TITUS 3 - Edisana ñwed Abasi Ibom

Ekpeme Enyuŋ Enam Nti Ido

¹ TI mmɔ ete esuk idem enɔ mme andikara ye mme enyene-idaha, enyuŋ esuk ibuot, enyuŋ ebeŋe idem ndinam kpukpru nti utom;

² Ekusuŋi baba owo kiet, ekunyuŋ edi mbon utɔk; edi etie ifure-ifure, enyuŋ ewut kpukpru owo suŋ-suŋ ido.

³ Koro nnyin ke idem nnyin ima inana ibuot tutuko, ima itut-utɔŋ, inyuŋ idue; iduk ufin inɔ nsio-nsio idiɔk udɔŋ ye mbre; ima idu uwem inam ibak, inyuŋ ifibeufup; nnyin ikedi se owo esuade, nnyin ikonyuŋ isua kiet eken.

⁴ Edi ke ini mfɔnido Abasi Andinyaŋa nnyin ama ɔbiɔŋɔre, ye ima emi Enye amade nnyin,

⁵ itoho ke ŋkpɔ eke nnyin inamde ke edinen ido, edi oto ke mbɔm Esie ke Enye akanyaŋa nnyin, ɔtɔŋɔ ntak obot nnyin ke eriyet nnyin isana,

⁶ onyuŋ anam nnyin iwɔrɔ idi obufa ke odudu Edisana Spirit, emi Enye ama aŋwaŋa ɔnɔ nnyin uwak-uwak ke Jesus Christ Andinyaŋa nnyin;

⁷ man nnyin ibɔ utebe-ikpe ke mfɔn Esie, inyuŋ ikabare idi menyene udeme, nte idori-enyin nsinsi uwem edide.

⁸ Ikɔ emi edi akpanikɔ. Nyom fi ɔsɔŋɔ eyire emi, ete mmɔ emi ekɔbuɔtde idem ye Abasi esin ifik enyene eti ubɔk-utom eke mmɔ enamde. Utɔ item emi edi se ifɔnde ye se idorode owo.

⁹ Edi fep idem ke ndisime eneni, ye mbuk emana, ye utɔk, ye eŋwan eke eŋwanade ebaŋa ibet; koro mmɔ idaha udori isɔk owo, edi ewɔrɔ ikpikpu.

¹⁰ Owo emi ɔtɔde ubahare ke ufɔk Abasi, kusaŋa aba ŋkpɔ ye enye, ke ama ɔkɔnɔ enye item utim ikaba;

¹¹ Ɔmɔfiɔk ete, utɔ owo oro akwaŋa usuŋ esiemɔ; enye ke edue, esit esie ke onyuŋ obiom enye.

¹² Domo ukeme fo ndibine mi ke Nicopolis, ke ini ndɔŋde Artemas me Tychicus ke ɔtɔ fo; koro nduak ndidu do ke ukwɔ.

¹³ Sio Zenas ɔfiɔk-ibet ye Apollos unyɔŋ ke ido eke eyede; kuyak ŋkpɔ anana mmɔ.

¹⁴ Nyuŋ dɔhɔ ikɔt nnyin ete, enyene eti ubɔk-utom kabaŋa se edinade nte mmɔ enam, mbak mmɔ edinana mfri.

¹⁵ Kpukpru mmɔ emi edude ye ami ete ekɔm fi. Kɔm mmɔ emi emade nnyin ke mbuɔtidem. Mfɔn akpakam odu ye kpukpru mbufo.