ZECHARIAH 12 - Edisana ñwed Abasi Ibom

Edikan Emi Anade Ɔnɔ Nditɔ Israel ke Iso

¹ MBIOMO uyo Jehovah odoro Israel. Jehovah emi ekeneŋerede ikpa-enyɔŋ, onyuŋ onimde ererimbot ke itie esie, onyuŋ obotde spirit owo esin enye ke idem, ke ɔdɔhɔ, ete,

² Sese, ami mmɔŋ nnim Jerusalem ke cup nnyek-idem nnɔ kpukpru mme idut emi ekande ekuk; ndien ŋko enye eyena ɔnɔ Judah ke ukuk eke mmɔ ekande Jerusalem ekuk.

³ Ndien ama ekem ke usen oro, nyenim Jerusalem ke edidobi itiat nnɔ kpu-kpru mme idut: kpukpru mmɔ eke emenerede enye eyewaha mbak-mbak: kpukpru mme idut ke ererimbot eyenyuŋ esop idem ebaŋa enye.

⁴ Jehovah ɔdɔhɔ, ete, Ke usen oro nyeda mkpa-idem mmia kpukpru horse, nnyuŋ nda idat mmia mmɔ eke edorode mmɔ: ndien nyetat enyin mi nse ufɔk Judah, nnyuŋ ntibi kpukpru mme horse mme idut enyin.

⁵ Ndien mme etubom Judah eyedɔhɔ ke esit mmɔ, ete, Jehovah mme udim Abasi nnyin esin mme andiduŋ Jerusalem edi odudu mi.

⁶ Ke usen oro nyenim mme etubom Judah ke eso ikaŋ ke otu ifia, ye ke nsaraŋ-ikaŋ ke ebek; ndien mme eyeta kpukpru mme idut emi ekande ekuk ke nnasia ye ke ufien: ndien Jerusalem eyesuk eduŋ ke ɔtɔ esie, kpa ke Jerusalem.

⁷ Ndien Jehovah eyebem iso anyaŋa mme tent Judah, man ubɔŋ ufɔk David ye ubɔŋ mme andiduŋ Jerusalem ekumenere idem ekan Judah.

⁸ Ke usen oro Jehovah eyekpeme mme andiduŋ Jerusalem; ndien mmeme-mmeme owo ke otu mmɔ eyebiet David ke usen oro; ufɔk David eyenyuŋ ebiet Abasi, ebiet angel Jehovah ke iso mmɔ.

⁹ Ndien ama ekem ke usen oro, nyeyom ndisobo kpukpru mme idut eke edide ndiŋwana ekɔŋ ye Jerusalem.

¹⁰ Ndien nyeda spirit mfɔn ye eke mkpe-ubɔk ŋŋwaŋa ufɔk David ye mme andidiuŋ Jerusalem ke idem; ndien mmɔ eyese mi emi mmɔ ekekimde, eyenyuŋ eseme enye, kpa nte owo esemede ikpɔŋ eyen, enyuŋ etua enye, kpa nte

¹¹ owo atuade akpan. Ke usen oro ntuaŋa eyekpon ke Jerusalem, ebiet ntuaŋa Hadadrimmon ke itihere Meggidon.

¹² Ndien mbio-obio eyetuaŋa ke ubon, ke ubon, ke idem mmɔ; ubon ufɔk David ke idem mmɔ ikpɔŋ, ye iban mmɔ ke idem mmɔ ikpɔŋ; ubon ufɔk Nathan ke idem mmɔ ikpɔŋ, ye iban mmɔ ke idem mmɔ ikpɔŋ;

¹³ ubon ufɔk Levi ke idem mmɔ ikpɔŋ, ye iban mmɔ ke idem mmɔ ikpɔŋ; ubon Shimei ke idem mmɔ ikpɔŋ, ye iban mmɔ ke idem mmɔ ikpɔŋ;

¹⁴ kpukpru ubon eke esuhɔde ke idem mmɔ ikpɔŋ, ye iban mmɔ ke idem mmɔ ikpɔŋ.