TITUS 1 - Edisana ñwed Abasi Ibom

Mme Ido Emi Ada Idaha ke Ufɔk-Abasi Enyenede Ndinyene

¹ AMI Paul, emi ndide owo Abasi ye apostle Jesus Christ, man ndimek ikɔt Abasi enyene mbuɔtidem, enyuŋ enyene ifiɔk akpanikɔ eke asaŋade ye uteŋe Abasi, ke idori-enyin nsinsi uwem;

² Eke Abasi, emi mikemeke ndisu nsu, ekebemde nsinsi ini iso ɔŋwɔŋɔ;

³ edi ke edikem ini Enye ama ayarare ikɔ Esie ke ukwɔrɔ-ikɔ emi ekayakde esin mi ke ubɔk, nte item Abasi Andinyaŋa nnyin edide;

⁴ ŋwet nnɔ esɔk Titus, ata eyen mi ke mbuɔtidem eke nnyin edem mbiba ibuanade; mfɔn ye emem akpakam oto ke ubɔk Abasi Ete ye Christ Jesus Andinyaŋa nnyin osim fi.

⁵ Ŋkɔkpɔŋ fi ke Crete ke ntak emi, man afo eneŋere onim ŋkpɔ eke enanade, onyuŋ emek mbiowo onim ke obio ke obio, kpa nte ŋketemede fi;

⁶ Owo eke mibiomke enye ikɔ, eke edide ebe ŋwaŋ kiet, onyuŋ enyenede nditɔ eke enimde ke akpanikɔ, nditɔ eke mme owo midorike mmɔ ikɔ ite edi mbon otime-otime ido ye nsɔŋ-ibuot.

⁷ Koro ada idaha ufɔk Abasi enyenede ndidi owo eke mme owo minyeneke se etiŋde edian, nte akama-ukpɔhɔre Abasi. Enye inyeneke ndidi itun, inyeneke ndisɔp nyat esit, inyeneke ndidi owo mmin ye ifiopesit, enye ikponyuŋ idiɔkke itɔŋ ibine idiɔk udori.

⁸ Enye enyene ndidi owo eke amade ndikama isen owo, ama eti ido, enyene eti ibuot, enyene edinen ido, enyene edisana ido, enyene mfara ke idem:

⁹ enye enyene ndisɔŋɔ mmum ikɔ akpanikɔ eke ekekpepde enye, man ekeme ndida eti ukpep-ŋkpɔ oro nteme mme owo, nnyuŋ ŋkan mmɔ eke eŋwanade ye enye.

¹⁰ Koro ediwak mbon nsɔŋ-ibuot edu, eke edide mbio ikpikpu ndutiŋ ye mbio abiaŋa, akpan-akpan ke otu mme ana-mbobi.

¹¹ Ana nte ekibi mmɔ inua; koro mmɔ ekpep mme owo se mikemke ke ntak idiɔk udori, enyuŋ ekabare ofuri ufɔk ewuri.

¹² Owo mmɔ kiet eke edide prophet ke otu mmɔ, ɔdɔhɔ ntem ete, Mbio Crete esuk edi mme osu-nsu, ndiɔi unam, mme ama udia eke etiede ifu.

¹³ Ikɔ-ntiense emi edi akpanikɔ. Mmɔdo sua nɔ mmɔ ɔkpɔsɔŋ,

¹⁴ man mmɔ esɔŋɔ idem ke ikɔ mbuɔtidem, ekunyuŋ ekpaŋ utɔŋ enɔ ŋke mme Jew ye mme item owo eke ekpɔŋde akpanikɔ.

¹⁵ Kpukpru ŋkpɔ edi edisana ye mmɔ eke esanade; edi ye mmɔ eke ekesabarede idem minyuŋ inimke ke akpanikɔ, baba ŋkpɔ kiet idige edisana; edi ekikere mmɔ ye esit mmɔ edehe.

¹⁶ Mmɔ edɔhɔ ete, mme imɔ ifiɔk Abasi; edi mmɔ ekaŋ Enye ke ido mmɔ, sia mmɔ ebiamde mbubiam, enyuŋ esɔŋde ibuot, enyuŋ ebiarade adaŋa nte mmɔ mikemeke ndinam ndomo eti utom kiet.