔtɔŋɔde ke Geba tutu osim ke Rimmon, ke edem usuk Jerusalem: enye (Jerusalem) eye-nyuŋ okoŋ, ndien eyeduŋ enye ke itie esie, ɔtɔŋɔde ke inua-otop Benjamin, tutu osim ɔtɔ akpa inua-otop, tutu osim ke inua-otop inuk, onyuŋ ɔtɔŋɔde ke tower Hananel tutu osim ɔtɔ unim wine edidem.

¹¹ Ndien mmɔ eyeduŋ ke esit, ŋkpɔ nsobo idi-nyuŋ iduhe aba; ndien Jerusalem eyeduŋ ke ifure.

¹² Ndien emi edidi ufen emi Jehovah edimiade kpukpru obio emi ekeŋwanade ekɔŋ ye Jerusalem; obukidem mmɔ eyeye-mere ke mmɔ esuk edida ke ukot mmɔ, enyin mmɔ eyenyuŋ eyemere ke ndudu mmɔ: edeme mmɔ eyenyuŋ eyemere ke inua mmɔ.

¹³ Ndien ama ekem ke usen oro, akwa ndutime eyeto Jehovah osim mmɔ; ndien kpukpru mmɔ kiet kiet eyemum mbɔhiduŋ mmɔ ubɔk, enyuŋ emenere ubɔk mmɔ eŋwana ye ubɔk mbɔhiduŋ mmɔ.

¹⁴ Ndien ŋko Judah eyeŋwana ye Jerusalem; ndien eyebin inyene kpukpru mme idut emi ekande ekuk, kpa gold, ye silver, ye edisine-ŋkpɔ ata ediwak.

¹⁵ Ndien kpa ntre ufen mme horse, ye eke mule, ye eke camel, ye eke mme ass, ye eke kpukpru ufene eke edude ke nna-ekɔŋ mmɔ, eyebiet ufen emi.

¹⁶ Ndien ama ekem kpukpru mbio kpukpru mme idut eke esuhɔde eke ekedide ekɔŋ ye Jerusalem, eyedɔk kpukpru isua ndituak ibuot nnɔ edidem, kpa Jehovah mme udim, nnyuŋ nnim usɔrɔ mme ataya.

¹⁷ Ndien ama ekem owo ekededi eke midinyimeke ndito ke mme ubon ererimbot ndɔk ke Jerusalem ndituak ibuot nnɔ edi-dem, kpa Jehovah mme udim, baba edim ididepke mmɔ ke idem.

¹⁸ Ndien ubon Egypt midɔkke idi, baba edim ididepke mmɔ ke idem; edi mmɔ eyeda ufen emi Jehovah edimiade mme idut emi midɔkke idi idinim usɔrɔ mme ataya.

¹⁹ Emi edidi ufen Egypt, ye ufen kpukpru mme idut eke mididɔkke idi idinim usɔrɔ mme ataya.

²⁰ Ke usen oro “EDISANA ŊKPƆ JEHOVAH” eyedu ke ŋkanika mme horse: mme eso ke ufɔk Jehovah eyenyuŋ ebiet mme bowl ke iso itie-uwa.

²¹ Ndien kpukpru eso ke Jerusalem ye ke Judah eyedi ndisana ŋkpɔ Jehovah mme udim: ndien kpukpru mme awa-uwa eyedi edida mmɔ, enyuŋ etem ŋkpɔ ke esit. Ndien ke usen oro baba Canaanite kiet ididuhe aba ke ufɔk Jehovah mme udim.