RUTH 1 - Edisana ñwed Abasi Ibom

Elimelech Ada Ofuri Ufɔk Esie Okoduŋ ke Isɔŋ Moab ye Mbuk Ruth ye Naomi

¹ EDIKEM ke eyo oro mme ebierikpe ekamade obio, akaŋ odu ke isɔŋ. Ndien owo kiet oto ke Beth-lehem-judah aka okoduŋ ke idut Moab, enye, ye ŋwan esie, ye nditɔ-iren esie iba.

² Ndien enyiŋ owo oro ekere Elimelech, enyiŋ ŋwan esie onyuŋ ekere Naomi, enyiŋ nditɔ-iren esie iba enyuŋ ekere Mahlon ye Chilion, Ephrathite emi etode ke Beth-lehem-judah. Ndien mmɔ eka ke idut Moab ekeduŋ do.

³ Ekem Elimelech ebe Naomi akpa; ndien enye osuk ye nditɔ esie iba.

⁴ Ndien mmɔ edɔ iban Moab; enyiŋ kiet ekere Orpah, enyiŋ kiet eken onyuŋ ekere Ruth: ndien mmɔ eduŋ do esim isua duop.

⁵ Ekem mmɔ mbiba, Mahlon ye Chilion ekpa ŋko-ŋko; ndien ŋwan oro osuk ikpɔŋ anana nditɔ esie mbiba ye ebe esie ŋko.

⁶ Ndien enye adaha ye iban nditɔ esie, ɔnyɔŋ ɔkpɔŋ isɔŋ Moab: koro enye okokopde ke isɔŋ Moab, ete ke Jehovah ama ɔkɔfɔn ye ikɔt esie, onyuŋ ɔnɔ mmɔ udia.

⁷ Ndien enye oto ke ebiet oro enye okodude, iban nditɔ esie iba enyuŋ edu ye enye, ndien mmɔ esaŋa ke usuŋ, ete inyuŋ ika ke edem Judah.

⁸ Ndien Naomi ɔdɔhɔ iban nditɔ esie mbiba, ete, Mbufo ekam enyɔŋɔ eka ke ufɔk eka mbufo: Jehovah akam onyuŋ anam se ifɔnde ye mbufo, kpasuk nte mbufo ekenamde ye mme andikpa mkpa ye ami ŋko:

⁹ Jehovah akpakam anam mbufo ekut nduɔk-odudu ke ufɔk mme ebe mbufo. Ndien enye otim mmɔ inua; ndien mmɔ emenere uyo mmɔ etua eyet.

¹⁰ Ndien mmɔ edɔhɔ enye, ete, Nnyin iditreke ndisaŋa ye afo ntiene oruk fo.

¹¹ Ndien Naomi ɔdɔhɔ ete, Mbufo ekam enyɔŋɔ, nditɔ mi: mbufo enam didie esaŋa ye ami? Nte nditɔ efen edu mi ke idibi, eke ekpedide ebe mbufo?

¹² Mbufo ekam enyɔŋɔ, nditɔ mi, eka; koro mmɔsɔŋ ŋkan nte nnyenede ebe. Koro ekpedi nte ndidɔhɔde nte, Mmenyene idori-enyin, mma nnyuŋ ndɔ ebe ke okoneyo emi nnyuŋ mman nditɔ-iren ŋko;

¹³ nte mbufo ndien ekpetie ebet tutu mmɔ ekponi? Nte oro ekpesin mbufo etre ndinyene ebe? Ihih, nditɔ mi; koro ɔdiɔkde ye ami akan mbufo: koro Jehovah ama ada ubɔk esie etiene mi.

¹⁴ Ndien mmɔ etɔŋɔ ntak emenere uyo mmɔ etua eyet: ndien Orpah otim eka ebe esie inua; edi Ruth eyire ye enye.

¹⁵ Ndien enye ɔdɔhɔ ete, Sese, ŋwan eyen-eka uberi ɔnyɔŋ etiene oruk esie, ye mme abasi esie; nyɔŋ tiene ŋwaŋ eyen-eka uberi.

¹⁶ Ndien Ruth ɔdɔhɔ ete, Kukpe mi ubɔk, ete nnyɔŋ ŋkpɔŋ fi, ntre nditiene fi: koro nyeka ke ebiet eke afo akade; nyenyuŋ nduŋ ke ebiet eke afo oduŋde: oruk fo eyedi oruk mi, Abasi fo eyenyuŋ edi Abasi mi:

¹⁷ nyekpa ke ebiet eke afo edikpade, nyeyuŋ mbuhɔ do; yak Jehovah anam mi ntem, onyuŋ ɔdɔdiɔŋ anam ntem, ke midige mkpa mkpa adianare mi ye afo.

¹⁸ Ndien ke ini eka okutde ete ke enye ama ototim aduak ndisaŋa ye imɔ, enye etre ndidɔhɔ ye enye.

¹⁹ Ndien mmɔ mbiba esaŋa tutu ediwɔrɔ ke Beth-lehem. Ndien edikem ke ini mmɔ esimde Beth-lehem, ofuri obio otime abaŋa mmɔ, ndien mmɔ edɔhɔ ete, Emi akam edi Naomi?

²⁰ Edi enye ɔdɔhɔ mmɔ, ete, Mbufo ekukot mi, ete, Naomi (Edinem), ekot mi, ete, Marah (Ndot-ndot): koro Ata Ɔkpɔsɔŋ ama ododoro ye ami eti-eti.

²¹ Ami ŋkɔwɔrɔ ke ɔyɔhɔ ubɔk, ndien Jehovah amada mi afiak ubɔk-ubɔk: nsinam mbufo ekotde mi, ete, Naomi, sia Jehovah ama ɔdɔhɔ ikɔ otuk mi, Ata Ɔkpɔsɔŋ ama onyuŋ anam mi idiɔk?

²² Ntem ke Naomi afiak edi, ye Ruth ŋwan Moab, ŋwan eyen esie ŋko, emi okotode ke idut Moab ɔnyɔŋ: ndien mmɔ esim Beth-lehem ke eritɔŋɔ ini ukpeŋe barley.